Viṣṇuhari-māhātmya-varṇanam — The Glory of Vishnu-Hari

Verse 1 (skanda.2.180.1)

जयति पराशरसूनुः सत्यवतीहृदयनंदनो व्यासः यस्यास्यकमलगलितं वाङ्मयममृतं जगत्पिबति

jayati parāśarasūnuḥ satyavatīhṛdayanaṁdano vyāsaḥ yasyāsyakamalagalitaṁ vāṅmayamamṛtaṁ jagatpibati

Victorious is Vyasa, the son of Parashara, the joy of Satyavati's heart, whose ambrosial word, flowing from the lotus of his mouth, the whole world drinks in.

Verse 2 (skanda.2.180.2)

नारायणं नमस्कृत्य नरं चैव नरोत्तमम् देवीं सरस्वतीं चैव ततो जयमुदीरयेत्

nārāyaṇaṁ namaskṛtya naraṁ caiva narottamam devīṁ sarasvatīṁ caiva tato jayamudīrayet

Having bowed to Narayana, and to Nara the best of men, and to the goddess Sarasvati, one should then utter 'Jaya'.

Verse 3 (skanda.2.180.3)

व्यास उवाच हिमवद्वासिनः सर्वे मुनयो वेदपारगाः त्रिकालज्ञा महात्मानो नैमिषारण्यवासिनः

vyāsa uvāca himavadvāsinaḥ sarve munayo vedapāragāḥ trikālajñā mahātmāno naimiṣāraṇyavāsinaḥ

Vyasa said: All the sages dwelling on the Himalaya, versed in the Vedas, great souls who know the three times, dwelling in Naimisharanya,

Verse 4 (skanda.2.180.4)

येऽर्बुदारण्यनिरता दण्डकारण्यवासिनः महेन्द्राद्रिरता ये वै ये च विन्ध्यनिवासिनः

ye’rbudāraṇyaniratā daṇḍakāraṇyavāsinaḥ mahendrādriratā ye vai ye ca vindhyanivāsinaḥ

those devoted to the Arbuda forest, dwelling in the Dandaka forest, devoted to Mount Mahendra, and dwelling in the Vindhya,

Verse 5 (skanda.2.180.5)

जंबूवनरता ये च ये गोदावरिवासिनः वाराणसीश्रिता ये च मथुरावासिनस्तथा

jaṁbūvanaratā ye ca ye godāvarivāsinaḥ vārāṇasīśritā ye ca mathurāvāsinastathā

those devoted to the Jambu forest, dwelling by the Godavari, taking refuge in Varanasi, and likewise dwelling in Mathura,

Verse 6 (skanda.2.180.6)

उज्जयिन्यां रता ये च प्रथमाश्रमवासिनः द्वारावतीश्रिता ये च बदर्य्याश्रयिणस्तथा

ujjayinyāṁ ratā ye ca prathamāśramavāsinaḥ dvārāvatīśritā ye ca badaryyāśrayiṇastathā

those devoted to Ujjain, dwellers in the first ashrama, taking refuge in Dvaraka, and likewise sheltered at Badari,

Verse 7 (skanda.2.180.7)

मायापुरीश्रिता ये च ये च कान्तीनिवासिनः एते चान्ये च मुनयः सशिष्या बहवोऽमलाः

māyāpurīśritā ye ca ye ca kāntīnivāsinaḥ ete cānye ca munayaḥ saśiṣyā bahavo’malāḥ

those taking refuge in Mayapuri, and dwelling in Kanchi — these and many other stainless sages, together with their disciples,

Verse 8 (skanda.2.180.8)

कुरुक्षेत्रे महाक्षेत्रे सत्रे द्वादशवार्षिके वर्तमाने च रामस्य क्षितीशस्य महात्मनः समागताः समाहूताः सर्वे ते मुनयोऽमलाः

kurukṣetre mahākṣetre satre dvādaśavārṣike vartamāne ca rāmasya kṣitīśasya mahātmanaḥ samāgatāḥ samāhūtāḥ sarve te munayo’malāḥ

at Kurukshetra, the great sacred field, during a twelve-year sacrificial session then underway under the great-souled king Rama, all those stainless sages, having been invited, assembled there.

Verse 9 (skanda.2.180.9)

सर्वे ते शुद्धमनसो वेदवेदांगपारगाः तत्र स्नात्वा यथान्यायं कृत्वा कर्म जपादिकम्

sarve te śuddhamanaso vedavedāṁgapāragāḥ tatra snātvā yathānyāyaṁ kṛtvā karma japādikam

All of them, pure of mind and versed in the Vedas and Vedangas, having duly bathed there and performed rites such as japa,

Verse 10 (skanda.2.180.10)

भारद्वाजं पुरस्कृत्य वेदवेदांगपारगम् आसनेषु विचित्रेषु बृष्यादिषु ह्यनुक्रमात्

bhāradvājaṁ puraskṛtya vedavedāṁgapāragam āsaneṣu vicitreṣu bṛṣyādiṣu hyanukramāt

having placed Bharadvaja, versed in the Vedas and Vedangas, at the fore, in due order upon various seats such as deer-skin mats,

Verse 11 (skanda.2.180.11)

उपविष्टाः कथाश्चक्रुर्नानातीर्थाश्रितास्तदा कर्मांतरेषु सत्रस्य सुखासीनाः परस्परम्

upaviṣṭāḥ kathāścakrurnānātīrthāśritāstadā karmāṁtareṣu satrasya sukhāsīnāḥ parasparam

having taken their seats, those sages who had dwelt at various sacred fords told stories with one another, sitting comfortably in the intervals of the sacrificial rites.

Verse 12 (skanda.2.180.12)

कथांतेषु ततस्तेषां मुनीनां भावितात्मनाम् आजगाम महातेजास्तत्र सूतो महामतिः

kathāṁteṣu tatasteṣāṁ munīnāṁ bhāvitātmanām ājagāma mahātejāstatra sūto mahāmatiḥ

At the end of their stories, the greatly radiant, wise Suta arrived there among those sages of purified soul.

Verse 13 (skanda.2.180.13)

व्यासशिष्यः पुराणज्ञो समः हर्षणसंज्ञकः तान्प्रणम्य यथान्यायं मुनीनुपविवेश सः उपविष्टो यथान्यायं मुनीनां वचनेन सः

vyāsaśiṣyaḥ purāṇajño samaḥ harṣaṇasaṁjñakaḥ tānpraṇamya yathānyāyaṁ munīnupaviveśa saḥ upaviṣṭo yathānyāyaṁ munīnāṁ vacanena saḥ

The disciple of Vyasa, learned in the Puranas, equanimous, named Harshana, having duly bowed to those sages, took his seat; and being seated in due order at the sages' word,

Verse 14 (skanda.2.180.14)

व्यासशिष्यं मुनिवरं सूतं वै रोमहर्षणम् तं पप्रच्छुर्मुनिवरा भारद्वाजादयोऽमलाः

vyāsaśiṣyaṁ munivaraṁ sūtaṁ vai romaharṣaṇam taṁ papracchurmunivarā bhāradvājādayo’malāḥ

the eminent stainless sages headed by Bharadvaja questioned him — the excellent sage Suta Romaharshana, Vyasa's disciple.

