वृक्षारोपण-विधि

श्लोक 1 (padma.1.28.1)

भीष्म उवाच। पादपानां विधिं ब्रह्मन्यथावद्विस्तराद्वद। विधिना येन कर्त्तव्यं पादपारोपणं बुधैः॥

bhīṣma uvāca pādapānāṁ vidhiṁ brahmanyathāvadvistarādvada vidhinā yena karttavyaṁ pādapāropaṇaṁ budhaiḥ

भीष्म ने कहा — हे ब्रह्मन्! वृक्षों की विधि यथावत् विस्तार से बताइए — जिस विधि से बुद्धिमानों को वृक्षारोपण करना चाहिए।

श्लोक 2 (padma.1.28.2)

ये च लोकाः स्मृता येषां तानिदानीं वदस्व मे॥

ye ca lokāḥ smṛtā yeṣāṁ tānidānīṁ vadasva me

और अब मुझे उन लोकों के विषय में बताइए जो उनके लिए (वृक्षारोपण करने वालों के लिए) कहे गए हैं।

श्लोक 3 (padma.1.28.3)

पुलस्त्य उवाच। पादपानां विधिं वक्ष्ये तथैवोद्यानभूमिषु॥

pulastya uvāca pādapānāṁ vidhiṁ vakṣye tathaivodyānabhūmiṣu

पुलस्त्य ने कहा — मैं वृक्षों की विधि बताऊँगा, तथा उद्यान-भूमियों की भी।

श्लोक 4 (padma.1.28.4)

तटाकविधिवत्सर्वं समाप्य जगतीश्वर। ऋत्विङ्मंडपसंभारमाचार्यं चापि तद्विधं॥

taṭākavidhivatsarvaṁ samāpya jagatīśvara ṛtviṅmaṁḍapasaṁbhāramācāryaṁ cāpi tadvidhaṁ

हे भूपते! तालाब की विधि के समान ही सब कुछ पूर्ण करके — ऋत्विक्, मंडप, सामग्री और आचार्य भी उसी विधि से —

श्लोक 5 (padma.1.28.5)

पूजयेद्ब्राह्मणांस्तद्वद्धेमवस्त्रानुलेपनैः। सर्वौषध्युदकैः सिक्तान्दध्यक्षतविभूषितान्॥

pūjayedbrāhmaṇāṁstadvaddhemavastrānulepanaiḥ sarvauṣadhyudakaiḥ siktāndadhyakṣatavibhūṣitān

— उसी प्रकार ब्राह्मणों को स्वर्ण, वस्त्र और अनुलेपन से पूजे; सभी औषधियों के जल से सिंचित तथा दधि और अक्षत से सुशोभित करे।

श्लोक 6 (padma.1.28.6)

वृक्षान्माल्यैरलंकृत्य वासोभिरभिवेष्टयेत्। सूच्या सौवर्णया कार्यं सर्वेषां कर्णवेधनं॥

vṛkṣānmālyairalaṁkṛtya vāsobhirabhiveṣṭayet sūcyā sauvarṇayā kāryaṁ sarveṣāṁ karṇavedhanaṁ

वृक्षों को मालाओं से अलंकृत करके वस्त्रों से लपेटे; स्वर्ण की सुई से सबका कर्ण-वेधन करे।

श्लोक 7 (padma.1.28.7)

अंजनं चापि दातव्यं तद्वद्धेमशलाकया। फलानि सप्त चाष्टौ वा कालधौतानि कारयेत्॥

aṁjanaṁ cāpi dātavyaṁ tadvaddhemaśalākayā phalāni sapta cāṣṭau vā kāladhautāni kārayet

उसी प्रकार सोने की सलाई से अंजन भी लगाए। चाँदी के सात या आठ फल बनवाए।

श्लोक 8 (padma.1.28.8)

प्रत्येकं सर्ववृक्षाणां वेद्यांतान्यधिवासयेत्। धूपोत्र गुग्गुलुः श्रेष्ठस्ताम्रपात्रेष्वधिष्ठितान्॥

pratyekaṁ sarvavṛkṣāṇāṁ vedyāṁtānyadhivāsayet dhūpotra gugguluḥ śreṣṭhastāmrapātreṣvadhiṣṭhitān

प्रत्येक वृक्ष का वेदी के समीप अधिवासन करे; यहाँ गुग्गुल श्रेष्ठ धूप है, जो ताम्रपात्रों में रखा जाए।

श्लोक 9 (padma.1.28.9)

सप्तधान्यस्थितान्कृत्वा वस्त्रगंधानुलेपनैः। कुंभान्सर्वेषु वृक्षेषु स्थापयित्वावनीश्वर॥

saptadhānyasthitānkṛtvā vastragaṁdhānulepanaiḥ kuṁbhānsarveṣu vṛkṣeṣu sthāpayitvāvanīśvara

