चित्रादित्यमाहात्म्यवर्णनम्

श्लोक 1 (skanda.7.139.1)

ईश्वर उवाच। ततो गच्छेन्महादेवि चित्रादित्यमनुत्तमम्। तस्यैव दक्षिणे भागे ब्रह्मकुण्डसमीपतः

īśvara uvāca| tato gacchenmahādevi citrādityamanuttamam| tasyaiva dakṣiṇe bhāge brahmakuṇḍasamīpataḥ

ईश्वर ने कहा—हे महादेवि, तत्पश्चात् उस अनुपम चित्रादित्य के पास जाना चाहिए, जो उसी क्षेत्र के दक्षिण भाग में ब्रह्मकुण्ड के समीप है।

श्लोक 2 (skanda.7.139.2)

महाप्रभावो देवेशि सर्वदारिद्र्यनाशनः। मित्रो नाम पुरा देवि धर्मात्माऽभूद्धरातले। कायस्थः सर्वभूतानां नित्यं भूतहिते रतः

mahāprabhāvo deveśi sarvadāridryanāśanaḥ| mitro nāma purā devi dharmātmā'bhūddharātale| kāyasthaḥ sarvabhūtānāṁ nityaṁ bhūtahite rataḥ

हे देवेशि, वह अत्यन्त प्रभावशाली और सब दरिद्रता का नाश करने वाला है। हे देवि, प्राचीन काल में इस पृथ्वी पर मित्र नामक एक धर्मात्मा कायस्थ हुआ, जो सदा समस्त प्राणियों के हित में रत रहता था।

श्लोक 3 (skanda.7.139.3)

तस्यापत्यद्वयं जज्ञे ऋतुकालाभिगामिनः। पुत्रः परमतेजस्वी चित्रो नाम वरानने

tasyāpatyadvayaṁ jajñe ṛtukālābhigāminaḥ| putraḥ paramatejasvī citro nāma varānane

हे वरानने, ऋतुकाल में ही पत्नी के पास जाने वाले उस मित्र के दो सन्तानें उत्पन्न हुईं—एक अत्यन्त तेजस्वी पुत्र, जिसका नाम चित्र था,

श्लोक 4 (skanda.7.139.4)

तथा चित्राऽभवत्कन्या रूपाढ्या शीलमण्डना

tathā citrā'bhavatkanyā rūpāḍhyā śīlamaṇḍanā

तथा एक कन्या हुई, जिसका नाम चित्रा था, जो रूप से सम्पन्न और शील से विभूषित थी।

श्लोक 5 (skanda.7.139.5)

आभ्यां तु जातमात्राभ्यां मित्रः पञ्चत्वमेयिवान्। अथ तस्य वरा भार्या सह तेनाग्निमाविशत्

ābhyāṁ tu jātamātrābhyāṁ mitraḥ pañcatvameyivān| atha tasya varā bhāryā saha tenāgnimāviśat

इन दोनों के जन्म लेते ही मित्र की मृत्यु हो गई; तब उसकी उत्तम पत्नी उसके साथ अग्नि में प्रविष्ट हो गई।

श्लोक 6 (skanda.7.139.6)

अथ तौ बालकौ दीनावृषिभिः परिपालितौ। वृद्धिं गतौ महारण्ये बालावेव स्थितौ व्रते

atha tau bālakau dīnāvṛṣibhiḥ paripālitau| vṛddhiṁ gatau mahāraṇye bālāveva sthitau vrate

तब उन दोनों अनाथ बालकों का पालन ऋषियों ने किया; वे महावन में बड़े हुए और बाल्यावस्था में ही व्रत में स्थित रहे।

श्लोक 7 (skanda.7.139.7)

प्रभासं क्षेत्रमासाद्य तपः परममास्थितौ। प्रतिष्ठाप्य महादेवं भास्करं वारितस्करम्

prabhāsaṁ kṣetramāsādya tapaḥ paramamāsthitau| pratiṣṭhāpya mahādevaṁ bhāskaraṁ vāritaskaram

प्रभासक्षेत्र में पहुँचकर उन दोनों ने परम तप का आश्रय लिया और चोरों को दूर रखने वाले महादेव भास्कर की प्रतिष्ठा की।

