डमरुकेश्वर माहात्म्य

श्लोक 1 (skanda.5.75.1)

श्रीमहादेव उवाच। ख्यातोऽवंत्यां चतुर्थोऽसौ देवो डमरुकेश्वरः। दृष्टे यस्मिञ्जगन्नाथे याति पापं च संक्षयम्

śrīmahādeva uvāca| khyāto'vaṁtyāṁ caturtho'sau devo ḍamarukeśvaraḥ| dṛṣṭe yasmiñjagannāthe yāti pāpaṁ ca saṁkṣayam

श्रीमहादेव बोले — अवंती में चतुर्थ देव डमरुकेश्वर के नाम से विख्यात हैं; जिस जगन्नाथ का दर्शन करने पर पाप नष्ट हो जाता है।

श्लोक 2 (skanda.5.75.2)

पुरा वैवस्वते कल्पे रुरुर्नाम महासुरः। तस्य पुत्रो महाबाहुर्वज्रोनाम महाबलः। बभूव सुमहाकायस्तीक्ष्णदंष्ट्रो भयंकरः

purā vaivasvate kalpe rururnāma mahāsuraḥ| tasya putro mahābāhurvajronāma mahābalaḥ| babhūva sumahākāyastīkṣṇadaṁṣṭro bhayaṁkaraḥ

पूर्वकाल में वैवस्वत कल्प में रुरु नामक एक महान असुर था; उसका पुत्र महाबाहु, महाबली, वज्र नामक, विशाल शरीर वाला, तीक्ष्ण दाढ़ों वाला और भयंकर था।

श्लोक 3 (skanda.5.75.3)

तेन देवाः स्वाधिकाराच्चालितास्त्रिदशालयात्

tena devāḥ svādhikārāccālitāstridaśālayāt

उसने देवताओं को उनके अपने अधिकार से, त्रिदशालय (स्वर्ग) से भी हटा दिया।

श्लोक 4 (skanda.5.75.4)

ततो नीतं धनं तेषां ब्रह्माणं ते ततो ययुः। ब्रह्मापि भयसंविग्नो बभूवाकुलितेंद्रियः

tato nītaṁ dhanaṁ teṣāṁ brahmāṇaṁ te tato yayuḥ| brahmāpi bhayasaṁvigno babhūvākuliteṁdriyaḥ

तब उनका धन भी छीन लिया गया; वे तब ब्रह्मा के पास गए। ब्रह्मा भी भय से विचलित और इंद्रियों से व्याकुल हो गए।

श्लोक 5 (skanda.5.75.5)

ज्ञात्वावध्यं सुरैः सार्धं सर्वैः सोऽथ महाबलः। तेषु नष्टेषु ये विप्रा यज्वानोऽथ तपस्विनः। ताञ्जघान स दुष्टात्मा ये चान्ये धर्मचारिणः

jñātvāvadhyaṁ suraiḥ sārdhaṁ sarvaiḥ so'tha mahābalaḥ| teṣu naṣṭeṣu ye viprā yajvāno'tha tapasvinaḥ| tāñjaghāna sa duṣṭātmā ye cānye dharmacāriṇaḥ

स्वयं को सब देवताओं सहित अवध्य जानकर, उस महाबली दुष्टात्मा ने, जब वे भाग गए, यज्ञकर्ता विप्रों और तपस्वियों को तथा अन्य धर्माचारी जनों को भी मार डाला।

श्लोक 6 (skanda.5.75.6)

निःस्वाध्यायवषट्कारं तदासीद्धरणीतलम्। नष्टयज्ञोत्सवं देवि हाहाभूतमचेतनम्

niḥsvādhyāyavaṣaṭkāraṁ tadāsīddharaṇītalam| naṣṭayajñotsavaṁ devi hāhābhūtamacetanam

तब पृथ्वीतल स्वाध्याय और वषट्कार से रहित हो गया; हे देवी, यज्ञोत्सव नष्ट हो गए, वह हाहाकारमय और मानो चेतनाशून्य हो गया।

श्लोक 7 (skanda.5.75.7)