हे भूपते! सप्त-धान्य से भरे, वस्त्र-गंध-अनुलेपन से युक्त कलशों को सभी वृक्षों पर स्थापित करके —

श्लोक 10 (padma.1.28.10)

पूजयित्वा दिनांते च कृत्वा बलिनिवेदनम्। यथावल्लोकपालानामिंद्रादीनां विधानतः॥

pūjayitvā dināṁte ca kṛtvā balinivedanam yathāvallokapālānāmiṁdrādīnāṁ vidhānataḥ

— पूजा करके और दिन के अंत में इंद्र आदि लोकपालों को विधिपूर्वक बलि-निवेदन करके —

श्लोक 11 (padma.1.28.11)

वनस्पतेरधिवास एवं कार्यो द्विजातिभिः। ततः शुक्लांबरधरान्सौवर्णकृतमेखलान्॥

vanaspateradhivāsa evaṁ kāryo dvijātibhiḥ tataḥ śuklāṁbaradharānsauvarṇakṛtamekhalān

— इस प्रकार द्विजों द्वारा वृक्ष का अधिवासन किया जाए। तत्पश्चात् श्वेत वस्त्र और स्वर्ण-मेखला से युक्त —

श्लोक 12 (padma.1.28.12)

सकांस्यदोहां सौवर्णशृंगाभ्यामतिशालिनीं। पयस्विनीं वृक्षमध्यादुत्सृजेद्गामुदङ्मुखीम्॥

sakāṁsyadohāṁ sauvarṇaśṛṁgābhyāmatiśālinīṁ payasvinīṁ vṛkṣamadhyādutsṛjedgāmudaṅmukhīm

— काँसे के पात्र में दुही जाने वाली, स्वर्ण-सींगों वाली अत्यंत शोभायमान दुधारू गौ को वृक्षों के मध्य से उत्तराभिमुख होकर छोड़े।

श्लोक 13 (padma.1.28.13)

ततोभिषेकमंत्रेण वाद्यमंगलगीतकैः। ऋग्यजुःसाममंत्रैश्च वारुणैरभितस्तदा॥

tatobhiṣekamaṁtreṇa vādyamaṁgalagītakaiḥ ṛgyajuḥsāmamaṁtraiśca vāruṇairabhitastadā

तत्पश्चात् अभिषेक-मंत्र से, वाद्यों और मंगल-गीतों के साथ, तथा ऋक्, यजुः, साम मंत्रों और चारों ओर वारुण-मंत्रों से —

श्लोक 14 (padma.1.28.14)

तैरेव कुंभैः स्नपनं कुर्युर्ब्राह्मणपुंगवाः। स्नातः शुक्लांबरधरो यजमानोभिपूजयेत्॥

taireva kuṁbhaiḥ snapanaṁ kuryurbrāhmaṇapuṁgavāḥ snātaḥ śuklāṁbaradharo yajamānobhipūjayet

— उन्हीं कलशों से श्रेष्ठ ब्राह्मण स्नपन करें। स्नान करके श्वेत वस्त्र धारण किए हुए यजमान पूजा करे —

श्लोक 15 (padma.1.28.15)

गोभिर्विभवतः सर्वानृत्विजः ससमाहितान्। हेमसूत्रैः सकटकैरंगुलीयैः पवित्रकैः॥

gobhirvibhavataḥ sarvānṛtvijaḥ sasamāhitān hemasūtraiḥ sakaṭakairaṁgulīyaiḥ pavitrakaiḥ

— सभी समाहित ऋत्विजों को अपनी सामर्थ्य के अनुसार गौओं से; स्वर्ण-सूत्रों, कटकों, अंगूठियों और पवित्रकों से पूजे।

श्लोक 16 (padma.1.28.16)

वासोभिः शयनीयैश्च तथोपस्करपादुकैः। क्षीराभिषेचनं कुर्याद्यावद्दिनचतुष्टयम्॥

vāsobhiḥ śayanīyaiśca tathopaskarapādukaiḥ kṣīrābhiṣecanaṁ kuryādyāvaddinacatuṣṭayam

— वस्त्रों, शय्याओं, तथा उपकरणों और पादुकाओं से भी। चार दिनों तक दूध से अभिषेक करे।

श्लोक 17 (padma.1.28.17)

होमश्च सर्पिषा कार्यो यवैः कृष्णतिलैरपि। पलाशसमिधः शस्ताश्चतुर्थेऽह्नि तथोत्सवः॥

homaśca sarpiṣā kāryo yavaiḥ kṛṣṇatilairapi palāśasamidhaḥ śastāścaturthe'hni tathotsavaḥ

घृत से, यव और कृष्ण तिल से भी हवन करे; पलाश की समिधाएँ प्रशस्त हैं; और चौथे दिन उत्सव करे।

