Indrajit's False Triumph

Shloka 1 (yuddha.46.1)

ततो द्यां पृथिवीं चैव वीक्षमाणा वनौकसः। ददृशुः संततौ बाणैर्भ्रातरौ रामलक्ष्मणौ ॥ 46.1 ॥

tato dyāṃ pṛthivīṃ caiva vīkṣamāṇā vanaukasaḥ| dadṛśuḥ saṃtatau bāṇairbhrātarau rāmalakṣmaṇau || 46.1 ||

Then, scanning the sky and the earth, the forest-dwelling monkeys beheld the two brothers, Rama and Lakshmana, covered over with arrows.

Shloka 2 (yuddha.46.2)

वृष्ट्वेवोपरते देवे कृतकर्मणि राक्षसे। आजगामाथ तं देशं ससुग्रीवो विभीषणः ॥ 46.2 ॥

vṛṣṭvevoparate deve kṛtakarmaṇi rākṣase| ājagāmātha taṃ deśaṃ sasugrīvo vibhīṣaṇaḥ || 46.2 ||

Then, once the rakshasa had ceased his deed -- like the god of rain pausing after a downpour -- Vibhishana, together with Sugriva, came to that place.

Shloka 3 (yuddha.46.3)

नीलश्च द्विविदो मैन्दः सुषेणः कुमुदोऽङ्गदः। तूर्णं हनुमता सार्धमन्वशोचन्त राघवौ ॥ 46.3 ॥

nīlaśca dvivido maindaḥ suṣeṇaḥ kumudo'ṅgadaḥ| tūrṇaṃ hanumatā sārdhamanvaśocanta rāghavau || 46.3 ||

Nila, Dvivida, Mainda, Sushena, Kumuda, and Angada, together with Hanuman, at once began to lament for the two Raghavas.

Shloka 4 (yuddha.46.4)

अचेष्टौ मन्दनिःश्वासौ शोणितेन परिप्लुतौ। शरजालाचितौ स्तब्धौ शयानौ शरतल्पगौ ॥ 46.4 ॥

aceṣṭau mandaniḥśvāsau śoṇitena pariplutau| śarajālācitau stabdhau śayānau śaratalpagau || 46.4 ||

Motionless, breathing but faintly, drenched in blood, riddled with a net of arrows, rigid, they lay stretched upon a bed of shafts --

Shloka 5 (yuddha.46.5)

निःश्वसन्तौ यथा सर्पौ निश्चेष्टौ मन्दविक्रमौ। रुधिरस्रावदिग्धाङ्गौ तपनीयाविव ध्वजौ ॥ 46.5 ॥

niḥśvasantau yathā sarpau niśceṣṭau mandavikramau| rudhirasrāvadigdhāṅgau tapanīyāviva dhvajau || 46.5 ||

-- sighing like serpents, powerless, their strength ebbed away, their limbs smeared with streaming blood, resembling two golden standards --

Shloka 6 (yuddha.46.6)

तौ वीरशयने वीरौ शयानौ मन्दचेष्टितौ। यूथपैः स्वैः परिवृतौ बाष्पव्याकुललोचनैः ॥ 46.6 ॥

tau vīraśayane vīrau śayānau mandaceṣṭitau| yūthapaiḥ svaiḥ parivṛtau bāṣpavyākulalocanaiḥ || 46.6 ||

-- those two heroes, lying on a hero's couch, their movements feeble, surrounded by their own troop-leaders whose eyes were clouded with tears.

Shloka 7 (yuddha.46.7)

राघवौ पतितौ दृष्ट्वा शरजालसमन्वितौ। बभूवुर्व्यथिताः सर्वे वानराः सविभीषणाः ॥ 46.7 ॥

rāghavau patitau dṛṣṭvā śarajālasamanvitau| babhūvurvyathitāḥ sarve vānarāḥ savibhīṣaṇāḥ || 46.7 ||

Seeing the two Raghavas fallen, enmeshed in a web of arrows, all the monkeys, together with Vibhishana, were struck with anguish.