ततः प्रव्यथिता देवास्तथा सर्वे महर्षयः। समेत्यामंत्रयन्मंत्रं वधार्थं तस्य दुर्मतेः

tataḥ pravyathitā devāstathā sarve maharṣayaḥ| sametyāmaṁtrayanmaṁtraṁ vadhārthaṁ tasya durmateḥ

तब व्यथित देवता तथा सभी महर्षि एकत्र होकर उस दुर्मति के वध के लिए विचार-विमर्श करने लगे।

श्लोक 8 (skanda.5.75.8)

ततः कायोऽभवत्सद्यः सर्वेषां पुरतस्तदा। तेषां चिंतयतां देवि तेजःपुंजेन चावृतः

tataḥ kāyo'bhavatsadyaḥ sarveṣāṁ puratastadā| teṣāṁ ciṁtayatāṁ devi tejaḥpuṁjena cāvṛtaḥ

तब उन सबके सामने, हे देवी, उनके चिंतन करते ही तत्काल एक शरीर उत्पन्न हुआ, जो तेज-पुंज से आवृत था।

श्लोक 9 (skanda.5.75.9)

तस्मात्कृत्या समुत्पन्ना दिव्या कमललोचना। द्योतयंती दिशः सर्वाः स्वतेजोभिः समंततः

tasmātkṛtyā samutpannā divyā kamalalocanā| dyotayaṁtī diśaḥ sarvāḥ svatejobhiḥ samaṁtataḥ

उससे एक दिव्य, कमललोचना कृत्या उत्पन्न हुई, जो अपने तेज से सब दिशाओं को प्रकाशित कर रही थी।

श्लोक 10 (skanda.5.75.10)

साब्रवीत्त्रिदशान्सर्वान्कस्मात्सृष्टा ह्यहं सुराः। यत्कर्तव्यं मया कर्म तच्छीघ्रं संनिवेद्यताम्

sābravīttridaśānsarvānkasmātsṛṣṭā hyahaṁ surāḥ| yatkartavyaṁ mayā karma tacchīghraṁ saṁnivedyatām

उसने सब देवताओं से कहा — "हे सुरगण, मैं किसलिए उत्पन्न की गई हूँ? जो कर्म मुझे करना है, वह शीघ्र मुझे बताया जाए।"

श्लोक 11 (skanda.5.75.11)

ततस्तु त्रिदशाः सर्वे श्रुत्वा तस्याः शुभा गिरः। आचख्युः सकलं तस्यै तदा वज्रस्य चेष्टितम्

tatastu tridaśāḥ sarve śrutvā tasyāḥ śubhā giraḥ| ācakhyuḥ sakalaṁ tasyai tadā vajrasya ceṣṭitam

तब सब देवताओं ने उसके शुभ वचन सुनकर उसे वज्र का सारा वृत्तांत बता दिया।

श्लोक 12 (skanda.5.75.12)

श्रुत्वा जहास सा देवी साट्टहासं मुहुर्मुहुः। तस्या हसंत्या निःसस्रुः कन्याः कमललोचनाः

śrutvā jahāsa sā devī sāṭṭahāsaṁ muhurmuhuḥ| tasyā hasaṁtyā niḥsasruḥ kanyāḥ kamalalocanāḥ

यह सुनकर वह देवी ठहाका मारकर बार-बार हँसी; उसके हँसने से कमललोचना कन्याएँ उत्पन्न हो गईं।

श्लोक 13 (skanda.5.75.13)

पाशांकुशधरा रौद्रा ज्वालामालावृताननाः। फेत्कारेण च संनादैश्चालयंत्यश्चराचरम्

pāśāṁkuśadharā raudrā jvālāmālāvṛtānanāḥ| phetkāreṇa ca saṁnādaiścālayaṁtyaścarācaram

पाश और अंकुश धारण किए, रौद्र रूप वाली, ज्वाला-मालाओं से आवृत मुख वाली वे कन्याएँ अपनी गर्जना और चीत्कार से चराचर जगत को कँपा रही थीं।

श्लोक 14 (skanda.5.75.14)

