ब्रह्मेश्वर, मोक्षेश्वर और गर्भेश्वर का माहात्म्य

श्लोक 1 (skanda.1.91.1)

॥नारद उवाच॥ अतः परं प्रवक्ष्यामि ब्रह्मेशं लिंगमुत्तमम्॥ यस्य स्मरणमात्रेण वाजपेयफलं भवेत्

nārada uvāca ataḥ paraṁ pravakṣyāmi brahmeśaṁ liṁgamuttamam yasya smaraṇamātreṇa vājapeyaphalaṁ bhavet

नारद ने कहा — अब इसके आगे मैं उत्तम ब्रह्मेश लिंग का वर्णन करूँगा, जिसके स्मरणमात्र से वाजपेय यज्ञ का फल प्राप्त होता है।

श्लोक 2 (skanda.1.91.2)

एकदा तु पुरा पार्थ सृष्टि कामेन ब्रह्मणा॥ तपः सुचरितं घोरं सार्धवर्षसहस्रकम्

ekadā tu purā pārtha sṛṣṭi kāmena brahmaṇā tapaḥ sucaritaṁ ghoraṁ sārdhavarṣasahasrakam

एक बार, हे पार्थ, प्राचीन काल में सृष्टि की कामना करने वाले ब्रह्मा ने डेढ़ हजार वर्षों तक घोर तप भलीभाँति किया।

श्लोक 3 (skanda.1.91.3)

तपसा तेन सन्तुष्टः पार्वतीपतिशंकरः॥ वरमस्मै ततः प्रादाल्लोककर्त्रे स्ववांछितम्

tapasā tena santuṣṭaḥ pārvatīpatiśaṁkaraḥ varamasmai tataḥ prādāllokakartre svavāṁchitam

उस तप से संतुष्ट होकर पार्वतीपति शंकर ने तब लोककर्ता ब्रह्मा को उनकी इच्छित वस्तु का वर दिया।

श्लोक 4 (skanda.1.91.4)

ततो हृष्टः प्रमुदितः कृतकृत्यः पितामहः॥ ज्ञात्वा क्षेत्रस्य माहात्म्यं स्वयं लिंगं चकार ह

tato hṛṣṭaḥ pramuditaḥ kṛtakṛtyaḥ pitāmahaḥ jñātvā kṣetrasya māhātmyaṁ svayaṁ liṁgaṁ cakāra ha

तब हर्षित, प्रमुदित और कृतकृत्य हुए पितामह ने इस क्षेत्र की महिमा को जानकर स्वयं एक लिंग का निर्माण किया।

श्लोक 5 (skanda.1.91.5)

चखान च सरः पुण्यं नाम्ना ब्रह्मसरः शुभम॥ महीनगरकात्पूर्वे महापातकनाशनम्

cakhāna ca saraḥ puṇyaṁ nāmnā brahmasaraḥ śubhama mahīnagarakātpūrve mahāpātakanāśanam

और उन्होंने महीनगरक के पूर्व में एक पवित्र, शुभ सरोवर खोदा, जिसका नाम ब्रह्मसर है और जो महापातकों का नाश करने वाला है।

श्लोक 6 (skanda.1.91.6)

अस्य तीरे महालिंगं स्थापयामास वै विभुः॥ तत्र देवः स्वयं साक्षाद्विद्यते किल शंकरः

asya tīre mahāliṁgaṁ sthāpayāmāsa vai vibhuḥ tatra devaḥ svayaṁ sākṣādvidyate kila śaṁkaraḥ

इसके तट पर उन विभु ने महालिंग की स्थापना की; वहाँ स्वयं साक्षात् देव शंकर विद्यमान हैं।

श्लोक 7 (skanda.1.91.7)

पुष्करादधिकं तीर्थं ब्रह्मेशंनाम फाल्गुन॥ तत्र स्नात्वा नरो भक्त्या पिण्डदानं समाचरेत्

puṣkarādadhikaṁ tīrthaṁ brahmeśaṁnāma phālguna tatra snātvā naro bhaktyā piṇḍadānaṁ samācaret

हे फाल्गुन, ब्रह्मेश नामक यह तीर्थ पुष्कर से भी बढ़कर है; वहाँ स्नान कर मनुष्य भक्तिपूर्वक पिंडदान करे।

श्लोक 8 (skanda.1.91.8)

दानं चैव यथाशक्त्या कार्तिक्यां च विशेषतः॥ देवं प्रपूजयेद्भक्त्या ब्रह्मेशं हृष्टमानसः

dānaṁ caiva yathāśaktyā kārtikyāṁ ca viśeṣataḥ devaṁ prapūjayedbhaktyā brahmeśaṁ hṛṣṭamānasaḥ

—और यथाशक्ति दान दे, विशेष रूप से कार्तिक मास में, तथा हर्षित मन से भक्तिपूर्वक ब्रह्मेश देव की पूजा करे—

श्लोक 9 (skanda.1.91.9)

पितरस्तस्य तुष्यंति यावदाभूतसंप्लवम्॥ पुष्करेषु च यत्पुण्यं कुरुक्षेत्रे रविग्रहे

pitarastasya tuṣyaṁti yāvadābhūtasaṁplavam puṣkareṣu ca yatpuṇyaṁ kurukṣetre ravigrahe

—उसके पितर प्रलय-पर्यंत तृप्त रहते हैं। पुष्कर में जो पुण्य है, कुरुक्षेत्र में सूर्यग्रहण के समय जो पुण्य है,