Verse 15 (skanda.2.180.15)

ऋषय ऊचुः त्वत्तः श्रुता महाभाग नानातीर्थाश्रिताः कथाः सरहस्यानि सर्वाणि पुराणानि महामते

ṛṣaya ūcuḥ tvattaḥ śrutā mahābhāga nānātīrthāśritāḥ kathāḥ sarahasyāni sarvāṇi purāṇāni mahāmate

The sages said: O greatly fortunate, wise one, from you we have heard tales connected with various sacred fords, and all the Puranas together with their secret meaning.

Verse 16 (skanda.2.180.16)

सांप्रतं श्रोतुमिच्छामः सरहस्यं सनातनम् अयोध्याया महापुर्या महिमानं गुणोज्ज्वलम्

sāṁprataṁ śrotumicchāmaḥ sarahasyaṁ sanātanam ayodhyāyā mahāpuryā mahimānaṁ guṇojjvalam

Now we wish to hear, together with its secret meaning, the eternal, virtue-radiant greatness of the great city Ayodhya.

Verse 17 (skanda.2.180.17)

कीदृशी सा सदा मेध्याऽयोध्या विष्णुप्रियापुरी आद्या सा गीयते वेदे पुरीणां मुक्तिदायिका

kīdṛśī sā sadā medhyā’yodhyā viṣṇupriyāpurī ādyā sā gīyate vede purīṇāṁ muktidāyikā

What is that ever-pure Ayodhya, the city dear to Vishnu, like? It is sung in the Veda as the first among cities, the bestower of liberation.

Verse 18 (skanda.2.180.18)

संस्थानं कीदृशं तस्यास्तस्यां के च महीभुजः कानि तीर्थानि पुण्यानि माहात्म्यं तेषु कीदृशम्

saṁsthānaṁ kīdṛśaṁ tasyāstasyāṁ ke ca mahībhujaḥ kāni tīrthāni puṇyāni māhātmyaṁ teṣu kīdṛśam

What is its layout, who were the kings there, which are its sacred fords, and what is the greatness of each?

Verse 19 (skanda.2.180.19)

अयोध्यासेवनान्नृणां फलं स्यात्सूत कीदृशम् किं चरित्रं सूत तस्याः का नद्यः के च संगमाः

ayodhyāsevanānnṛṇāṁ phalaṁ syātsūta kīdṛśam kiṁ caritraṁ sūta tasyāḥ kā nadyaḥ ke ca saṁgamāḥ

What fruit, O Suta, do men gain by dwelling in Ayodhya? What is its story, which are its rivers, and which its confluences?

Verse 20 (skanda.2.180.20)

तत्र स्नानेन किं पुण्यं दानेन च महामते तत्सर्वं श्रोतुमिच्छामस्त्वत्तः सूत गुणाधिक

tatra snānena kiṁ puṇyaṁ dānena ca mahāmate tatsarvaṁ śrotumicchāmastvattaḥ sūta guṇādhika

What merit is there, O wise one, in bathing and giving charity there? We wish to hear all this from you, O Suta of surpassing virtue.

Verse 21 (skanda.2.180.21)

एतत्सर्वं क्रमेणैव तथ्यं त्वं वेत्थ सांप्रतम् अयोध्याया महापुर्य्या माहात्म्यं वक्तुमर्हसि

etatsarvaṁ krameṇaiva tathyaṁ tvaṁ vettha sāṁpratam ayodhyāyā mahāpuryyā māhātmyaṁ vaktumarhasi

All this, in due order and truthfully, you now know; you are worthy to declare the greatness of the great city Ayodhya.

Verse 22 (skanda.2.180.22)

सूत उवाच व्यासप्रसादाज्जानामि पुराणानि तपोधनाः सेतिहासानि सर्वाणि सरहस्यानि तत्त्वतः

sūta uvāca vyāsaprasādājjānāmi purāṇāni tapodhanāḥ setihāsāni sarvāṇi sarahasyāni tattvataḥ

Suta said: By Vyasa's grace, O men rich in austerity, I know all the Puranas together with their histories and secrets, in truth.

Verse 23 (skanda.2.180.23)

तं प्रणम्य प्रवक्ष्यामि माहात्म्यं भवदग्रतः अयोध्याया महापुर्या यथावत्सरहस्यकम्

taṁ praṇamya pravakṣyāmi māhātmyaṁ bhavadagrataḥ ayodhyāyā mahāpuryā yathāvatsarahasyakam

Having bowed to him, I shall declare before you, exactly as it is, the greatness of the great city Ayodhya together with its mystery.

Verse 24 (skanda.2.180.24)

विद्यावन्तं विपुलमतिदं वेदवेदांगवेद्यं श्रेष्ठं शान्तं शमितविषयं शुद्धतेजोविशालम् वेदव्यासं सततविनतं विश्ववेद्यैकयोनिं पाराशर्य्यं परमपुरुषं सर्वदाऽहं नमामि

vidyāvantaṁ vipulamatidaṁ vedavedāṁgavedyaṁ śreṣṭhaṁ śāntaṁ śamitaviṣayaṁ śuddhatejoviśālam vedavyāsaṁ satatavinataṁ viśvavedyaikayoniṁ pārāśaryyaṁ paramapuruṣaṁ sarvadā’haṁ namāmi

I ever bow to Vedavyasa, the learned one, bestower of vast wisdom, knowable through the Vedas and Vedangas, the best, the tranquil, one whose passions are stilled, vast with pure radiance, ever humble, the sole source knowable to the universe, son of Parashara, the Supreme Person.

Verse 25 (skanda.2.180.25)

ॐ नमो भगवते तस्मै व्यासायामिततेजसे यस्य प्रसादाज्जानामि ह्ययोध्यामहिमामहम्

oṁ namo bhagavate tasmai vyāsāyāmitatejase yasya prasādājjānāmi hyayodhyāmahimāmaham

Om, salutation to that Lord Vyasa of boundless splendor, by whose grace I know the greatness of Ayodhya.

Verse 26 (skanda.2.180.26)

शृण्वन्तु मुनयः सर्वे सावधानाः सशिष्यकाः माहात्म्यं कथयिष्यामि अयोध्याया महोदयम्

śṛṇvantu munayaḥ sarve sāvadhānāḥ saśiṣyakāḥ māhātmyaṁ kathayiṣyāmi ayodhyāyā mahodayam

Let all the sages, together with their disciples, listen attentively; I shall tell the exalted greatness of Ayodhya.

Verse 27 (skanda.2.180.27)

उदीरितमगस्त्याय स्कन्देनाश्रावि नारदात् अगस्त्येन पुरा प्रोक्तं कृष्णद्वैपायनाय तत्

udīritamagastyāya skandenāśrāvi nāradāt agastyena purā proktaṁ kṛṣṇadvaipāyanāya tat

This was declared to Agastya by Skanda, who had heard it from Narada; and Agastya, of old, told that same account to Krishna Dvaipayana.