गताः सर्वा महादेवि यत्र वज्रो महासुरः। युद्धं तु तुमुलं जातं ताभिस्तस्य भयावहम्

gatāḥ sarvā mahādevi yatra vajro mahāsuraḥ| yuddhaṁ tu tumulaṁ jātaṁ tābhistasya bhayāvaham

वे सब, हे महादेवी, वहाँ गईं जहाँ महासुर वज्र था; उनके और उसके बीच भयंकर तुमुल युद्ध हुआ।

श्लोक 15 (skanda.5.75.15)

शस्त्रास्त्रैर्बहुधा मुक्तैर्व्याप्तं चैव दिगंतरम्। संनद्धाखिलसैन्यास्ते युयुधुः समरे भृशम्

śastrāstrairbahudhā muktairvyāptaṁ caiva digaṁtaram| saṁnaddhākhilasainyāste yuyudhuḥ samare bhṛśam

बहुविध छोड़े गए शस्त्रास्त्रों से दिशाएँ व्याप्त हो गईं; सन्नद्ध सारी सेनाएँ रणभूमि में घोर युद्ध करने लगीं।

श्लोक 16 (skanda.5.75.16)

ततः प्रववृते युद्धं तया देव्या सुरद्विषाम्। ततो मातृगणं क्रुद्धं मर्द्दयन्तं महासुरान्। पराङ्मुखं बलं दृष्ट्वा वज्रो मायामथासृजत्

tataḥ pravavṛte yuddhaṁ tayā devyā suradviṣām| tato mātṛgaṇaṁ kruddhaṁ marddayantaṁ mahāsurān| parāṅmukhaṁ balaṁ dṛṣṭvā vajro māyāmathāsṛjat

तब उस देवी का असुरों के शत्रुओं के साथ युद्ध चला; तब क्रुद्ध मातृगण को महासुरों को कुचलते देख, अपनी सेना को पराङ्मुख देखकर वज्र ने माया रची —

श्लोक 17 (skanda.5.75.17)

तामसीं नाम दुःसाध्यां यया मुह्यति कन्यकाः

tāmasīṁ nāma duḥsādhyāṁ yayā muhyati kanyakāḥ

— तामसी नामक दुःसाध्य माया, जिससे वे कन्याएँ मोहित हो गईं।

श्लोक 18 (skanda.5.75.18)

तमोभूते ततस्तस्मिन्सा देवी भयविह्वला। ताभिः सार्द्धं समायाता महाकालवनोत्तमम्

tamobhūte tatastasminsā devī bhayavihvalā| tābhiḥ sārddhaṁ samāyātā mahākālavanottamam

उस स्थान के अंधकारमय हो जाने पर वह देवी भयविह्वल होकर उन कन्याओं के साथ उत्तम महाकालवन में आ पहुँची —

श्लोक 19 (skanda.5.75.19)

कपालवान्हरो यत्र लिंगाकारेण संस्थितः। ज्ञात्वा मातृगणं नष्टं ततो मायाप्रभावतः

kapālavānharo yatra liṁgākāreṇa saṁsthitaḥ| jñātvā mātṛgaṇaṁ naṣṭaṁ tato māyāprabhāvataḥ

— जहाँ कपालधारी हर लिंगाकार में विराजमान हैं — माया के प्रभाव से मातृगण को वहाँ लुप्त जानकर।

श्लोक 20 (skanda.5.75.20)

वज्रोऽपि त्रिदशाञ्ज्ञात्वा देव्या सार्द्धमथोपितान्। आजगाम तमुद्देशं स्वसैन्यपरिवारितः

vajro'pi tridaśāñjñātvā devyā sārddhamathopitān| ājagāma tamuddeśaṁ svasainyaparivāritaḥ

वज्र भी देवताओं को देवी सहित वहाँ बसा जानकर, अपनी सेना से घिरा हुआ उस स्थान पर आया।

श्लोक 21 (skanda.5.75.21)

महाकालवने दिव्ये रथकोटिशतैर्वृतः। समंताच्च वनं देवि तत्क्रुद्धो वाक्यमब्रवीत्

mahākālavane divye rathakoṭiśatairvṛtaḥ| samaṁtācca vanaṁ devi tatkruddho vākyamabravīt