श्लोक 8 (skanda.7.139.8)

पूजयामास धर्मात्मा धूपमाल्यानुलेपनैः। वसिष्ठकथितैश्चैव ह्यष्टषष्टिसमन्वितैः। नामभिः सूर्यदेवेशं तुष्टाव प्राञ्जलिः प्रभुम्

pūjayāmāsa dharmātmā dhūpamālyānulepanaiḥ| vasiṣṭhakathitaiścaiva hyaṣṭaṣaṣṭisamanvitaiḥ| nāmabhiḥ sūryadeveśaṁ tuṣṭāva prāñjaliḥ prabhum

उस धर्मात्मा ने धूप, माला और अनुलेपन से उनकी पूजा की, और हाथ जोड़कर वसिष्ठ द्वारा कहे गये अड़सठ नामों से देवाधिदेव सूर्य प्रभु को प्रसन्न किया।

श्लोक 9 (skanda.7.139.9)

चित्र उवाच। प्रणम्य शिरसा देवं भास्करं गगनाधिपम्। आदिदेवं जगन्नाथं पापघ्नं रोगनाशनम्

citra uvāca| praṇamya śirasā devaṁ bhāskaraṁ gaganādhipam| ādidevaṁ jagannāthaṁ pāpaghnaṁ roganāśanam

चित्र ने कहा—आकाश के स्वामी, आदिदेव, जगन्नाथ, पापों का नाश करने वाले तथा रोगों को दूर करने वाले भास्कर देव को शिर से प्रणाम करके,

श्लोक 10 (skanda.7.139.10)

सहस्राक्षं सहस्रांशुं सहस्रकिरणद्युतिम्

sahasrākṣaṁ sahasrāṁśuṁ sahasrakiraṇadyutim

जो सहस्र नेत्रों वाला, सहस्र किरणों वाला तथा सहस्र किरणों की द्युति से युक्त है,

श्लोक 11 (skanda.7.139.11)

तमहं संस्तविष्यामि संपृक्तं गुह्यनामभिः। मुण्डीरस्वामिनं प्रातर्गंगासागरसंगमे। कालप्रियं तु मध्याह्ने यमुनातीरमाश्रितम्

tamahaṁ saṁstaviṣyāmi saṁpṛktaṁ guhyanāmabhiḥ| muṇḍīrasvāminaṁ prātargaṁgāsāgarasaṁgame| kālapriyaṁ tu madhyāhne yamunātīramāśritam

उसकी मैं गुह्य नामों सहित स्तुति करूँगा—गंगा-सागर के संगम पर प्रातःकाल मुण्डीरस्वामी रूप में, मध्याह्न में यमुना के तट पर आश्रित कालप्रिय रूप में,

श्लोक 12 (skanda.7.139.12)

मूलस्थानं चास्तमने चन्द्रभागातटे स्थितम्। यत्र सांबः स्वयं सिद्ध उपवासपरायणः

mūlasthānaṁ cāstamane candrabhāgātaṭe sthitam| yatra sāṁbaḥ svayaṁ siddha upavāsaparāyaṇaḥ

सायंकाल चन्द्रभागा के तट पर स्थित मूलस्थान रूप में, जहाँ उपवासपरायण साम्ब स्वयं सिद्ध हुए थे;

श्लोक 13 (skanda.7.139.13)

वाराणस्यां लोहिताक्षं गोभिलाक्षे बृहन्मुखम्। प्रयागेषु प्रतिष्ठानं वृद्धादित्यं महाद्युतिम्

vārāṇasyāṁ lohitākṣaṁ gobhilākṣe bṛhanmukham| prayāgeṣu pratiṣṭhānaṁ vṛddhādityaṁ mahādyutim

वाराणसी में लोहिताक्ष रूप में, गोभिलाक्ष में बृहन्मुख रूप में, प्रयाग में प्रतिष्ठान रूप में, महाद्युति वृद्धादित्य रूप में;

श्लोक 14 (skanda.7.139.14)

कोट्यक्षे द्वादशादित्यं गंगादित्यं चतुर्घटे। नैमिषे चैव गोघ्ने च भद्रं भद्रपुटे स्थितम्

koṭyakṣe dvādaśādityaṁ gaṁgādityaṁ caturghaṭe| naimiṣe caiva goghne ca bhadraṁ bhadrapuṭe sthitam