श्लोक 18 (padma.1.28.18)

दक्षिणा च पुनस्तद्वद्देया तत्रापि शक्तितः। यद्यदिष्टतमं किचित्तत्तद्दद्यादमत्सरी॥

dakṣiṇā ca punastadvaddeyā tatrāpi śaktitaḥ yadyadiṣṭatamaṁ kicittattaddadyādamatsarī

और वहाँ भी यथाशक्ति दक्षिणा देनी चाहिए। जो कुछ भी सर्वाधिक प्रिय हो, वह ईर्ष्यारहित होकर दे।

श्लोक 19 (padma.1.28.19)

आचार्ये द्विगुणं दत्त्वा प्रणिपत्य क्षमापयेत्। अनेन विधिना यस्तु कुर्याद्वृक्षोत्सवं बुधः॥

ācārye dviguṇaṁ dattvā praṇipatya kṣamāpayet anena vidhinā yastu kuryādvṛkṣotsavaṁ budhaḥ

आचार्य को दुगुना देकर प्रणाम करके क्षमा माँगे। जो विद्वान् इस विधि से वृक्षोत्सव करता है —

श्लोक 20 (padma.1.28.20)

सर्वान्कामानवाप्नोति पदं चानन्तमश्नुते। यश्चैवमपि राजेन्द्र वृक्षं संस्थापयेद्बुधः॥

sarvānkāmānavāpnoti padaṁ cānantamaśnute yaścaivamapi rājendra vṛkṣaṁ saṁsthāpayedbudhaḥ

— वह समस्त कामनाओं को प्राप्त करता है और अनंत पद को प्राप्त होता है। हे राजेंद्र! जो विद्वान् इस प्रकार एक भी वृक्ष स्थापित करता है —

श्लोक 21 (padma.1.28.21)

सोपि स्वर्गे वसेद्राजन्यावदिंद्रायुतत्रयम्। भूतान्भव्यांश्च मनुजांस्तारयेद्रोमसंमितान्॥

sopi svarge vasedrājanyāvadiṁdrāyutatrayam bhūtānbhavyāṁśca manujāṁstārayedromasaṁmitān

— हे राजन्! वह भी तीस हजार इंद्रों के काल तक स्वर्ग में निवास करता है, और अपने शरीर के रोमों के बराबर भूत और भावी मनुष्यों का उद्धार करता है।

श्लोक 22 (padma.1.28.22)

परमां सिद्धिमाप्नोति पुनरावृत्तिदुर्लभाम्। य इदं शृणुयान्नित्यं श्रावयेद्वापि मानवः॥

paramāṁ siddhimāpnoti punarāvṛttidurlabhām ya idaṁ śṛṇuyānnityaṁ śrāvayedvāpi mānavaḥ

वह परम सिद्धि को प्राप्त होता है, जहाँ से लौटना दुर्लभ है। जो मनुष्य इसे नित्य सुनता है अथवा दूसरों को सुनाता है —

श्लोक 23 (padma.1.28.23)

सोपि संपूज्यते देवैर्ब्रह्मलोके महीयते। अपुत्रस्य च पुत्रित्वं पादपा एव कुर्वते॥

sopi saṁpūjyate devairbrahmaloke mahīyate aputrasya ca putritvaṁ pādapā eva kurvate

— वह भी देवताओं द्वारा पूजित होकर ब्रह्मलोक में महिमामंडित होता है। पुत्रहीन के लिए वृक्ष ही पुत्रत्व प्रदान करते हैं।

श्लोक 24 (padma.1.28.24)

तीर्थेषु पिंडदानादीन्रोपकाणां ददंति ते। यत्नेनापि च राजेंद्र अश्वत्थारोपणं कुरु॥

tīrtheṣu piṁḍadānādīnropakāṇāṁ dadaṁti te yatnenāpi ca rājeṁdra aśvatthāropaṇaṁ kuru

वे (वृक्ष ही, पुत्रवत्) रोपने वालों के लिए तीर्थों में पिंडदान आदि करते हैं। हे राजेंद्र! प्रयत्नपूर्वक अश्वत्थ (पीपल) का रोपण कीजिए।

श्लोक 25 (padma.1.28.25)

स ते पुत्रसहस्रस्य कृत्यमेकः करिष्यति। धनी चाश्वत्थवृक्षेण अशोकः शोकनाशनः॥

sa te putrasahasrasya kṛtyamekaḥ kariṣyati dhanī cāśvatthavṛkṣeṇa aśokaḥ śokanāśanaḥ

वह एक ही वृक्ष तुम्हारे लिए सहस्र पुत्रों का कार्य करेगा। अश्वत्थ वृक्ष से मनुष्य धनवान् होता है; अशोक शोक का नाशक है।

श्लोक 26 (padma.1.28.26)