Verse 28 (skanda.2.180.28)

कृष्णद्वैपायनाच्चैतन्मया प्राप्तं तपोधनाः तदहं वच्मि युष्मभ्यं श्रोतुकामेभ्य आदरात्

kṛṣṇadvaipāyanāccaitanmayā prāptaṁ tapodhanāḥ tadahaṁ vacmi yuṣmabhyaṁ śrotukāmebhya ādarāt

And this I received from Krishna Dvaipayana, O men rich in austerity; that same I now tell you, who are eager to hear, with reverence.

Verse 29 (skanda.2.180.29)

नमामि परमात्मानं रामं राजीवलोचनम् अतसीकुसुमश्यामं रावणांतकमव्ययम्

namāmi paramātmānaṁ rāmaṁ rājīvalocanam atasīkusumaśyāmaṁ rāvaṇāṁtakamavyayam

I bow to the Supreme Self, Rama, lotus-eyed, dark as the atasi flower, slayer of Ravana, the imperishable.

Verse 30 (skanda.2.180.30)

अयोध्या सा परा मेध्या पुरी दुष्कृतिदुर्ल्लभा कस्य सेव्या च नाऽयोध्या यस्यां साक्षाद्धरिः स्वयम्

ayodhyā sā parā medhyā purī duṣkṛtidurllabhā kasya sevyā ca nā’yodhyā yasyāṁ sākṣāddhariḥ svayam

That Ayodhya is supremely pure, a city hard for the evildoer to attain; for whom is it not fit to serve, when Hari himself dwells there visibly?

Verse 31 (skanda.2.180.31)

सरयूतीरमासाद्य दिव्या परमशोभना अमरावतीनिभा प्रायः श्रिता बहुतपोधनैः

sarayūtīramāsādya divyā paramaśobhanā amarāvatīnibhā prāyaḥ śritā bahutapodhanaiḥ

Situated on the bank of the Sarayu, divine, supremely beautiful, resembling Amaravati, mostly frequented by those rich in austerity,

Verse 32 (skanda.2.180.32)

हस्त्यश्वरथपत्त्याढ्या संपदुच्चा च संस्थिता प्राकाराढ्यप्रतोलीभिस्तोरणैः कांचनप्रभैः

hastyaśvarathapattyāḍhyā saṁpaduccā ca saṁsthitā prākārāḍhyapratolībhistoraṇaiḥ kāṁcanaprabhaiḥ

rich in elephants, horses, chariots and foot-soldiers, established with the highest prosperity, with ramparts and broad streets, adorned with golden-hued archways,

Verse 33 (skanda.2.180.33)

सानूपवेषैः सर्वत्र सुविभक्तचतुष्टया अनेकभूमिप्रासादा बहुभित्तिसुविक्रिया

sānūpaveṣaiḥ sarvatra suvibhaktacatuṣṭayā anekabhūmiprāsādā bahubhittisuvikriyā

everywhere well laid out with terraced quarters, its four sections well divided, with many-storeyed palaces, artfully built with many walls,

Verse 34 (skanda.2.180.34)

पद्मोत्फुल्लशुभोदाभिर्वापीभिरुपशोभिता देवतायतनैर्दिव्यैर्वेदघोषैश्च मण्डिता

padmotphullaśubhodābhirvāpībhirupaśobhitā devatāyatanairdivyairvedaghoṣaiśca maṇḍitā

beautified with stepped wells of auspicious water bearing blooming lotuses, adorned with divine shrines and the resounding of Vedic chant,

Verse 35 (skanda.2.180.35)

वीणावेणुमृदंगादिशब्दैरुत्कृष्टतां गता शालैस्तालैर्नालिकेरैः पनसामलकैस्तथा

vīṇāveṇumṛdaṁgādiśabdairutkṛṣṭatāṁ gatā śālaistālairnālikeraiḥ panasāmalakaistathā

raised to excellence by the sounds of vina, flute and mridanga, surrounded by sal, palmyra, coconut, jackfruit and amla trees,

Verse 36 (skanda.2.180.36)

तथैवाम्रकपित्थाद्यैरशोकैरुपशोभिता आरामैर्विविधैर्युक्ता सर्वर्तुफलपादपैः

tathaivāmrakapitthādyairaśokairupaśobhitā ārāmairvividhairyuktā sarvartuphalapādapaiḥ

and likewise beautified with mango, wood-apple and ashoka trees, endowed with various gardens of trees bearing fruit in every season,

Verse 37 (skanda.2.180.37)

मालतीजातिबकुलपाटलीनागचंपकैः करवीरैः कर्णिकारैः केतकीभिरलंकृता

mālatījātibakulapāṭalīnāgacaṁpakaiḥ karavīraiḥ karṇikāraiḥ ketakībhiralaṁkṛtā

adorned with malati, jati, bakula, patali, naga and champaka blossoms, with oleander, karnikara and ketaki,

Verse 38 (skanda.2.180.38)

निम्बजंवीरकदलीमातुलिंगमहाफलैः लसच्चंदनगंधाढ्यैर्नागरैरुपशोभिता

nimbajaṁvīrakadalīmātuliṁgamahāphalaiḥ lasaccaṁdanagaṁdhāḍhyairnāgarairupaśobhitā

beautified by citizens rich in the fragrance of gleaming sandalwood, amid neem, jambira, plantain and citron trees heavy with great fruit,

Verse 39 (skanda.2.180.39)

देवतुल्यप्रभायुक्तैर्नृपपुत्रैश्च संयुता सुरूपाभिर्वरस्त्रीभिर्देवस्त्रीभिरिवावृता

devatulyaprabhāyuktairnṛpaputraiśca saṁyutā surūpābhirvarastrībhirdevastrībhirivāvṛtā

accompanied by princes of godlike splendor, and surrounded by beautiful, excellent women as if by the women of the gods,

Verse 40 (skanda.2.180.40)

श्रेष्ठैः सत्कविभिर्युक्ता बृहस्पतिसमैर्द्विजैः वणिग्जनैस्तथा पौरैः कल्पवृक्षैरिवावृता

śreṣṭhaiḥ satkavibhiryuktā bṛhaspatisamairdvijaiḥ vaṇigjanaistathā pauraiḥ kalpavṛkṣairivāvṛtā

endowed with eminent true poets, with brahmins equal to Brihaspati, and surrounded by merchants and citizens as if by wish-fulfilling trees,

Verse 41 (skanda.2.180.41)

अश्वैरुच्चैःश्रवस्तुल्यैर्दंतिभिर्दिग्गजैरिव इति नानाविधैर्भावैरुपेतेन्द्रपुरी समा

aśvairuccaiḥśravastulyairdaṁtibhirdiggajairiva iti nānāvidhairbhāvairupetendrapurī samā

with horses like Uccaihshravas, with elephants like the guardian-elephants of the quarters — thus, endowed with such manifold qualities, she was equal to Indra's city.