कोट्यक्ष में द्वादशादित्य रूप में, चतुर्घट में गंगादित्य रूप में, नैमिष और गोघ्न में, तथा भद्रपुट में स्थित भद्र रूप में;

श्लोक 15 (skanda.7.139.15)

जयायां विजयादित्यं प्रभासे स्वर्णवेतसम्। कुरुक्षेत्रे च सामन्तं त्रिमन्त्रं च इलावृते

jayāyāṁ vijayādityaṁ prabhāse svarṇavetasam| kurukṣetre ca sāmantaṁ trimantraṁ ca ilāvṛte

जया में विजयादित्य रूप में, प्रभास में स्वर्णवेतस रूप में, कुरुक्षेत्र में सामन्त रूप में, इलावृत में त्रिमन्त्र रूप में;

श्लोक 16 (skanda.7.139.16)

महेन्द्रे क्रमणादित्यमृणे सिद्धेश्वरं विदुः। कौशाम्ब्यां पद्मबोधं च ब्रह्मबाहौ दिवाकरम्

mahendre kramaṇādityamṛṇe siddheśvaraṁ viduḥ| kauśāmbyāṁ padmabodhaṁ ca brahmabāhau divākaram

महेन्द्र में क्रमणादित्य, ऋण में सिद्धेश्वर—ऐसा जानना चाहिए; कौशाम्बी में पद्मबोध रूप में, ब्रह्मबाहु में दिवाकर रूप में;

श्लोक 17 (skanda.7.139.17)

केदारे चण्डकान्तिं च नित्ये च तिमिरापहम्। गंगामार्गे शिवद्वारमादित्यं भूप्रदीपने

kedāre caṇḍakāntiṁ ca nitye ca timirāpaham| gaṁgāmārge śivadvāramādityaṁ bhūpradīpane

केदार में चण्डकान्ति रूप में, नित्य में तिमिरापह रूप में, गंगामार्ग में शिवद्वार रूप में, भूप्रदीपन में केवल आदित्य रूप में;

श्लोक 18 (skanda.7.139.18)

हंसं सरस्वतीतीरे विश्वामित्रं पृथूदके। उज्जयिन्यां नरद्वीपं सिद्धायाममलद्युतिम्

haṁsaṁ sarasvatītīre viśvāmitraṁ pṛthūdake| ujjayinyāṁ naradvīpaṁ siddhāyāmamaladyutim

सरस्वती के तट पर हंस रूप में, पृथूदक में विश्वामित्र रूप में, उज्जयिनी में नरद्वीप रूप में, सिद्धा में निर्मल द्युति वाले रूप में;

श्लोक 19 (skanda.7.139.19)

सूर्यं कुन्तीकुमारे च पञ्चनद्यां विभावसुम्। मथुरायां विमलादित्यं संज्ञादित्यं तु संज्ञिके

sūryaṁ kuntīkumāre ca pañcanadyāṁ vibhāvasum| mathurāyāṁ vimalādityaṁ saṁjñādityaṁ tu saṁjñike

कुन्तीकुमार में सूर्य रूप में, पञ्चनदी में विभावसु रूप में, मथुरा में विमलादित्य रूप में, संज्ञिक में संज्ञादित्य रूप में;

श्लोक 20 (skanda.7.139.20)

श्रीकण्ठे चैव मार्तण्डं दशार्णे दशकं स्मृतम्। गोधने गोपतिं देवं कर्णं चैव मरुस्थले

śrīkaṇṭhe caiva mārtaṇḍaṁ daśārṇe daśakaṁ smṛtam| godhane gopatiṁ devaṁ karṇaṁ caiva marusthale

श्रीकण्ठ में मार्तण्ड रूप में, दशार्ण में दशक नाम से स्मृत, गोधन में गोपति देव रूप में, मरुस्थल में कर्ण रूप में;

श्लोक 21 (skanda.7.139.21)

पुष्पं देवपुरे चैव केशवार्कं तु लोहिते। वैदिशे चैव शार्दूलं शोणे वारुणवासिनम्

puṣpaṁ devapure caiva keśavārkaṁ tu lohite| vaidiśe caiva śārdūlaṁ śoṇe vāruṇavāsinam