दिव्य महाकालवन में करोड़ों रथों से घिरा, वन को चारों ओर से घेरकर, हे देवी, उसने क्रुद्ध होकर यह वचन कहा —

श्लोक 22 (skanda.5.75.22)

अद्य देवान्हनिष्यामि तया साकं सुदुष्टया। कन्याभिः सह या नष्टा तमोमायाबलेन तु

adya devānhaniṣyāmi tayā sākaṁ suduṣṭayā| kanyābhiḥ saha yā naṣṭā tamomāyābalena tu

"आज मैं उस अत्यंत दुष्ट देवी को, तथा उन कन्याओं सहित, जो तमोमाया के बल से लुप्त हो गई थीं, देवताओं समेत मार डालूँगा।"

श्लोक 23 (skanda.5.75.23)

एतस्मिन्नंतरे काले नारदो मुनिसत्तमः। सोत्सुकस्तु समायातो मंदरे चारुकंदरे

etasminnaṁtare kāle nārado munisattamaḥ| sotsukastu samāyāto maṁdare cārukaṁdare

इसी बीच मुनिश्रेष्ठ नारद उत्सुक होकर मंदराचल की सुंदर कंदरा में आ पहुँचे।

श्लोक 24 (skanda.5.75.24)

कथयामास देवानां वज्राद्देवपराभवम्

kathayāmāsa devānāṁ vajrāddevaparābhavam

उन्होंने वज्र द्वारा देवताओं की पराजय का वृत्तांत सुनाया —

श्लोक 25 (skanda.5.75.25)

महाकालवने देव ताडितास्त्रिदशाः प्रभो। वज्रेण रुरुपुत्रेण तस्माद्याहि महेश्वर

mahākālavane deva tāḍitāstridaśāḥ prabho| vajreṇa ruruputreṇa tasmādyāhi maheśvara

"हे प्रभो, महाकालवन में रुरुपुत्र वज्र द्वारा देवता पीड़ित किए गए हैं; अतः, हे महेश्वर, वहाँ जाइए।"

श्लोक 26 (skanda.5.75.26)

नारदस्य वचः श्रुत्वा ततोऽहं परमेश्वरि। मंदरादागतस्तूर्णं कृत्वा रूपं सुभैरवम्

nāradasya vacaḥ śrutvā tato'haṁ parameśvari| maṁdarādāgatastūrṇaṁ kṛtvā rūpaṁ subhairavam

नारद का यह वचन सुनकर, हे परमेश्वरी, तब मैं मंदर से तुरंत अत्यंत भैरव रूप धारण कर वहाँ पहुँचा —

श्लोक 27 (skanda.5.75.27)

सर्पैर्लसद्भिरत्युग्रैर्भीषणैर्गणसंवृतः। अग्रे दृष्टं महत्सैन्यं दानवानां भयावहम्

sarpairlasadbhiratyugrairbhīṣaṇairgaṇasaṁvṛtaḥ| agre dṛṣṭaṁ mahatsainyaṁ dānavānāṁ bhayāvaham

— अत्यंत उग्र, भीषण, फुँफकारते सर्पों से सुशोभित, गणों से घिरा हुआ; आगे मैंने दानवों की वह विशाल, भयंकर सेना देखी।

श्लोक 28 (skanda.5.75.28)

महाकालवनं रुद्धं समंतादसुरेण तु। वज्रेण रुरुपुत्रेण दुःसहेन यशस्विनि

mahākālavanaṁ ruddhaṁ samaṁtādasureṇa tu| vajreṇa ruruputreṇa duḥsahena yaśasvini

महाकालवन को उस दुःसह असुर वज्र, रुरुपुत्र ने, हे यशस्विनी, चारों ओर से घेर रखा था।

श्लोक 29 (skanda.5.75.29)

तदागत्य मया ताड्य रौद्रं डमरुकं तथा। मोहितं सहसा सैन्यं वज्रस्यैव दुरात्मनः

tadāgatya mayā tāḍya raudraṁ ḍamarukaṁ tathā| mohitaṁ sahasā sainyaṁ vajrasyaiva durātmanaḥ