Verse 42 (skanda.2.180.42)

यस्यां जाता महीपालाः सूर्यवंशसमुद्भवाः इक्ष्वाकुप्रमुखाः सर्वे प्रजापालनतत्पराः

yasyāṁ jātā mahīpālāḥ sūryavaṁśasamudbhavāḥ ikṣvākupramukhāḥ sarve prajāpālanatatparāḥ

in which were born the kings of the solar dynasty, headed by Ikshvaku, all devoted to the protection of their subjects,

Verse 43 (skanda.2.180.43)

यस्यास्तीरे पुण्यतोया कूजद्भृंगविहंगमा सरयूर्नाम तटिनी मानसप्रभवोल्लसा

yasyāstīre puṇyatoyā kūjadbhṛṁgavihaṁgamā sarayūrnāma taṭinī mānasaprabhavollasā

on whose bank flows the river named Sarayu, of sacred waters, alive with humming bees and birds, radiant, sprung from Lake Manasa,

Verse 44 (skanda.2.180.44)

धर्मद्रवपरीता सा घर्घरोत्तमसंगमा मुनीश्वराश्रिततटा जागर्ति जगदुच्छ्रिता

dharmadravaparītā sā ghargharottamasaṁgamā munīśvarāśritataṭā jāgarti jagaducchritā

pervaded by the flowing essence of dharma, having an excellent confluence with the Ghaghara, her banks resorted to by great sages, ever wakeful, exalting the world.

Verse 45 (skanda.2.180.45)

दक्षिणाच्चरणांगुष्ठान्निःसृता जाह्नवी हरेः वामांगुष्ठान्मुनिवराः सरयूर्निर्गता शुभा

dakṣiṇāccaraṇāṁguṣṭhānniḥsṛtā jāhnavī hareḥ vāmāṁguṣṭhānmunivarāḥ sarayūrnirgatā śubhā

From the toe of Hari's right foot issued the Jahnavi; from his left toe, O best of sages, issued the auspicious Sarayu.

Verse 46 (skanda.2.180.46)

तस्मादिमे पुण्यतमे नद्यौ देवनमस्कृते एतयोः स्नानमात्रेण ब्रह्महत्यां व्यपोहति

tasmādime puṇyatame nadyau devanamaskṛte etayoḥ snānamātreṇa brahmahatyāṁ vyapohati

Therefore these two rivers, most sacred and worshipped by the gods, wash away even the sin of killing a brahmin by mere bathing in them.

Verse 47 (skanda.2.180.47)

तामयोध्यामथ प्राप्तोऽगस्त्यः कुम्भोद्भवो मुनिः यात्रार्थं तीर्थमाहात्म्यं ज्ञात्वा स्कन्दप्रसादतः

tāmayodhyāmatha prāpto’gastyaḥ kumbhodbhavo muniḥ yātrārthaṁ tīrthamāhātmyaṁ jñātvā skandaprasādataḥ

Then the sage Agastya, born of a pot, having learned the greatness of the sacred fords by Skanda's grace, arrived at that Ayodhya for pilgrimage.

Verse 48 (skanda.2.180.48)

आगत्य तु इतः सोऽपि कृत्वा यात्रां क्रमेण च यथोक्तेन विधानेन स्नात्वा संतर्प्य तान्पितॄन्

āgatya tu itaḥ so’pi kṛtvā yātrāṁ krameṇa ca yathoktena vidhānena snātvā saṁtarpya tānpitṝn

Having come there, he too, having made pilgrimage in due order, having bathed according to the prescribed rule, and having offered libations to the ancestors,

Verse 49 (skanda.2.180.49)

पूजयित्वा यथान्यायं देवताः सकला अपि सर्वाण्यपि च तीर्थानि नमस्कृत्य यथाविधि

pūjayitvā yathānyāyaṁ devatāḥ sakalā api sarvāṇyapi ca tīrthāni namaskṛtya yathāvidhi

having duly worshipped all the deities, and having duly bowed to all the sacred fords as well,

Verse 50 (skanda.2.180.50)

कृतकृत्योर्ज्जितानन्दस्तीर्थमाहात्म्यदर्शनात् अभूदगस्त्यो रूपेण पुलकां चितविग्रहः

kṛtakṛtyorjjitānandastīrthamāhātmyadarśanāt abhūdagastyo rūpeṇa pulakāṁ citavigrahaḥ

Agastya, his purpose fulfilled, his joy intensified by the sight of the sacred fords' greatness, became, in form, one whose body was thrilled with horripilation.

Verse 51 (skanda.2.180.51)

स त्रिरात्रं स्थितस्तत्र यात्रां कृत्वा यथाविधि स्तुवन्नयोध्यामाहात्म्यं प्रतस्थे मुनिसत्तमः

sa trirātraṁ sthitastatra yātrāṁ kṛtvā yathāvidhi stuvannayodhyāmāhātmyaṁ pratasthe munisattamaḥ

He, having remained there three nights, having duly completed the pilgrimage, that best of sages, praising the greatness of Ayodhya, set out to depart.

Verse 52 (skanda.2.180.52)

तमायांतं विलोक्याशु बहुलानन्दसुन्दरम् कृष्णद्वैपायनो व्यासः पप्रच्छानंदकारणम्

tamāyāṁtaṁ vilokyāśu bahulānandasundaram kṛṣṇadvaipāyano vyāsaḥ papracchānaṁdakāraṇam

Seeing him coming, made beautiful by abundant joy, Krishna Dvaipayana Vyasa at once asked him the cause of his joy.

Verse 53 (skanda.2.180.53)

व्यास उवाच कुतः समागतो ब्रह्मन्सांप्रतं मुनिसत्तमः परमानंदसंदोहः समभूत्सांप्रतं तव

vyāsa uvāca kutaḥ samāgato brahmansāṁprataṁ munisattamaḥ paramānaṁdasaṁdohaḥ samabhūtsāṁprataṁ tava

Vyasa said: From where have you now come, O brahmin, best of sages? A supreme abundance of joy has now arisen in you.

Verse 54 (skanda.2.180.54)

कस्मादानंदपोषोऽभूत्तव ब्रह्मन्वदस्व मे ममापि भवदानंदात्प्रमोदो हृदि जायते

kasmādānaṁdapoṣo’bhūttava brahmanvadasva me mamāpi bhavadānaṁdātpramodo hṛdi jāyate

From what, O brahmin, has this swelling of joy come upon you? Tell me — from your joy, delight arises in my heart too.

Verse 55 (skanda.2.180.55)

अगस्त्य उवाच अहो महदथाश्चर्य्यं विस्मयो मुनिसत्तम दृष्ट्वा प्रभावं मेऽद्याभूदयोध्यायास्तपोधन

agastya uvāca aho mahadathāścaryyaṁ vismayo munisattama dṛṣṭvā prabhāvaṁ me’dyābhūdayodhyāyāstapodhana

Agastya said: Ah, what a great wonder, what astonishment, O best of sages! Having seen the power of Ayodhya, this has come upon me today, O ascetic.