देवपुर में पुष्प रूप में, लोहित में केशवार्क रूप में, वैदिश में शार्दूल रूप में, शोण में वारुणवासी रूप में;

श्लोक 22 (skanda.7.139.22)

वर्धमाने च सांबाख्यं कामरूपे शुभङ्करम्। मिहिरं कान्यकुब्जे च मन्दारं पुण्यवर्धने

vardhamāne ca sāṁbākhyaṁ kāmarūpe śubhaṅkaram| mihiraṁ kānyakubje ca mandāraṁ puṇyavardhane

वर्धमान में साम्ब नाम से, कामरूप में शुभंकर रूप में, कान्यकुब्ज में मिहिर रूप में, पुण्यवर्धन में मन्दार रूप में;

श्लोक 23 (skanda.7.139.23)

गन्धारे क्षोभणादित्यं लंकायाममरद्युतिम्। कर्णादित्यं च चम्पायां प्रबोधे शुभदर्शिनम्

gandhāre kṣobhaṇādityaṁ laṁkāyāmamaradyutim| karṇādityaṁ ca campāyāṁ prabodhe śubhadarśinam

गन्धार में क्षोभणादित्य रूप में, लंका में अमरद्युति रूप में, चम्पा में कर्णादित्य रूप में, प्रबोध में शुभदर्शी रूप में;

श्लोक 24 (skanda.7.139.24)

द्वारावत्यां तु पार्वत्यं हिमवन्ते हिमापहम्। महातेजं तु लौहित्ये अमलाङ्गे च धूजटिम्

dvāravatyāṁ tu pārvatyaṁ himavante himāpaham| mahātejaṁ tu lauhitye amalāṅge ca dhūjaṭim

द्वारावती में पार्वत्य रूप में, हिमवन्त में हिमापह रूप में, लौहित्य में महातेज रूप में, अमलांग में धूजटि रूप में;

श्लोक 25 (skanda.7.139.25)

रोहिके तु कुमाराख्यं पद्मायां पद्मसंभवम्। धर्मादित्यं तु लाटायां मर्दके स्थविरं विदुः

rohike tu kumārākhyaṁ padmāyāṁ padmasaṁbhavam| dharmādityaṁ tu lāṭāyāṁ mardake sthaviraṁ viduḥ

रोहिक में कुमार नाम से, पद्मा में पद्मसंभव रूप में, लाट में धर्मादित्य रूप में, मर्दक में स्थविर रूप में—ऐसा जानना चाहिए;

श्लोक 26 (skanda.7.139.26)

सुखप्रदं तु कौबेर्यां कोसले गोपतिं तथा। कौङ्कणे तु पद्मदेवं तापनं विन्ध्यपर्वते

sukhapradaṁ tu kauberyāṁ kosale gopatiṁ tathā| kauṅkaṇe tu padmadevaṁ tāpanaṁ vindhyaparvate

कौबेरी में सुखप्रद रूप में, कोसल में गोपति रूप में, कोंकण में पद्मदेव रूप में, विन्ध्य पर्वत पर तापन रूप में;

श्लोक 27 (skanda.7.139.27)

त्वष्टारं चैव काश्मीरे चरित्रे रत्नसंभवम्। पुष्करे हेमगर्भस्थं विद्यात्सूर्यं गभस्तिके

tvaṣṭāraṁ caiva kāśmīre caritre ratnasaṁbhavam| puṣkare hemagarbhasthaṁ vidyātsūryaṁ gabhastike

काश्मीर में त्वष्टा रूप में, चरित्र में रत्नसंभव रूप में, पुष्कर में हेमगर्भस्थ रूप में, तथा गभस्तिक में केवल सूर्य रूप में जानना चाहिए;

श्लोक 28 (skanda.7.139.28)

प्रकाशायां तु मुज्झालं तीर्थग्रामे प्रभाकरम्। काम्पिल्ये रिल्लकादित्यं धनके धनवासिनम्

prakāśāyāṁ tu mujjhālaṁ tīrthagrāme prabhākaram| kāmpilye rillakādityaṁ dhanake dhanavāsinam