Shloka 8 (yuddha.46.8)

अन्तरिक्षं निरीक्षन्तो दिशः सर्वाश्च वानराः। न चैनं मायया छन्नं ददृशू रावणिं रणे ॥ 46.8 ॥

antarikṣaṃ nirīkṣanto diśaḥ sarvāśca vānarāḥ| na cainaṃ māyayā channaṃ dadṛśū rāvaṇiṃ raṇe || 46.8 ||

The monkeys scanned the sky and every quarter, but in that battle they could not see Ravani, who had veiled himself with his sorcery.

Shloka 9 (yuddha.46.9)

तं तु मायाप्रतिच्छन्नं माययैव विभीषणः। वीक्षमाणो ददर्शाग्रे भ्रातुः पुत्रमवस्थितम्। तमप्रतिमकर्माणमप्रतिद्वन्द्वमाहवे ॥ 46.9 ॥

taṃ tu māyāpraticchannaṃ māyayaiva vibhīṣaṇaḥ| vīkṣamāṇo dadarśāgre bhrātuḥ putramavasthitam| tamapratimakarmāṇamapratidvandvamāhave || 46.9 ||

But Vibhishana, gazing upon him -- who had veiled himself by illusion -- with a magic vision of his own, made out his brother's son standing there before him: that warrior of matchless deeds, without a rival in battle --

Shloka 10 (yuddha.46.10)

ददर्शान्तर्हितं वीरं वरदानाद् विभीषणः। तेजसा यशसा चैव विक्रमेण च संयुतः ॥ 46.10 ॥

dadarśāntarhitaṃ vīraṃ varadānād vibhīṣaṇaḥ| tejasā yaśasā caiva vikrameṇa ca saṃyutaḥ || 46.10 ||

-- Vibhishana beheld that hero, vanished from sight by virtue of a boon, yet endowed with splendour, fame, and valour.

Shloka 11 (yuddha.46.11)

इन्द्रजित् त्वात्मनः कर्म तौ शयानौ समीक्ष्य च। उवाच परमप्रीतो हर्षयन् सर्वराक्षसान् ॥ 46.11 ॥

indrajit tvātmanaḥ karma tau śayānau samīkṣya ca| uvāca paramaprīto harṣayan sarvarākṣasān || 46.11 ||

Indrajit, for his part, gazing upon his own handiwork -- those two lying stretched out -- spoke, filled with delight, gladdening all the rakshasas:

Shloka 12 (yuddha.46.12)

दूषणस्य च हन्तारौ खरस्य च महाबलौ। सादितौ मामकैर्बाणैर्भ्रातरौ रामलक्ष्मणौ ॥ 46.12 ॥

dūṣaṇasya ca hantārau kharasya ca mahābalau| sāditau māmakairbāṇairbhrātarau rāmalakṣmaṇau || 46.12 ||

“The two exceedingly mighty brothers, Rama and Lakshmana, slayers of Dushana and Khara, have been laid low by my arrows.”

Shloka 13 (yuddha.46.13)

नेमौ मोक्षयितुं शक्यावेतस्मादिषुबन्धनात्। सर्वैरपि समागम्य सर्षिसङ्घैः सुरासुरैः ॥ 46.13 ॥

nemau mokṣayituṃ śakyāvetasmādiṣubandhanāt| sarvairapi samāgamya sarṣisaṅghaiḥ surāsuraiḥ || 46.13 ||

“Not even if all the gods and demons, together with the hosts of sages, were to unite, could these two be freed from this bondage of arrows.”