Verse 56 (skanda.2.180.56)

तस्मादानंदसंदोहः समभून्मम सांप्रतम् तच्छ्रुत्वागस्त्यवचनं व्यासः प्रोवाच तं मुनिम्

tasmādānaṁdasaṁdohaḥ samabhūnmama sāṁpratam tacchrutvāgastyavacanaṁ vyāsaḥ provāca taṁ munim

'Therefore an abundance of joy has now arisen in me' — hearing these words of Agastya, Vyasa spoke again to that sage.

Verse 57 (skanda.2.180.57)

व्यास उवाच भगवन्ब्रूहि तत्त्वेन विस्तरात्सरहस्यकम् अयोध्याया महापुर्या महिमानं गुणाधिकम्

vyāsa uvāca bhagavanbrūhi tattvena vistarātsarahasyakam ayodhyāyā mahāpuryā mahimānaṁ guṇādhikam

Vyasa said: Lord, declare truly and at length, together with its mystery, the surpassing greatness of the great city Ayodhya.

Verse 58 (skanda.2.180.58)

कः क्रमस्तीर्थयात्रायाः कानि तीर्थानि को विधिः कि फलं स्नानतस्तत्र दानस्य च महामुने एतत्सर्वं समाचक्ष्व विस्तराद्वदतां वर

kaḥ kramastīrthayātrāyāḥ kāni tīrthāni ko vidhiḥ ki phalaṁ snānatastatra dānasya ca mahāmune etatsarvaṁ samācakṣva vistarādvadatāṁ vara

What is the order of pilgrimage, which are the sacred fords, what is the procedure? What is the fruit of bathing and of charity there, O great sage? Declare all this at length, O best of speakers.

Verse 59 (skanda.2.180.59)

अगस्त्य उवाच अहो धन्यतमा बुद्धिस्तव जाता तपोधन दृश्यते येन पृच्छा ते ह्ययोध्यामहिमाश्रिता

agastya uvāca aho dhanyatamā buddhistava jātā tapodhana dṛśyate yena pṛcchā te hyayodhyāmahimāśritā

Agastya said: Ah, most blessed has your understanding become, O ascetic, since your question is seen to rest on the greatness of Ayodhya.

Verse 60 (skanda.2.180.60)

अकारो ब्रह्म च प्रोक्तं यकारो विष्णुरुच्यते धकारो रुद्ररूपश्च अयोध्यानाम राजते

akāro brahma ca proktaṁ yakāro viṣṇurucyate dhakāro rudrarūpaśca ayodhyānāma rājate

The syllable A is said to be Brahma, the syllable Ya is called Vishnu, and the syllable Dha is the form of Rudra — thus the name Ayodhya shines forth.

Verse 61 (skanda.2.180.61)

सर्वोपपातकैर्युक्तैर्ब्रह्महत्यादिपातकैः नायोध्या शक्यते यस्मात्तामयोध्यां ततो विदुः

sarvopapātakairyuktairbrahmahatyādipātakaiḥ nāyodhyā śakyate yasmāttāmayodhyāṁ tato viduḥ

Since it cannot be conquered even by one burdened with all lesser and greater sins beginning with the killing of a brahmin, therefore it is known as Ayodhya, the Unconquerable.

Verse 62 (skanda.2.180.62)

विष्णोराद्या पुरी येयं क्षितिं न स्पृशति द्विज विष्णोः सुदर्शने चक्रे स्थिता पुण्यकरी क्षितौ

viṣṇorādyā purī yeyaṁ kṣitiṁ na spṛśati dvija viṣṇoḥ sudarśane cakre sthitā puṇyakarī kṣitau

This is Vishnu's primeval city; it does not touch the earth, O brahmin; it stands upon Vishnu's Sudarshana discus, and bestows merit upon the earth.

Verse 63 (skanda.2.180.63)

केन वर्णयितुं शक्यो महिमाऽस्यास्तपोधन यत्र साक्षात्स्वयं देवो विष्णुर्वसति सादरः

kena varṇayituṁ śakyo mahimā’syāstapodhana yatra sākṣātsvayaṁ devo viṣṇurvasati sādaraḥ

By whom, O ascetic, can its greatness be described, where the Lord Vishnu himself dwells visibly, with reverence?

Verse 64 (skanda.2.180.64)

सहस्रधारामारभ्य योजनं पूर्वतो दिशि प्रतीचि दिशि तथैव योजनं समतोवधिः

sahasradhārāmārabhya yojanaṁ pūrvato diśi pratīci diśi tathaiva yojanaṁ samatovadhiḥ

Beginning from Sahasradhara, its boundary extends one yojana to the east; likewise, one yojana to the west, in a level line.

Verse 65 (skanda.2.180.65)

दक्षिणोत्तरभागे तु सरयूतमसावधिः एतत्क्षेत्रस्य संस्थानं हरेरन्तर्गृहं स्थितम् मत्स्याकृतिरियं विप्र पुरी विष्णोरुदीरिता

dakṣiṇottarabhāge tu sarayūtamasāvadhiḥ etatkṣetrasya saṁsthānaṁ harerantargṛhaṁ sthitam matsyākṛtiriyaṁ vipra purī viṣṇorudīritā

But on the south and north, the Sarayu and the Tamasa are its boundary. Such is the layout of this sacred field, standing as Hari's inner sanctum; this city, O brahmin, is said to have the shape of a fish.

Verse 66 (skanda.2.180.66)

पश्चिमे तस्य मूर्द्धा तु गोप्रतारासिता द्विज

paścime tasya mūrddhā tu gopratārāsitā dvija

Its head, O brahmin, lies to the west at Gopratara.

Verse 67 (skanda.2.180.67)

पूर्वतः पृष्ठभागो हि दक्षिणोत्तरमध्यमः तस्यां पुर्य्यां महाभाग नाम्ना विष्णुर्हरिः स्वयम् पूर्वंदृष्टप्रभावोऽसौ प्राधान्येन वसत्यपि

pūrvataḥ pṛṣṭhabhāgo hi dakṣiṇottaramadhyamaḥ tasyāṁ puryyāṁ mahābhāga nāmnā viṣṇurhariḥ svayam pūrvaṁdṛṣṭaprabhāvo’sau prādhānyena vasatyapi

To the east is its back, in the middle between south and north. In that city, O greatly fortunate one, Vishnu himself, under the name Hari, whose power was seen of old, also dwells there predominantly.

Verse 68 (skanda.2.180.68)

व्यास उवाच भगवन्किं प्रभावोऽसौ योऽयं विष्णुहरिस्त्वया कीर्तितो मुनिशार्दूल प्रसिद्धिं गतवान्कथम् एतत्सर्वं समाचक्ष्व विस्तरेण ममाग्रतः

vyāsa uvāca bhagavankiṁ prabhāvo’sau yo’yaṁ viṣṇuharistvayā kīrtito muniśārdūla prasiddhiṁ gatavānkatham etatsarvaṁ samācakṣva vistareṇa mamāgrataḥ

Vyasa said: Lord, tiger among sages, by what power did this Vishnu-Hari, spoken of by you, attain such fame? Declare all this to me at length.