श्लोक 10 (skanda.1.91.10)

गंगादिपुण्यतीर्थेषु यत्फलं प्राप्यते नरैः॥ तत्फलं समवाप्नोति तीर्थस्यास्यावगाहनात्

gaṁgādipuṇyatīrtheṣu yatphalaṁ prāpyate naraiḥ tatphalaṁ samavāpnoti tīrthasyāsyāvagāhanāt

—तथा गंगा आदि पुण्यतीर्थों में मनुष्यों को जो फल प्राप्त होता है — वह सारा फल इस तीर्थ में स्नान करने से प्राप्त हो जाता है।

श्लोक 11 (skanda.1.91.11)

मोक्षलिंगस्य माहात्म्यं शृणु पार्थ महाद्भुतम्॥ मया स्थानहितार्थं च समाराध्य महेश्वरम्

mokṣaliṁgasya māhātmyaṁ śṛṇu pārtha mahādbhutam mayā sthānahitārthaṁ ca samārādhya maheśvaram

हे पार्थ, मोक्षलिंग की अत्यंत अद्भुत महिमा सुनो। मैंने इस स्थान के हित के लिए महेश्वर की आराधना करके—

श्लोक 12 (skanda.1.91.12)

स्थापितं प्रवरं लिंगं नाम्ना मोक्षेश्वरं हरम्॥ दर्भाग्रेण ततः पार्थ कूपं खनितवानहम्

sthāpitaṁ pravaraṁ liṁgaṁ nāmnā mokṣeśvaraṁ haram darbhāgreṇa tataḥ pārtha kūpaṁ khanitavānaham

—मोक्षेश्वर हर नामक यह उत्तम लिंग स्थापित किया गया। फिर, हे पार्थ, मैंने दर्भ की नोक से एक कूप खोदा।

श्लोक 13 (skanda.1.91.13)

प्रसाद्य लोककर्तारं ब्रह्माणं परमेष्ठिनम्॥ कमण्डलोर्ब्रह्मणश्च समानीता सरस्वती

prasādya lokakartāraṁ brahmāṇaṁ parameṣṭhinam kamaṇḍalorbrahmaṇaśca samānītā sarasvatī

लोककर्ता परमेष्ठी ब्रह्मा को प्रसन्न कर, ब्रह्मा के कमंडल से सरस्वती को यहाँ लाया गया।

श्लोक 14 (skanda.1.91.14)

कूपेऽस्मिन्मोक्षनाथस्य लोकानां प्रेतमुक्तये॥ कार्तिकस्य तु मासस्य शुक्लपक्षे चतुर्दशी

kūpe'sminmokṣanāthasya lokānāṁ pretamuktaye kārtikasya tu māsasya śuklapakṣe caturdaśī

मोक्षनाथ के इस कूप में, लोगों के प्रेतत्व से मुक्ति के लिए — कार्तिक मास के शुक्ल पक्ष की चतुर्दशी को,

श्लोक 15 (skanda.1.91.15)

कूपे स्नात्वा नरस्तस्यां तिलपिण्डं समाचरेत्॥ प्रेतानुद्दिश्य नियतं मोक्षतीर्थफलं भवेत्

kūpe snātvā narastasyāṁ tilapiṇḍaṁ samācaret pretānuddiśya niyataṁ mokṣatīrthaphalaṁ bhavet

—उस दिन कूप में स्नान कर मनुष्य तिल का पिंड बनाए, प्रेतों के उद्देश्य से; इससे निश्चित रूप से मोक्षतीर्थ का फल प्राप्त होता है।

श्लोक 16 (skanda.1.91.16)

कुले न जायते तस्य प्रेतः पार्थ न संशयः॥ प्रेता मोक्षं प्रगच्छन्ति तीर्थस्यास्य प्रभावतः

kule na jāyate tasya pretaḥ pārtha na saṁśayaḥ pretā mokṣaṁ pragacchanti tīrthasyāsya prabhāvataḥ

हे पार्थ, उसके कुल में कोई प्रेत उत्पन्न नहीं होता, इसमें संदेह नहीं; इस तीर्थ के प्रभाव से प्रेत मोक्ष को प्राप्त होते हैं।

श्लोक 17 (skanda.1.91.17)

जयादित्यकूपवरे नरः स्नात्वा प्रयत्नतः॥ गर्भेश्वरं नमस्कृत्य न स गर्भेषु मज्जति

jayādityakūpavare naraḥ snātvā prayatnataḥ garbheśvaraṁ namaskṛtya na sa garbheṣu majjati

जो मनुष्य जयादित्य के उत्तम कूप में प्रयत्नपूर्वक स्नान कर गर्भेश्वर को नमस्कार करता है, वह पुनः गर्भों में नहीं डूबता।

श्लोक 18 (skanda.1.91.18)

इदं मया पार्थ तव प्रणीतं गुप्तस्य क्षेत्रस्य समासयोगात्॥ माहात्म्यमेतत्सकलं शृणोति यः स्याद्विशुद्धः किमु वच्मि भूयः

idaṁ mayā pārtha tava praṇītaṁ guptasya kṣetrasya samāsayogāt māhātmyametatsakalaṁ śṛṇoti yaḥ syādviśuddhaḥ kimu vacmi bhūyaḥ

हे पार्थ, यह मैंने तुम्हें गुप्तक्षेत्र की महिमा से संक्षेप में बताया। जो इस संपूर्ण माहात्म्य को सुनता है, वह विशुद्ध हो जाता है — अब और क्या कहूँ?