Shloka 14 (yuddha.46.14)

यत्कृते चिन्तयानस्य शोकार्तस्य पितुर्मम। अस्पृष्ट्वा शयनं गात्रैस्त्रियामा याति शर्वरी ॥ 46.14 ॥

yatkṛte cintayānasya śokārtasya piturmama| aspṛṣṭvā śayanaṃ gātraistriyāmā yāti śarvarī || 46.14 ||

“On whose account my father, absorbed in anxious thought and stricken with grief, passes the three watches of the night without his limbs so much as touching his couch --”

Shloka 15 (yuddha.46.15)

कृत्स्नेयं यत्कृते लङ्का नदी वर्षास्विवाकुला। सोऽयं मूलहरोऽनर्थः सर्वेषां शमितो मया ॥ 46.15 ॥

kṛtsneyaṃ yatkṛte laṅkā nadī varṣāsvivākulā| so'yaṃ mūlaharo'narthaḥ sarveṣāṃ śamito mayā || 46.15 ||

“-- on whose account this whole city of Lanka was in turmoil, like a river in the rainy season -- that very calamity, gnawing at the root of us all, I have now put to rest.”

Shloka 16 (yuddha.46.16)

रामस्य लक्ष्मणस्यैव सर्वेषां च वनौकसाम्। विक्रमा निष्फलाः सर्वे यथा शरदि तोयदाः ॥ 46.16 ॥

rāmasya lakṣmaṇasyaiva sarveṣāṃ ca vanaukasām| vikramā niṣphalāḥ sarve yathā śaradi toyadāḥ || 46.16 ||

“All the prowess of Rama and of Lakshmana, and of all the forest-dwellers, has now become as fruitless as clouds in autumn.”

Shloka 17 (yuddha.46.17)

एवमुक्त्वा तु तान् सर्वान् राक्षसान् परिपश्यतः। यूथपानपि तान् सर्वांस्ताडयत् स च रावणिः ॥ 46.17 ॥

evamuktvā tu tān sarvān rākṣasān paripaśyataḥ| yūthapānapi tān sarvāṃstāḍayat sa ca rāvaṇiḥ || 46.17 ||

Having spoken thus to all the rakshasas who stood watching, Ravani then struck down all the troop-leaders as well.

Shloka 18 (yuddha.46.18)

नीलं नवभिराहत्य मैन्दं सद्विविदं तथा। त्रिभिस्त्रिभिरमित्रघ्नस्तताप परमेषुभिः ॥ 46.18 ॥

nīlaṃ navabhirāhatya maindaṃ sadvividaṃ tathā| tribhistribhiramitraghnastatāpa parameṣubhiḥ || 46.18 ||

Striking Nila with nine arrows, that destroyer of foes then tormented Mainda and Dvivida too, with three excellent shafts apiece.

Shloka 19 (yuddha.46.19)

जाम्बवन्तं महेष्वासो विद्ध्वा बाणेन वक्षसि। हनूमतो वेगवतो विससर्ज शरान् दश ॥ 46.19 ॥

jāmbavantaṃ maheṣvāso vid‍dhvā bāṇena vakṣasi| hanūmato vegavato visasarja śarān daśa || 46.19 ||

That great archer pierced Jambavan's chest with an arrow, and loosed ten shafts at the swift Hanuman.

Shloka 20 (yuddha.46.20)

गवाक्षं शरभं चैव तावप्यमितविक्रमौ। द्वाभ्यां द्वाभ्यां महावेगो विव्याध युधि रावणिः ॥ 46.20 ॥

gavākṣaṃ śarabhaṃ caiva tāvapyamitavikramau| dvābhyāṃ dvābhyāṃ mahāvego vivyādha yudhi rāvaṇiḥ || 46.20 ||

Gavaksha and Sharabha too, those two of boundless valour, were pierced by Ravani, swift as the wind, with two arrows each in that battle.

Shloka 21 (yuddha.46.21)

गोलाङ्गूलेश्वरं चैव वालिपुत्रमथाङ्गदम्। विव्याध बहुभिर्बाणैस्त्वरमाणोऽथ रावणिः ॥ 46.21 ॥

golāṅgūleśvaraṃ caiva vāliputramathāṅgadam| vivyādha bahubhirbāṇaistvaramāṇo'tha rāvaṇiḥ || 46.21 ||

Then Ravani, moving swiftly, pierced the lord of the golangulas, and Angada, the son of Vali, with a multitude of arrows.