Verse 69 (skanda.2.180.69)

अगस्त्य उवाच विष्णुशर्मेति विख्यातः पुराभूद्ब्राह्मणोत्तमः वेदवेदांगतत्त्वज्ञो धर्मकर्मसमाश्रितः

agastya uvāca viṣṇuśarmeti vikhyātaḥ purābhūdbrāhmaṇottamaḥ vedavedāṁgatattvajño dharmakarmasamāśritaḥ

Agastya said: Of old there was a most excellent brahmin renowned as Vishnusharma, knower of the truth of the Vedas and Vedangas, devoted to righteous action,

Verse 70 (skanda.2.180.70)

योगध्यानरतो नित्यं विष्णुभक्तिपरायणः स कदाचित्तीर्थयात्रां कुर्वन्वैष्णवसत्तमः अयोध्यामागतो विष्णुर्विष्णुःसाक्षाद्वसेदिति

yogadhyānarato nityaṁ viṣṇubhaktiparāyaṇaḥ sa kadācittīrthayātrāṁ kurvanvaiṣṇavasattamaḥ ayodhyāmāgato viṣṇurviṣṇuḥsākṣādvasediti

ever devoted to yoga and meditation, wholly given to devotion to Vishnu. That best of Vaishnavas, once while making pilgrimage, came to Ayodhya thinking that Vishnu himself dwells here visibly.

Verse 71 (skanda.2.180.71)

चिंतयन्मनसा वीरस्तपः कर्तुं समुद्यतः स वै तत्र तपस्तेपे शाकमूलफलाशनः

ciṁtayanmanasā vīrastapaḥ kartuṁ samudyataḥ sa vai tatra tapastepe śākamūlaphalāśanaḥ

Resolving thus in mind, that hero prepared to perform austerity; he practiced austerity there, subsisting on leaves, roots and fruits.

Verse 72 (skanda.2.180.72)

ग्रीष्मे पंचाग्निमध्यस्थो ह्यतपत्स महातपाः वार्षिके च निरालम्बो हेमन्ते च सरोवरे

grīṣme paṁcāgnimadhyastho hyatapatsa mahātapāḥ vārṣike ca nirālambo hemante ca sarovare

In summer he, of great austerity, stood amid the five fires; in the rains, without shelter; and in winter, in a lake,

Verse 73 (skanda.2.180.73)

स्नात्वा यथोक्तविधिना कृत्वा विष्णोस्तथार्चनम् वशीकृत्येन्द्रियग्रामं विशुद्धेनांतरात्मना

snātvā yathoktavidhinā kṛtvā viṣṇostathārcanam vaśīkṛtyendriyagrāmaṁ viśuddhenāṁtarātmanā

having bathed according to the prescribed rule, having likewise worshipped Vishnu, having subdued the whole host of senses, with a purified inner self,

Verse 74 (skanda.2.180.74)

मनो विष्णौ समावेश्य विधाय प्राणसंयमम् ॐकारोच्चारणाद्धीमान्हृदि पद्मं विकासयन्

mano viṣṇau samāveśya vidhāya prāṇasaṁyamam oṁkāroccāraṇāddhīmānhṛdi padmaṁ vikāsayan

having fixed his mind on Vishnu, having practiced breath-control, the wise one, by the utterance of Om, causing the lotus of his heart to blossom,

Verse 75 (skanda.2.180.75)

तन्मध्ये रविसोमाग्निमण्डलानि यथाविधि कल्पयित्वा हरिं मूर्तं यस्मिन्देशे सनातनम्

tanmadhye ravisomāgnimaṇḍalāni yathāvidhi kalpayitvā hariṁ mūrtaṁ yasmindeśe sanātanam

and having duly visualized, within it, the orbs of the sun, moon and fire, and in that place envisioned the eternal Hari in embodied form,

Verse 76 (skanda.2.180.76)

पीतांबरधरं विष्णुं शंखचक्रगदाधरम् तं च पुष्पैः समभ्यर्च्य मनस्तस्मिन्निवेश्य च

pītāṁbaradharaṁ viṣṇuṁ śaṁkhacakragadādharam taṁ ca puṣpaiḥ samabhyarcya manastasminniveśya ca

clad in yellow, bearing conch, discus and mace, worshipped with flowers, and fixing his mind upon Him,

Verse 77 (skanda.2.180.77)

ब्रह्मरूपं हरिं ध्यायञ्जपन्वै द्वादशाक्षरम् वायुभक्षः स्थितस्तत्र विप्रस्त्रीन्वत्सरान्वसन्

brahmarūpaṁ hariṁ dhyāyañjapanvai dvādaśākṣaram vāyubhakṣaḥ sthitastatra viprastrīnvatsarānvasan

meditating on Hari in the form of Brahman, reciting the twelve-syllabled mantra, subsisting on air alone, that brahmin dwelt there for three years.

Verse 78 (skanda.2.180.78)

ततो द्विजवरो ध्यात्वा स्तुतिं चक्रे हरेरिमाम् प्रणिपत्य जगन्नाथं चराचरगुरुं हरिम् विष्णुशर्माथ तुष्टाव नारायणमतंद्रितः

tato dvijavaro dhyātvā stutiṁ cakre harerimām praṇipatya jagannāthaṁ carācaraguruṁ harim viṣṇuśarmātha tuṣṭāva nārāyaṇamataṁdritaḥ

Then that best of brahmins, having meditated, composed this hymn of praise to Hari; having bowed to Hari, the Lord of the universe, the guru of all that moves and moves not, Vishnusharma, untiring, extolled Narayana.

Verse 79 (skanda.2.180.79)

विष्णुशर्म्मोवाच प्रसीद भगवन्विष्णो प्रसीद पुरुषोत्तम प्रसीद देवदेवेश प्रसीद कमलेक्षण

viṣṇuśarmmovāca prasīda bhagavanviṣṇo prasīda puruṣottama prasīda devadeveśa prasīda kamalekṣaṇa

Vishnusharma said: Be gracious, Lord Vishnu! Be gracious, Purushottama! Be gracious, Lord of the gods of gods! Be gracious, lotus-eyed one!

Verse 80 (skanda.2.180.80)

जय कृष्ण जयाचिंत्य जय विष्णो जयाव्यय जय यज्ञपते नाथ जय विष्णो पते विभो

jaya kṛṣṇa jayāciṁtya jaya viṣṇo jayāvyaya jaya yajñapate nātha jaya viṣṇo pate vibho

Victory, O Krishna! Victory, O Inconceivable One! Victory, O Vishnu! Victory, O Imperishable! Victory, O Lord of sacrifice! Victory, O mighty Lord Vishnu!

Verse 81 (skanda.2.180.81)

जय पापहरानंत जय जन्मज्वरापह नमः कमलनाभाय नमः कमलमालिने

jaya pāpaharānaṁta jaya janmajvarāpaha namaḥ kamalanābhāya namaḥ kamalamāline

Victory, O Remover of sin, Endless One! Victory, O Remover of the fever of birth! Salutation to the lotus-naveled one, salutation to the wearer of the lotus garland!