वहाँ पहुँचकर मैंने अपना रौद्र डमरू बजाया; उससे तत्काल उस दुरात्मा वज्र की सेना मोहित हो गई।

श्लोक 30 (skanda.5.75.30)

डमरुकस्य नादेन ह्युत्थितं लिंगमुत्तमम्। विदार्य वसुधां देवि ज्वालामालाकुलं तदा

ḍamarukasya nādena hyutthitaṁ liṁgamuttamam| vidārya vasudhāṁ devi jvālāmālākulaṁ tadā

डमरू के नाद से पृथ्वी को विदीर्ण करता हुआ, हे देवी, ज्वाला-मालाओं से युक्त एक उत्तम लिंग उत्पन्न हुआ।

श्लोक 31 (skanda.5.75.31)

तस्य लिंगस्य च तदा महाज्वाला विनिर्गता। एकदेशाद्वरारोहे ब्रह्मांडव्यापिनी तथा

tasya liṁgasya ca tadā mahājvālā vinirgatā| ekadeśādvarārohe brahmāṁḍavyāpinī tathā

हे वरारोहे, तब उस लिंग के एक भाग से महाज्वाला निकली, जो सारे ब्रह्मांड में व्याप्त हो गई।

श्लोक 32 (skanda.5.75.32)

लिंगस्यान्यप्रदेशात्तु वायुः समभवन्महान्

liṁgasyānyapradeśāttu vāyuḥ samabhavanmahān

लिंग के दूसरे भाग से एक महान वायु उत्पन्न हुआ।

श्लोक 33 (skanda.5.75.33)

तेजोज्वालासमूहेन वातेन प्रेरितेन च। सह चक्रेण तत्सैन्यं दग्धं भस्मत्वमागतम्

tejojvālāsamūhena vātena preritena ca| saha cakreṇa tatsainyaṁ dagdhaṁ bhasmatvamāgatam

उस तेज-ज्वाला-समूह और वेगवान वायु से, तथा चक्र सहित, वह सारी सेना जलकर भस्म हो गई।

श्लोक 34 (skanda.5.75.34)

ततो देवगणाः सर्वे हर्षनिर्भरमानसाः। नमश्चक्रुर्ह ते तस्मिन्रुरुपुत्रे महाबले

tato devagaṇāḥ sarve harṣanirbharamānasāḥ| namaścakrurha te tasminruruputre mahābale

तब सब देवगण हर्ष से भरे मन से, उस स्थान पर, रुरुपुत्र महाबली के इस प्रकार भस्म हो जाने पर प्रणाम करने लगे।

श्लोक 35 (skanda.5.75.35)

अस्य देवस्य माहात्म्याद्दग्धो वज्रो महाबलः। ससैन्योभूत्ततस्तस्मादेष डमरुकेश्वरः। ख्यातिं यास्यति लोकेस्मिन्सर्वकामफलप्रदः

asya devasya māhātmyāddagdho vajro mahābalaḥ| sasainyobhūttatastasmādeṣa ḍamarukeśvaraḥ| khyātiṁ yāsyati lokesminsarvakāmaphalapradaḥ

इस देव की महिमा से महाबली वज्र अपनी सेना सहित भस्म हो गया; अतः तभी से यह डमरुकेश्वर के नाम से इस लोक में विख्यात होगा, सब कामनाओं का फल देने वाला।

श्लोक 36 (skanda.5.75.36)

डमरुकस्य तु नादेन जातो यस्मान्महीतले। अतः पूज्यवरो देवो भविष्यति न संशयः

ḍamarukasya tu nādena jāto yasmānmahītale| ataḥ pūjyavaro devo bhaviṣyati na saṁśayaḥ

चूँकि यह डमरू के नाद से पृथ्वी पर उत्पन्न हुआ, अतः यह देव पूज्यवर होगा, इसमें संदेह नहीं।

श्लोक 37 (skanda.5.75.37)