प्लक्षो यज्ञप्रदः प्रोक्तः क्षीरी चायुःप्रदः स्मृतः। जंबुकी कन्यकादात्री भार्यादा दाडिमी तथा॥

plakṣo yajñapradaḥ proktaḥ kṣīrī cāyuḥpradaḥ smṛtaḥ jaṁbukī kanyakādātrī bhāryādā dāḍimī tathā

प्लक्ष यज्ञ-फलदायक कहा गया है, तथा क्षीरी वृक्ष आयुदायक माने गए हैं। जंबू कन्या देने वाला है, और दाड़िम (अनार) पत्नी देने वाला है।

श्लोक 27 (padma.1.28.27)

अश्वत्थो रोगनाशाय पलाशो ब्रह्मदस्तथा। प्रेतत्वं जायते पुंसो रोपयेद्यो विभीतकम्॥

aśvattho roganāśāya palāśo brahmadastathā pretatvaṁ jāyate puṁso ropayedyo vibhītakam

अश्वत्थ रोगनाशक है, पलाश भी ब्रह्म-फलदायक है। जो पुरुष विभीतक (बहेड़ा) का रोपण करता है, उसे प्रेतत्व प्राप्त होता है।

श्लोक 28 (padma.1.28.28)

अंकोले कुलवृद्धिस्तु खादिरेणाप्यरोगिता। निंबप्ररोहकाणां तु नित्यं तुष्येद्दिवाकरः॥

aṁkole kulavṛddhistu khādireṇāpyarogitā niṁbapraṁrohakāṇāṁ tu nityaṁ tuṣyeddivākaraḥ

अंकोल से कुल-वृद्धि होती है, खदिर से आरोग्य प्राप्त होता है। नीम के अंकुर उगाने वालों से सूर्यदेव सदा प्रसन्न रहते हैं।

श्लोक 29 (padma.1.28.29)

श्रीवृक्षे शंकरो देवः पाटलायां तु पार्वती। शिंशपायामप्सरसः कुंदे गंधर्वसत्तमाः॥

śrīvṛkṣe śaṁkaro devaḥ pāṭalāyāṁ tu pārvatī śiṁśapāyāmapsarasaḥ kuṁde gaṁdharvasattamāḥ

श्रीवृक्ष (बिल्व) में देव शंकर निवास करते हैं, पाटला में पार्वती; शिंशपा में अप्सराएँ, कुंद में श्रेष्ठ गंधर्व निवास करते हैं।

श्लोक 30 (padma.1.28.30)

तिंतिडीके दासवर्गा वंजुले दस्यवस्तथा। पुण्यप्रदः श्रीप्रदश्च चंदनः पनसस्तथा॥

tiṁtiḍīke dāsavargā vaṁjule dasyavastathā puṇyapradaḥ śrīpradaśca caṁdanaḥ panasastathā

इमली में सेवक-वर्ग निवास करते हैं, वंजुल में तस्कर। चंदन पुण्य और श्री देने वाला है, तथा कटहल भी।

श्लोक 31 (padma.1.28.31)

सौभाग्यदश्चंपकश्च करीरः पारदारिकः। अपत्यनाशकस्तालो बकुलः कुलवर्द्धनः॥

saubhāgyadaścaṁpakaśca karīraḥ pāradārikaḥ apatyanāśakastālo bakulaḥ kulavarddhanaḥ

चंपक सौभाग्यदायक है; करील (एक कँटीली झाड़ी) परस्त्रीगामी बनाने वाला है। ताड़ संतान-नाशक है, और बकुल कुल-वर्धक है।

श्लोक 32 (padma.1.28.32)

बहुभार्या नारिकेला द्राक्षा सर्वांगसुंदरी। रतिप्रदा तथा कोली केतकी शत्रुनाशिनी॥

bahubhāryā nārikelā drākṣā sarvāṁgasuṁdarī ratipradā tathā kolī ketakī śatrunāśinī

नारियल अनेक पत्नियाँ देने वाला है; अंगूर सर्वांग-सुंदरता देने वाला है। बेर रति-सुख देने वाला है, तथा केतकी शत्रु-नाशिनी है।

श्लोक 33 (padma.1.28.33)

एवमादि नगाश्चान्ये ये नोक्तास्तेपि दायकाः। प्रतिष्ठां ते गमिष्यंति यैस्तु वृक्षाः प्ररोपिताः॥

evamādi nagāścānye ye noktāstepi dāyakāḥ pratiṣṭhāṁ te gamiṣyaṁti yaistu vṛkṣāḥ praropitāḥ

इसी प्रकार अन्य वृक्ष भी जो नहीं कहे गए, वे भी फलदाता हैं। जिन्होंने भी वृक्षों का रोपण किया है, वे इसी प्रतिष्ठा को प्राप्त होंगे।