Verse 82 (skanda.2.180.82)

नमः सर्वेश भूतेश नमः कैटभसूदन नमस्त्रैलोक्यनाथाय जगन्मूल जगत्पते

namaḥ sarveśa bhūteśa namaḥ kaiṭabhasūdana namastrailokyanāthāya jaganmūla jagatpate

Salutation, O Lord of all, Lord of beings! Salutation, O slayer of Kaitabha! Salutation to the Lord of the three worlds, root of the universe, Lord of the world!

Verse 83 (skanda.2.180.83)

नमो देवाधिदेवाय नमो नारायणाय वै नमः कृष्णाय रामाय नमश्चक्रायुधाय च

namo devādhidevāya namo nārāyaṇāya vai namaḥ kṛṣṇāya rāmāya namaścakrāyudhāya ca

Salutation to the god of gods, salutation to Narayana; salutation to Krishna, to Rama, and salutation to the wielder of the discus.

Verse 84 (skanda.2.180.84)

त्वं माता सर्वलोकानां त्वमेव जगतः पिता भयार्त्तानां सुहृन्मित्रं त्वं पिता त्वं पितामहः

tvaṁ mātā sarvalokānāṁ tvameva jagataḥ pitā bhayārttānāṁ suhṛnmitraṁ tvaṁ pitā tvaṁ pitāmahaḥ

You are the mother of all the worlds, you alone are the father of the universe; you are the true friend of those afflicted by fear; you are the father, you are the grandfather.

Verse 85 (skanda.2.180.85)

त्वं हविस्त्वं वषट्कारस्त्वं प्रभुस्त्वं हुताशनः करणं कारणं कर्त्ता त्वमेव परमेश्वरः

tvaṁ havistvaṁ vaṣaṭkārastvaṁ prabhustvaṁ hutāśanaḥ karaṇaṁ kāraṇaṁ karttā tvameva parameśvaraḥ

You are the oblation, you are the sacred exclamation 'vashat', you are the Lord, you are the consuming fire; the instrument, the cause and the agent — you alone are the Supreme Lord.

Verse 86 (skanda.2.180.86)

शंखचक्रगदापाणे मां समुद्धर माधव

śaṁkhacakragadāpāṇe māṁ samuddhara mādhava

O you with conch, discus and mace in hand, deliver me, O Madhava!

Verse 87 (skanda.2.180.87)

प्रसीद मंदरधर प्रसीद मधुसूदन प्रसीद कमलाकान्त प्रसीद भुवनाधिप

prasīda maṁdaradhara prasīda madhusūdana prasīda kamalākānta prasīda bhuvanādhipa

Be gracious, O Bearer of Mount Mandara! Be gracious, O Madhusudana! Be gracious, O Beloved of Kamala! Be gracious, O Lord of the worlds!

Verse 88 (skanda.2.180.88)

अगस्त्य उवाच इत्येवं स्तुवतस्तस्य मनोभक्त्या महात्मनः आविर्बभूव विश्वात्मा विष्णुर्गरुडवाहनः

agastya uvāca ityevaṁ stuvatastasya manobhaktyā mahātmanaḥ āvirbabhūva viśvātmā viṣṇurgaruḍavāhanaḥ

Agastya said: While that great soul was thus praising Him with heartfelt devotion, Vishnu, the Self of the universe, borne on Garuda, became manifest.

Verse 89 (skanda.2.180.89)

शंखचक्रगदापाणिः पीतांबरधरोऽच्युतः उवाच स प्रसन्नात्मा विष्णुशर्माणमव्ययः

śaṁkhacakragadāpāṇiḥ pītāṁbaradharo’cyutaḥ uvāca sa prasannātmā viṣṇuśarmāṇamavyayaḥ

With conch, discus and mace in hand, clad in yellow, the imperishable Achyuta, gracious of spirit, spoke to Vishnusharma.

Verse 90 (skanda.2.180.90)

श्रीभगवानुवाच तुष्टोऽस्मि भवतो वत्स महता तपसाऽधुना स्तोत्रेणानेन सुमते नष्टपापोऽसि सांप्रतम्

śrībhagavānuvāca tuṣṭo’smi bhavato vatsa mahatā tapasā’dhunā stotreṇānena sumate naṣṭapāpo’si sāṁpratam

The Blessed Lord said: I am pleased, my child, by your great austerity, and now, O good-minded one, by this hymn; your sins are now destroyed.

Verse 91 (skanda.2.180.91)

वरं वरय विप्रेन्द्र वरदोऽहं तवाग्रतः नाऽतप्ततपसा द्रष्टुं शक्यः केनाप्यहं द्विज

varaṁ varaya viprendra varado’haṁ tavāgrataḥ nā’taptatapasā draṣṭuṁ śakyaḥ kenāpyahaṁ dvija

Choose a boon, O chief of brahmins; I stand before you as a granter of boons. I cannot be seen by anyone who has not practiced austerity, O brahmin.

Verse 92 (skanda.2.180.92)

विष्णुशर्म्मोवाच कृतकृत्योऽस्मि देवेश सांप्रतं तव दर्शनात् त्वद्भक्तिमचलामेकां मम देहि जगत्पते

viṣṇuśarmmovāca kṛtakṛtyo’smi deveśa sāṁprataṁ tava darśanāt tvadbhaktimacalāmekāṁ mama dehi jagatpate

Vishnusharma said: I am now fulfilled, O Lord of gods, by the sight of you. Grant me, O Lord of the universe, one unwavering devotion to you.

Verse 93 (skanda.2.180.93)

श्रीभगवानुवाच भक्तिरस्त्वचला मे वै वैष्णवी मुक्तिदायिनी अत्रैवास्त्वचला मे वै जाह्नवी मुक्तिदायिनी

śrībhagavānuvāca bhaktirastvacalā me vai vaiṣṇavī muktidāyinī atraivāstvacalā me vai jāhnavī muktidāyinī

The Blessed Lord said: Let unwavering Vaishnava devotion to me, the bestower of liberation, be yours; and let my liberation-bestowing Jahnavi also remain here, unwavering.

Verse 94 (skanda.2.180.94)

इदं स्थानं महाभाग त्वन्नाम्ना ख्यातिमेष्यति

idaṁ sthānaṁ mahābhāga tvannāmnā khyātimeṣyati

This place, O greatly fortunate one, shall become famous by your name.

Verse 95 (skanda.2.180.95)

अगस्त्य उवाच इत्युक्त्वा देवदेवेशश्चक्रेणोत्खाय तत्स्थलम् जलं प्रकटयामास गांगं पातालमंडलात्

agastya uvāca ityuktvā devadeveśaścakreṇotkhāya tatsthalam jalaṁ prakaṭayāmāsa gāṁgaṁ pātālamaṁḍalāt

Agastya said: Having said this, the Lord of the gods of gods, digging up that spot with his discus, manifested the water of the Ganga from the region of Patala.

Verse 96 (skanda.2.180.96)

जलेन तेन भगवान्पवित्रेण दयांबुधिः नीरजस्तु भूमितलं क्षणाच्चक्रे कृपावशात्

jalena tena bhagavānpavitreṇa dayāṁbudhiḥ nīrajastu bhūmitalaṁ kṣaṇāccakre kṛpāvaśāt

By that pure water, the Lord, an ocean of compassion, out of mercy, in an instant rendered the surface of the earth free of impurity.