Shloka 22 (yuddha.46.22)

तान् वानरवरान् भित्त्वा शरैरग्निशिखोपमैः। ननाद बलवांस्तत्र महासत्त्वः स रावणिः ॥ 46.22 ॥

tān vānaravarān bhittvā śarairagniśikhopamaiḥ| nanāda balavāṃstatra mahāsattvaḥ sa rāvaṇiḥ || 46.22 ||

Having pierced those foremost of monkeys with arrows resembling tongues of flame, that mighty and greatly valiant Ravani roared aloud there.

Shloka 23 (yuddha.46.23)

तानर्दयित्वा बाणौघैस्त्रसयित्वा च वानरान्। प्रजहास महाबाहुर्वचनं चेदमब्रवीत् ॥ 46.23 ॥

tānardayitvā bāṇaughaistrasayitvā ca vānarān| prajahāsa mahābāhurvacanaṃ cedamabravīt || 46.23 ||

Having tormented them with showers of arrows and terrified the monkeys, the mighty-armed one laughed aloud and spoke these words:

Shloka 24 (yuddha.46.24)

शरबन्धेन घोरेण मया बद्धौ चमूमुखे। सहितौ भ्रातरावेतौ निशामयत राक्षसाः ॥ 46.24 ॥

śarabandhena ghoreṇa mayā baddhau camūmukhe| sahitau bhrātarāvetau niśāmayata rākṣasāḥ || 46.24 ||

“Behold, O rakshasas -- at the head of the army, these two brothers together, bound by me in a terrible net of arrows!”

Shloka 25 (yuddha.46.25)

एवमुक्तास्तु ते सर्वे राक्षसाः कूटयोधिनः। परं विस्मयमापन्नाः कर्मणा तेन हर्षिताः ॥ 46.25 ॥

evamuktāstu te sarve rākṣasāḥ kūṭayodhinaḥ| paraṃ vismayamāpannāḥ karmaṇā tena harṣitāḥ || 46.25 ||

Thus addressed, all those rakshasas, warriors skilled in treacherous combat, were struck with great wonder and delighted by that feat.

Shloka 26 (yuddha.46.26)

विनेदुश्च महानादान् सर्वे ते जलदोपमाः। हतो राम इति ज्ञात्वा रावणिं समपूजयन् ॥ 46.26 ॥

vineduśca mahānādān sarve te jaladopamāḥ| hato rāma iti jñātvā rāvaṇiṃ samapūjayan || 46.26 ||

All of them, roaring like clouds, let out great shouts; and believing that Rama was slain, they honoured Ravani together.

Shloka 27 (yuddha.46.27)

निष्पन्दौ तु तदा दृष्ट्वा भ्रातरौ रामलक्ष्मणौ। वसुधायां निरुच्छ्वासौ हतावित्यन्वमन्यत ॥ 46.27 ॥

niṣpandau tu tadā dṛṣṭvā bhrātarau rāmalakṣmaṇau| vasudhāyāṃ nirucchvāsau hatāvityanvamanyata || 46.27 ||

Seeing the two brothers, Rama and Lakshmana, motionless and breathless upon the ground, he concluded that they were dead.

Shloka 28 (yuddha.46.28)

हर्षेण तु समाविष्ट इन्द्रजित् समितिञ्जयः। प्रविवेश पुरीं लङ्कां हर्षयन् सर्वनैर्ऋतान् ॥ 46.28 ॥

harṣeṇa tu samāviṣṭa indrajit samitiñjayaḥ| praviveśa purīṃ laṅkāṃ harṣayan sarvanairṛtān || 46.28 ||

Filled with joy, Indrajit, victorious in battle, entered the city of Lanka, delighting all the rakshasas.