प्रकाशा में मुज्झाल रूप में, तीर्थग्राम में प्रभाकर रूप में, काम्पिल्य में रिल्लकादित्य रूप में, धनक में धनवासी रूप में;

श्लोक 29 (skanda.7.139.29)

अनलं नर्मदातीरे सर्वत्र गमनाधिकम्। अष्टषष्टिं तु देवस्य भास्करस्यामितद्युतेः

analaṁ narmadātīre sarvatra gamanādhikam| aṣṭaṣaṣṭiṁ tu devasya bhāskarasyāmitadyuteḥ

और नर्मदा के तट पर अनल रूप में, जो सर्वत्र सबसे आगे गति रखता है—इस प्रकार अमित द्युति वाले भास्कर देव के अड़सठ नाम मैंने कहे।

श्लोक 30 (skanda.7.139.30)

प्रातरुत्थाय वै नित्यं शक्तिमाञ्छुचिमान्नरः। यः पठेच्छृणुयाद्वापि सर्वपापैः प्रमुच्यते

prātarutthāya vai nityaṁ śaktimāñchucimānnaraḥ| yaḥ paṭhecchṛṇuyādvāpi sarvapāpaiḥ pramucyate

प्रतिदिन प्रातःकाल उठकर जो समर्थ और पवित्र मनुष्य इन नामों का पाठ करता है अथवा सुनता भी है, वह समस्त पापों से मुक्त हो जाता है।

श्लोक 31 (skanda.7.139.31)

राज्यार्थी लभते राज्यं धनार्थी लभते धनम्। पुत्रार्थी लभते पुत्रान्सौख्यार्थी लभते सुखम्

rājyārthī labhate rājyaṁ dhanārthī labhate dhanam| putrārthī labhate putrānsaukhyārthī labhate sukham

राज्य चाहने वाला राज्य पाता है, धन चाहने वाला धन पाता है, पुत्र चाहने वाला पुत्र पाता है, सुख चाहने वाला सुख पाता है।

श्लोक 32 (skanda.7.139.32)

रोगार्तो मुच्यते रोगाद्बद्धो मुच्येत बन्धनात्। यान्यान्प्रार्थयते कामांस्तांस्तान्प्राप्नोति मानवः

rogārto mucyate rogādbaddho mucyeta bandhanāt| yānyānprārthayate kāmāṁstāṁstānprāpnoti mānavaḥ

रोग से पीड़ित रोग से मुक्त होता है, बन्दी बन्धन से मुक्त होता है; मनुष्य जिन-जिन कामनाओं की प्रार्थना करता है, उन-उन सबको प्राप्त करता है।

श्लोक 33 (skanda.7.139.33)

ईश्वर उवाच। एवं च स्तुवतस्तस्य चित्रस्य विमलात्मनः। ततस्तुष्टः सहस्रांशुः कालेन महता विभुः

īśvara uvāca| evaṁ ca stuvatastasya citrasya vimalātmanaḥ| tatastuṣṭaḥ sahasrāṁśuḥ kālena mahatā vibhuḥ

ईश्वर ने कहा—इस प्रकार स्तुति करते हुए उस निर्मल आत्मा चित्र से दीर्घकाल पश्चात् प्रभु सहस्रांशु (सूर्य) प्रसन्न हुए।

श्लोक 34 (skanda.7.139.34)

अब्रवीद्वत्स भद्रं ते वरं वरय सुव्रत

abravīdvatsa bhadraṁ te varaṁ varaya suvrata

उसने कहा—हे वत्स, हे सुव्रत, तुम्हारा कल्याण हो; वर माँगो।

श्लोक 35 (skanda.7.139.35)

सोऽब्रवीद्यदि मे तुष्टो भगवंस्तीक्ष्णदीधितेः। प्रौढत्वं सर्वकार्येषु नय मां ज्ञानितां तथा

so'bravīdyadi me tuṣṭo bhagavaṁstīkṣṇadīdhiteḥ| prauḍhatvaṁ sarvakāryeṣu naya māṁ jñānitāṁ tathā

उसने कहा—हे तीक्ष्णकिरण भगवन्, यदि आप मुझसे प्रसन्न हैं, तो मुझे समस्त कार्यों में प्रौढ़ता तथा ज्ञान की ओर ले चलिए।

श्लोक 36 (skanda.7.139.36)