दृष्ट्वा ये पूजयिष्यंति देवं डमरुकेश्वरम्। ते सर्वे दुःखनिर्मुक्ता भविष्यंति गतज्वराः

dṛṣṭvā ye pūjayiṣyaṁti devaṁ ḍamarukeśvaram| te sarve duḥkhanirmuktā bhaviṣyaṁti gatajvarāḥ

जो दर्शन कर डमरुकेश्वर देव की पूजा करेंगे, वे सब दुःखों से मुक्त होकर ज्वररहित हो जाएँगे।

श्लोक 38 (skanda.5.75.38)

चांद्रायणानां विधिवच्छतानामथ यत्फलम्। तत्फलं समवाप्नोति डमरुकेश्वरपूजनात्

cāṁdrāyaṇānāṁ vidhivacchatānāmatha yatphalam| tatphalaṁ samavāpnoti ḍamarukeśvarapūjanāt

सौ विधिवत चांद्रायण व्रतों का जो फल होता है, वही फल डमरुकेश्वर के पूजन से प्राप्त होता है।

श्लोक 39 (skanda.5.75.39)

अस्मिन्स्थाने स्थितं लिंगं भक्त्या डमरुकेश्वरम्। प्रसंगादपि पश्यंति ह्यपि पापपरा नराः

asminsthāne sthitaṁ liṁgaṁ bhaktyā ḍamarukeśvaram| prasaṁgādapi paśyaṁti hyapi pāpaparā narāḥ

इस स्थान पर स्थित लिंग डमरुकेश्वर को जो पापी मनुष्य भी प्रसंगवश भक्तिपूर्वक देख लेते हैं —

श्लोक 40 (skanda.5.75.40)

तेऽप्यवश्यं तु यास्यंति रुद्रलोकं सनातनम्। भक्ताः स्तोष्यंति ये लिंगं ख्यातं डमरुकेश्वरम्

te'pyavaśyaṁ tu yāsyaṁti rudralokaṁ sanātanam| bhaktāḥ stoṣyaṁti ye liṁgaṁ khyātaṁ ḍamarukeśvaram

— वे भी अवश्य ही सनातन रुद्रलोक को जाते हैं। जो भक्त प्रसिद्ध लिंग डमरुकेश्वर की स्तुति करेंगे —

श्लोक 41 (skanda.5.75.41)

मानसैः पातकैर्मुक्ता यास्यंति परमं पदम्। अश्वमेधसहस्रं तु वाजपेयशतं भवेत्। गोसहस्रफलं चात्र दृष्ट्वा प्राप्स्यंति मानवाः

mānasaiḥ pātakairmuktā yāsyaṁti paramaṁ padam| aśvamedhasahasraṁ tu vājapeyaśataṁ bhavet| gosahasraphalaṁ cātra dṛṣṭvā prāpsyaṁti mānavāḥ

— वे मानसिक पापों से भी मुक्त होकर परम पद को जाएँगे। सहस्र अश्वमेध, सौ वाजपेय और सहस्र गोदान का फल — मनुष्य यहाँ केवल दर्शन से प्राप्त कर लेते हैं।

श्लोक 42 (skanda.5.75.42)

यो याति संगरे धीरो दृष्ट्वा डमरुकेश्वरम्। जयेद्रिपूनथांते स रुद्रलोके महीयते

yo yāti saṁgare dhīro dṛṣṭvā ḍamarukeśvaram| jayedripūnathāṁte sa rudraloke mahīyate

जो धीर पुरुष डमरुकेश्वर का दर्शन कर संग्राम में जाता है, वह शत्रुओं पर विजय पाता है, और अंत में रुद्रलोक में प्रतिष्ठित होता है।

श्लोक 43 (skanda.5.75.43)

एष ते कथितो देवि प्रभावः पापनाशनः। स्तुतस्तु कीर्तितश्चैव सर्वाभीष्टफलप्रदः

eṣa te kathito devi prabhāvaḥ pāpanāśanaḥ| stutastu kīrtitaścaiva sarvābhīṣṭaphalapradaḥ

हे देवी, यह पापनाशक प्रभाव मैंने तुम्हें बताया; स्तुति और कीर्तन करने मात्र से यह सब अभीष्ट फलों को देने वाला है।