Shloka 29 (yuddha.46.29)

रामलक्ष्मणयोर्दृष्ट्वा शरीरे सायकैश्चिते। सर्वाणि चाङ्गोपाङ्गानि सुग्रीवं भयमाविशत् ॥ 46.29 ॥

rāmalakṣmaṇayordṛṣṭvā śarīre sāyakaiścite| sarvāṇi cāṅgopāṅgāni sugrīvaṃ bhayamāviśat || 46.29 ||

Seeing the bodies of Rama and Lakshmana, their every limb and joint studded with arrows, fear took hold of Sugriva.

Shloka 30 (yuddha.46.30)

तमुवाच परित्रस्तं वानरेन्द्रं विभीषणः। सबाष्पवदनं दीनं शोकव्याकुललोचनम् ॥ 46.30 ॥

tamuvāca paritrastaṃ vānarendraṃ vibhīṣaṇaḥ| sabāṣpavadanaṃ dīnaṃ śokavyākulalocanam || 46.30 ||

To that lord of monkeys -- frightened, his face streaming with tears, wretched, his eyes clouded with grief -- Vibhishana spoke:

Shloka 31 (yuddha.46.31)

अलं त्रासेन सुग्रीव बाष्पवेगो निगृह्यताम्। एवंप्रायाणि युद्धानि विजयो नास्ति नैष्ठिकः ॥ 46.31 ॥

alaṃ trāsena sugrīva bāṣpavego nigṛhyatām| evaṃprāyāṇi yuddhāni vijayo nāsti naiṣṭhikaḥ || 46.31 ||

“Enough of fear, O Sugriva! Restrain this flood of tears. Such is the way of wars -- victory is never assured.”

Shloka 32 (yuddha.46.32)

सभाग्यशेषतास्माकं यदि वीर भविष्यति। मोहमेतौ प्रहास्येते महात्मानौ महाबलौ ॥ 46.32 ॥

sabhāgyaśeṣatāsmākaṃ yadi vīra bhaviṣyati| mohametau prahāsyete mahātmānau mahābalau || 46.32 ||

“If some measure of good fortune yet remains to us, O hero, these two great-souled and mighty ones will shake off this swoon.”

Shloka 33 (yuddha.46.33)

पर्यवस्थापयात्मानमनाथं मां च वानर। सत्यधर्माभिरक्तानां नास्ति मृत्युकृतं भयम् ॥ 46.33 ॥

paryavasthāpayātmānamanāthaṃ māṃ ca vānara| satyadharmābhiraktānāṃ nāsti mṛtyukṛtaṃ bhayam || 46.33 ||

“Steady yourself, O monkey, and steady me too, who am without protector now. For those devoted to truth and righteousness, there is no fear born of death.”

Shloka 34 (yuddha.46.34)

एवमुक्त्वा ततस्तस्य जलक्लिन्नेन पाणिना। सुग्रीवस्य शुभे नेत्रे प्रममार्ज विभीषणः ॥ 46.34 ॥

evamuktvā tatastasya jalaklinnena pāṇinā| sugrīvasya śubhe netre pramamārja vibhīṣaṇaḥ || 46.34 ||

Having spoken thus, Vibhishana then wiped Sugriva's fair eyes with his hand moistened in water.

Shloka 35 (yuddha.46.35)

ततः सलिलमादाय विद्यया परिजप्य च। सुग्रीवनेत्रे धर्मात्मा प्रममार्ज विभीषणः ॥ 46.35 ॥

tataḥ salilamādāya vidyayā parijapya ca| sugrīvanetre dharmātmā pramamārja vibhīṣaṇaḥ || 46.35 ||

Then, taking up water and consecrating it with a spell, the righteous Vibhishana wiped Sugriva's eyes.