Verse 97 (skanda.2.180.97)

चक्रतीर्थमिति ख्यातं ततः प्रभृति तद्द्विज जातं त्रैलोक्यविख्यातमघौघध्वंसकृच्छुभम्

cakratīrthamiti khyātaṁ tataḥ prabhṛti taddvija jātaṁ trailokyavikhyātamaghaughadhvaṁsakṛcchubham

From then on, O brahmin, that ford became known as Chakra-tirtha, famed throughout the three worlds, auspicious, destroyer of masses of sin.

Verse 98 (skanda.2.180.98)

तत्र स्नानेन दानेन विष्णुलोकं व्रजेन्नरः

tatra snānena dānena viṣṇulokaṁ vrajennaraḥ

By bathing and giving charity there, a man attains the world of Vishnu.

Verse 99 (skanda.2.180.99)

ततः स भगवान्भूयो विष्णुशर्माणमच्युतः कृपया परया युक्त उवाच द्विजवत्सलः

tataḥ sa bhagavānbhūyo viṣṇuśarmāṇamacyutaḥ kṛpayā parayā yukta uvāca dvijavatsalaḥ

Then that Lord Achyuta, fond of brahmins, filled with supreme compassion, spoke again to Vishnusharma.

Verse 100 (skanda.2.180.100)

श्रीभगवानुवाच त्वन्नामपूर्विका विप्र मन्मूर्तिरिह तिष्ठतु विष्णुहरीति विख्याता भक्तानां मुक्तिदायिनी

śrībhagavānuvāca tvannāmapūrvikā vipra manmūrtiriha tiṣṭhatu viṣṇuharīti vikhyātā bhaktānāṁ muktidāyinī

The Blessed Lord said: O brahmin, let my image remain here bearing your name first, renowned as 'Vishnu-Hari', the bestower of liberation upon devotees.

Verse 101 (skanda.2.180.101)

अगस्त्य उवाच इति श्रुत्वा वचो विप्रो वासुदेवस्य बुद्धिमान् स्वनामपूर्विकां मूर्तिं स्थापयामास चक्रिणः

agastya uvāca iti śrutvā vaco vipro vāsudevasya buddhimān svanāmapūrvikāṁ mūrtiṁ sthāpayāmāsa cakriṇaḥ

Agastya said: Having heard these words of Vasudeva, that wise brahmin installed the image of the discus-bearer, prefixed by his own name.

Verse 102 (skanda.2.180.102)

ततः प्रभति विप्रेश शंखचक्रगदाधरः पीतवासाश्चतुर्बाहुर्नाम्ना विष्णुहरिः स्थितः

tataḥ prabhati vipreśa śaṁkhacakragadādharaḥ pītavāsāścaturbāhurnāmnā viṣṇuhariḥ sthitaḥ

From then on, O lord of brahmins, that image, bearing conch, discus and mace, clad in yellow, four-armed, stands by the name Vishnu-Hari.

Verse 103 (skanda.2.180.103)

कार्तिके शुक्लपक्षस्य प्रारभ्य दशमी तिथिम् पूर्णिमामवधिं कृत्वा यात्रा सांवत्सरी भवेत्

kārtike śuklapakṣasya prārabhya daśamī tithim pūrṇimāmavadhiṁ kṛtvā yātrā sāṁvatsarī bhavet

Beginning from the tenth day of the bright fortnight of Kartika, ending on the full moon, an annual pilgrimage takes place.

Verse 104 (skanda.2.180.104)

चक्रतीर्थे नरः स्नात्वा सर्वपापैः प्रमुच्यते बहुवर्षसहस्राणि स्वर्गलोके महीयते

cakratīrthe naraḥ snātvā sarvapāpaiḥ pramucyate bahuvarṣasahasrāṇi svargaloke mahīyate

A man, having bathed at Chakra-tirtha, is freed from all sins and is exalted in the heavenly world for many thousand years.

Verse 105 (skanda.2.180.105)

पितॄनुद्दिश्य यस्तत्र पिंडान्निर्वापयिष्यति तृप्तास्तु पितरो यान्ति विष्णुलोकं न संशयः

pitṝnuddiśya yastatra piṁḍānnirvāpayiṣyati tṛptāstu pitaro yānti viṣṇulokaṁ na saṁśayaḥ

Whoever offers rice-balls there for the sake of his ancestors — his ancestors, satisfied, go without doubt to the world of Vishnu.

Verse 106 (skanda.2.180.106)

चक्रतीर्थे नरः स्नात्वा दृष्ट्वा विष्णुहरिं विभुम् सर्वपापक्षयं प्राप्य नाकपृष्ठे महीयते

cakratīrthe naraḥ snātvā dṛṣṭvā viṣṇuhariṁ vibhum sarvapāpakṣayaṁ prāpya nākapṛṣṭhe mahīyate

A man, having bathed at Chakra-tirtha and beheld the mighty Vishnu-Hari, attaining the destruction of all sin, is exalted upon the summit of heaven.

Verse 107 (skanda.2.180.107)

स्वशक्त्या तत्र दानानि दत्त्वा निष्कल्मषो नरः विष्णुलोके वसेद्धीमान्यावदिन्द्राश्चतुर्दश

svaśaktyā tatra dānāni dattvā niṣkalmaṣo naraḥ viṣṇuloke vaseddhīmānyāvadindrāścaturdaśa

A wise man, having given gifts there according to his ability, becomes free of stain and dwells in the world of Vishnu for as long as fourteen Indras reign.

Verse 108 (skanda.2.180.108)

अन्यदापि नरस्तत्र चक्रतीथे जितेंद्रियः दृष्ट्वा सकृद्धरिं देवं सर्वपापैः प्रमुच्यते

anyadāpi narastatra cakratīthe jiteṁdriyaḥ dṛṣṭvā sakṛddhariṁ devaṁ sarvapāpaiḥ pramucyate

Even at another time, a man of subdued senses, having beheld the god Hari even once at Chakra-tirtha, is freed from all sins.

Verse 109 (skanda.2.180.109)

इति सकलगुणाब्धिर्ध्येयमूर्तिश्चिदात्मा हरिरिह परमूर्त्या तस्थिवान्मुक्तिहेतोः तमिह बहुलभक्त्या चक्रतीर्थाभिषेकी वसति सुकृतिमूर्त्तिर्योऽर्चयेद्विष्णुलोके

iti sakalaguṇābdhirdhyeyamūrtiścidātmā haririha paramūrtyā tasthivānmuktihetoḥ tamiha bahulabhaktyā cakratīrthābhiṣekī vasati sukṛtimūrttiryo’rcayedviṣṇuloke

Thus Hari, an ocean of all virtues, whose form is to be meditated upon, of the nature of pure consciousness, has remained here in a supreme form for the sake of liberation; whoever, having bathed at Chakra-tirtha, worships him here with abundant devotion, that person of virtuous deeds dwells in the world of Vishnu.