भूतनाथेश्वर माहात्म्य

श्लोक 1 (skanda.7.117.1)

ईश्वर उवाच। ततो गच्छेन्महादेवि भूतनाथेश्वरं हरम्। कुण्डेश्वर्या ईशभागे धनुषां विंशकेऽन्तरे॥

īśvara uvāca| tato gacchenmahādevi bhūtanātheśvaraṃ haram| kuṇḍeśvaryā īśabhāge dhanuṣāṃ viṃśake'ntare||

ईश्वर ने कहा—हे महादेवि, उसके पश्चात् हर के भूतनाथेश्वर रूप की ओर जाना चाहिए, जो कुण्डेश्वरी से ईशान दिशा में बीस धनुष की दूरी पर स्थित है।

श्लोक 2 (skanda.7.117.2)

कल्पलिंगं महादेवि ह्यनादिनिधनं स्थितम्। पूर्वं त्रेतायुगे देवि वीरभद्रेश्वरीति च॥

kalpaliṃgaṃ mahādevi hyanādinidhanaṃ sthitam| pūrvaṃ tretāyuge devi vīrabhadreśvarīti ca||

हे महादेवि, यह एक कल्पलिंग है, जो बिना आदि और अन्त के स्थित है; हे देवि, पूर्वकाल में त्रेतायुग में इसका नाम वीरभद्रेश्वरी था।

श्लोक 3 (skanda.7.117.3)

प्रख्यातं भुवि देवेशि कलौ भूतेश्वरं स्मृतम्। पुरा द्वापरसंधौ च तत्र भूतानि कोटिशः॥

prakhyātaṃ bhuvi deveśi kalau bhūteśvaraṃ smṛtam| purā dvāparasaṃdhau ca tatra bhūtāni koṭiśaḥ||

हे देवेशि, कलियुग में यह पृथ्वी पर भूतेश्वर के नाम से प्रसिद्ध और स्मरण किया जाता है; प्राचीन काल में द्वापर के संधिकाल में वहाँ करोड़ों भूतगण ने,

श्लोक 4 (skanda.7.117.4)

संसिद्धिं परमां जग्मुस्तल्लिंगस्य प्रभावतः। तेन भूतेश्वरं नाम प्रख्यातं धरणीतले॥

saṃsiddhiṃ paramāṃ jagmustalliṃgasya prabhāvataḥ| tena bhūteśvaraṃ nāma prakhyātaṃ dharaṇītale||

उस लिंग के प्रभाव से परम सिद्धि को प्राप्त किया; इसीलिए पृथ्वी पर उसका नाम भूतेश्वर विख्यात हुआ।

श्लोक 5 (skanda.7.117.5)

तत्र कृष्णचतुर्द्दश्यां रात्रौ संपूज्य शंकरम्। दक्षिणां दिशमाश्रित्य अघोरं पूजयेत्तु यः॥

tatra kṛṣṇacaturddaśyāṃ rātrau saṃpūjya śaṃkaram| dakṣiṇāṃ diśamāśritya aghoraṃ pūjayettu yaḥ||

जो कृष्णपक्ष की चतुर्दशी की रात्रि में वहाँ शंकर की पूजा करके, दक्षिण दिशा का आश्रय लेकर अघोर स्वरूप की पूजा करता है,

श्लोक 6 (skanda.7.117.6)

दृढं जितेन्द्रियो भूत्वा निर्भयो ध्यानसंयु तः। तस्यैव जायते सिद्धिर्या काचिद्भूतले स्थिता॥

dṛḍhaṃ jitendriyo bhūtvā nirbhayo dhyānasaṃyu taḥ| tasyaiva jāyate siddhiryā kācidbhūtale sthitā||

दृढतापूर्वक जितेन्द्रिय, निर्भय और ध्यान में संयुक्त होकर—उसी को पृथ्वी पर जो भी सिद्धि विद्यमान है, वह प्राप्त होती है।

श्लोक 7 (skanda.7.117.7)

तिलहेमप्रदानं च पिण्डदानं च तत्र वै। पितॄनुद्दिश्य दद्याद्वै तेषां प्रेतत्वमुक्तये॥

tilahemapradānaṃ ca piṇḍadānaṃ ca tatra vai| pitṝnuddiśya dadyādvai teṣāṃ pretatvamuktaye||

वहाँ पितरों को लक्ष्य करके तिल और सुवर्ण का दान तथा पिण्डदान करना चाहिए, जिससे वे प्रेतत्व से मुक्त हो जाएँ।

श्लोक 8 (skanda.7.117.8)

इति निगदितमेतद्भूतनाथेश्वरस्य प्रचुरकलिमलानां नाशनं पुण्यहेतुः। पठति च पुरुषो वा यः शृणोतीह भक्त्या सुरवरमहिमानं मुच्यते पातकौघैः॥

iti nigaditametadbhūtanātheśvarasya pracurakalimalānāṃ nāśanaṃ puṇyahetuḥ| paṭhati ca puruṣo vā yaḥ śṛṇotīha bhaktyā suravaramahimānaṃ mucyate pātakaughaiḥ||

इस प्रकार भूतनाथेश्वर का यह वृत्तान्त कहा गया, जो कलियुग के प्रचुर पापों का नाशक और पुण्य का हेतु है। जो पुरुष भक्तिपूर्वक इस श्रेष्ठ देव के माहात्म्य को पढ़ता या सुनता है, वह पापों के समूह से मुक्त हो जाता है।