Shloka 36 (yuddha.46.36)

विमृज्य वदनं तस्य कपिराजस्य धीमतः। अब्रवीत् कालसम्प्राप्तमसम्भ्रान्तमिदं वचः ॥ 46.36 ॥

vimṛjya vadanaṃ tasya kapirājasya dhīmataḥ| abravīt kālasamprāptamasambhrāntamidaṃ vacaḥ || 46.36 ||

Having wiped clean the face of that wise king of monkeys, he spoke this timely word, composed and unshaken:

Shloka 37 (yuddha.46.37)

न कालः कपिराजेन्द्र वैक्लव्यमवलम्बितुम्। अतिस्नेहोऽपि कालेऽस्मिन् मरणायोपकल्पते ॥ 46.37 ॥

na kālaḥ kapirājendra vaiklavyamavalambitum| atisneho'pi kāle'smin maraṇāyopakalpate || 46.37 ||

“O king of monkeys, this is no time to give way to despair. Even excessive attachment, at such a moment, tends toward death.”

Shloka 38 (yuddha.46.38)

तस्मादुत्सृज्य वैक्लव्यं सर्वकार्यविनाशनम्। हितं रामपुरोगाणां सैन्यानामनुचिन्तय ॥ 46.38 ॥

tasmādutsṛjya vaiklavyaṃ sarvakāryavināśanam| hitaṃ rāmapurogāṇāṃ sainyānāmanucintaya || 46.38 ||

“Therefore cast off this despair that ruins every undertaking, and turn your thoughts to the welfare of the army that has Rama at its head.”

Shloka 39 (yuddha.46.39)

अथ वा रक्ष्यतां रामो यावत्संज्ञाविपर्ययः। लब्धसंज्ञौ हि काकुत्स्थौ भयं नौ व्यपनेष्यतः ॥ 46.39 ॥

atha vā rakṣyatāṃ rāmo yāvatsaṃjñāviparyayaḥ| labdhasaṃjñau hi kākutsthau bhayaṃ nau vyapaneṣyataḥ || 46.39 ||

“Or rather, let Rama be guarded until his senses return; for once the two Kakutsthas regain consciousness, they will surely drive away our fear.”

Shloka 40 (yuddha.46.40)

नैतत् किंचन रामस्य न च रामो मुमूर्षति। नह्येनं हास्यते लक्ष्मीर्दुर्लभा या गतायुषाम् ॥ 46.40 ॥

naitat kiṃcana rāmasya na ca rāmo mumūrṣati| nahyenaṃ hāsyate lakṣmīrdurlabhā yā gatāyuṣām || 46.40 ||

“This is nothing at all to Rama; nor is Rama about to die. That splendour, so hard to find in those whose life has run its course, has not deserted him.”

Shloka 41 (yuddha.46.41)

तस्मादाश्वासयात्मानं बलं चाश्वासय स्वकम्। यावत् सैन्यानि सर्वाणि पुनः संस्थापयाम्यहम् ॥ 46.41 ॥

tasmādāśvāsayātmānaṃ balaṃ cāśvāsaya svakam| yāvat sainyāni sarvāṇi punaḥ saṃsthāpayāmyaham || 46.41 ||

“Therefore, take heart yourself, and give heart to your own troops, while I go and restore order among all the ranks.”

Shloka 42 (yuddha.46.42)

एते हि फुल्लनयनास्त्रासादागतसाध्वसाः। कर्णे कर्णे प्रकथिता हरयो हरिसत्तम ॥ 46.42 ॥

ete hi phullanayanāstrāsādāgatasādhvasāḥ| karṇe karṇe prakathitā harayo harisattama || 46.42 ||

“For these monkeys, O foremost of monkeys, their eyes wide with terror, panic-stricken, are whispering rumours from ear to ear.”

Shloka 43 (yuddha.46.43)

मां तु दृष्ट्वा प्रधावन्तमनीकं सम्प्रहर्षितम्। त्यजन्तु हरयस्त्रासं भुक्तपूर्वामिव स्रजम् ॥ 46.43 ॥

māṃ tu dṛṣṭvā pradhāvantamanīkaṃ sampraharṣitam| tyajantu harayastrāsaṃ bhuktapūrvāmiva srajam || 46.43 ||

“But once they see me hastening among the ranks to hearten them, let the monkeys cast off their fear, as one discards a garland already worn.”