तत्तथेति प्रतिज्ञातं सूर्येण वरवर्णिनि। ततः सर्वज्ञतां प्राप्तश्चित्रो मित्रकुलोद्भवः

tattatheti pratijñātaṁ sūryeṇa varavarṇini| tataḥ sarvajñatāṁ prāptaścitro mitrakulodbhavaḥ

हे वरवर्णिनि, सूर्य ने 'तथास्तु' कहकर प्रतिज्ञा की; तब मित्र के कुल में उत्पन्न चित्र को सर्वज्ञता प्राप्त हुई।

श्लोक 37 (skanda.7.139.37)

तं ज्ञात्वा धर्मराजस्तु बुद्ध्या परमया युतम्। चिन्तयामास मेधावी लेखकोऽयं भवेद्यदि

taṁ jñātvā dharmarājastu buddhyā paramayā yutam| cintayāmāsa medhāvī lekhako'yaṁ bhavedyadi

उसे परम बुद्धि से युक्त जानकर बुद्धिमान् धर्मराज ने विचार किया—यदि यह मेरा लेखक बन जाए,

श्लोक 38 (skanda.7.139.38)

ततो मे सर्वसिद्धिः स्यान्निर्वृतिश्च परा भवेत्। एवं चिन्तयतस्तस्य धर्मराजस्य भामिनि

tato me sarvasiddhiḥ syānnirvṛtiśca parā bhavet| evaṁ cintayatastasya dharmarājasya bhāmini

तो मुझे सर्व सिद्धि प्राप्त हो जाए और परम शान्ति भी हो।' हे भामिनि, धर्मराज जब इस प्रकार सोच ही रहे थे,

श्लोक 39 (skanda.7.139.39)

अग्नितीर्थे गते चित्रे स्नानार्थं लवणाम्भसि। स तत्र प्रविशन्नेव नीतस्तु यमकिङ्करैः

agnitīrthe gate citre snānārthaṁ lavaṇāmbhasi| sa tatra praviśanneva nītastu yamakiṅkaraiḥ

चित्र अग्नितीर्थ के खारे जल में स्नान के लिए गया, और वहाँ प्रवेश करते ही उसे यम के किंकर ले गये,

श्लोक 40 (skanda.7.139.40)

सशरीरो महादेवि यमादेशपरायणैः। स चित्रगुप्तनामाऽभूद्विश्वचारित्रलेखकः

saśarīro mahādevi yamādeśaparāyaṇaiḥ| sa citraguptanāmā'bhūdviśvacāritralekhakaḥ

हे महादेवि, यम की आज्ञा के पालन में तत्पर उन किंकरों द्वारा वह सशरीर ही ले जाया गया; और वह समस्त संसार के कर्मों का लेखक चित्रगुप्त नाम से प्रसिद्ध हुआ।

श्लोक 41 (skanda.7.139.41)

चित्रादित्येति नामाऽभूत्ततो लोके वरानने

citrādityeti nāmā'bhūttato loke varānane

हे वरानने, तभी से संसार में उस लिंग का नाम चित्रादित्य पड़ा।

श्लोक 42 (skanda.7.139.42)

सप्तम्यां नियताहारो यस्तं पूजयते नरः। सप्त जन्मानि दारिद्र्यं न दुःखं तस्य जायते

saptamyāṁ niyatāhāro yastaṁ pūjayate naraḥ| sapta janmāni dāridryaṁ na duḥkhaṁ tasya jāyate

जो मनुष्य संयमित आहार रखकर सप्तमी को उसकी पूजा करता है, उसे सात जन्मों तक न दरिद्रता होती है, न दुःख।

श्लोक 43 (skanda.7.139.43)

तत्रैव चाश्वो दातव्यः सकोषं खड्गमेव च। हिरण्यं चैव विप्राय एवं यात्राफलं लभेत्

tatraiva cāśvo dātavyaḥ sakoṣaṁ khaḍgameva ca| hiraṇyaṁ caiva viprāya evaṁ yātrāphalaṁ labhet

वहीं एक अश्व, म्यान सहित एक तलवार, तथा ब्राह्मण को स्वर्ण देना चाहिए; इस प्रकार यात्रा का फल प्राप्त होता है।