Shloka 44 (yuddha.46.44)

समाश्वास्य तु सुग्रीवं राक्षसेन्द्रो विभीषणः। विद्रुतं वानरानीकं तत् समाश्वासयत् पुनः ॥ 46.44 ॥

samāśvāsya tu sugrīvaṃ rākṣasendro vibhīṣaṇaḥ| vidrutaṃ vānarānīkaṃ tat samāśvāsayat punaḥ || 46.44 ||

Having thus comforted Sugriva, Vibhishana, lord of rakshasas, went on to reassure once more that army of monkeys, which had scattered in flight.

Shloka 45 (yuddha.46.45)

इन्द्रजित् तु महामायः सर्वसैन्यसमावृतः। विवेश नगरीं लङ्कां पितरं चाभ्युपागमत् ॥ 46.45 ॥

indrajit tu mahāmāyaḥ sarvasainyasamāvṛtaḥ| viveśa nagarīṃ laṅkāṃ pitaraṃ cābhyupāgamat || 46.45 ||

Indrajit, meanwhile, that great master of illusion, surrounded by all his forces, entered the city of Lanka and went before his father.

Shloka 46 (yuddha.46.46)

तत्र रावणमासाद्य अभिवाद्य कृताञ्जलिः। आचचक्षे प्रियं पित्रे निहतौ रामलक्ष्मणौ ॥ 46.46 ॥

tatra rāvaṇamāsādya abhivādya kṛtāñjaliḥ| ācacakṣe priyaṃ pitre nihatau rāmalakṣmaṇau || 46.46 ||

There, coming before Ravana and saluting him with joined palms, he announced to his father the welcome news that Rama and Lakshmana had been slain.

Shloka 47 (yuddha.46.47)

उत्पपात ततो हृष्टः पुत्रं च परिषस्वजे। रावणो रक्षसां मध्ये श्रुत्वा शत्रू निपातितौ ॥ 46.47 ॥

utpapāta tato hṛṣṭaḥ putraṃ ca pariṣasvaje| rāvaṇo rakṣasāṃ madhye śrutvā śatrū nipātitau || 46.47 ||

Hearing, in the midst of his rakshasas, that his two foes had been struck down, Ravana leapt up in delight and embraced his son.

Shloka 48 (yuddha.46.48)

उपाघ्राय च तं मूर्ध्नि पप्रच्छ प्रीतमानसः। पृच्छते च यथावृत्तं पित्रे तस्मै न्यवेदयत् ॥ 46.48 ॥

upāghrāya ca taṃ mūrdhni papraccha prītamānasaḥ| pṛcchate ca yathāvṛttaṃ pitre tasmai nyavedayat || 46.48 ||

Kissing him upon the head, his heart full of joy, he questioned him closely; and to his questioning father, Indrajit related all that had happened --

Shloka 49 (yuddha.46.49)

यथा तौ शरबन्धेन निश्चेष्टौ निष्प्रभौ कृतौ ॥ 46.49 ॥

yathā tau śarabandhena niśceṣṭau niṣprabhau kṛtau || 46.49 ||

-- how he had made those two motionless and lustreless with his net of arrows.

Shloka 50 (yuddha.46.50)

स हर्षवेगानुगतान्तरात्मा। श्रुत्वा गिरं तस्य महारथस्य। जहौ ज्वरं दाशरथेः समुत्थं। प्रहृष्टवाचाभिननन्द पुत्रम् ॥ 46.50 ॥

sa harṣavegānugatāntarātmā| śrutvā giraṃ tasya mahārathasya| jahau jvaraṃ dāśaratheḥ samutthaṃ| prahṛṣṭavācābhinananda putram || 46.50 ||

Hearing the words of that great charioteer, his inmost soul swept up in a rush of joy, Ravana let go the fever that Rama's presence had kindled in him, and with delighted words applauded his son.