The Glorification of the Boar Incarnation

Verse 1 (skanda.2.36.1)

भरद्वाज उवाच । पुरा निशात्यये धातुः प्रबुद्धो मधुसूदनः । पुनः प्रवृत्तिं भूतानामन्वियेष धिया भृशम् ।

bharadvāja uvāca purā niśātyaye dhātuḥ prabuddho madhusūdanaḥ punaḥ pravṛttiṁ bhūtānāmanviyeṣa dhiyā bhṛśam

Bharadvaja said: Long ago, at the end of the cosmic night, Madhusudana awoke and with his mind intently sought again the means for the fresh activity of beings.

Verse 2 (skanda.2.36.2)

विना वसुमतीमन्ये भूतौघधरणक्षमाः । न भवन्तीति हृदये तर्कस्तस्याजनिष्ट च ।

vinā vasumatīmanye bhūtaughadharaṇakṣamāḥ na bhavantīti hṛdaye tarkastasyājaniṣṭa ca

The thought arose in his heart: "Without the earth, nothing else is capable of supporting the mass of beings."

Verse 3 (skanda.2.36.3)

अपश्यत्प्रणिधानेन महीं पातालगोचराम् । अतिमात्रभयोद्विग्नां परीतां महताम्बुना ।

apaśyatpraṇidhānena mahīṁ pātālagocarām atimātrabhayodvignāṁ parītāṁ mahatāmbunā

Through meditation he saw the earth sunk into the netherworld, exceedingly agitated with fear, and surrounded by a vast expanse of water.

Verse 4 (skanda.2.36.4)

प्रतिपेदे तदा रूपं भूसमुद्धरणोचितम् । उपकर्मोष्ठमनलजिह्वं प्रणवघोषणम् ।

pratipede tadā rūpaṁ bhūsamuddharaṇocitam upakarmoṣṭhamanalajihvaṁ praṇavaghoṣaṇam

Then he assumed a form fit for lifting up the earth — with lips suited to the sacrificial rite, a tongue like fire, and resounding with the syllable Om.

Verse 5 (skanda.2.36.5)

चतुराम्नायचरणं प्रायश्चित्तखुरांचितम् । प्राग्वंशकायं विलसद्दर्भरोमावलीयुतम् ।

caturāmnāyacaraṇaṁ prāyaścittakhurāṁcitam prāgvaṁśakāyaṁ vilasaddarbharomāvalīyutam

With the four Vedas as its feet, its hooves marked with the rites of expiation, its body shaped like the sacrificial hall's ridge-beam, covered with rows of gleaming kusha-grass-like hair.

Verse 6 (skanda.2.36.6)

प्रवर्ग्यावर्तसंपन्नं दक्षिणाग्न्युदरान्वितम् । स्रुक्तुण्डमखिलैः सर्वैः संविभक्तांगसन्धिकम् ।

pravargyāvartasaṁpannaṁ dakṣiṇāgnyudarānvitam sruktuṇḍamakhilaiḥ sarvaiḥ saṁvibhaktāṁgasandhikam

Endowed with the Pravargya rite as its curls, the southern sacrificial fire as its belly, its snout formed like the sacrificial ladle, and its limb-joints all distinctly formed of every element of sacrifice.

Verse 7 (skanda.2.36.7)

दिव्यसूक्तसटाजालं परत्रह्मशिरस्तथा । हव्यकव्यरयोपेतं विशुद्धपशुजानुकम् ।

divyasūktasaṭājālaṁ paratrahmaśirastathā havyakavyarayopetaṁ viśuddhapaśujānukam

With the divine Vedic hymns as its mane, the Supreme Brahman as its head, endowed with the swift flow of oblations to gods and ancestors, and its knees formed of the purified sacrificial animal.

Verse 8 (skanda.2.36.8)

उक्तात्युक्तादिकच्छन्दोमार्गमंत्र बलान्वितम् । सर्वयज्ञमयं दिव्यं वाराहं रूपमास्थितः ।

uktātyuktādikacchandomārgamaṁtra balānvitam sarvayajñamayaṁ divyaṁ vārāhaṁ rūpamāsthitaḥ

Endowed with the strength of the mantra-paths of the Ukta, Atyukta and other Vedic metres, he assumed that divine Boar form made wholly of sacrifice.

Verse 9 (skanda.2.36.9)

अन्वेष्टुं धरणीमब्धेर्विवेश सलिलांतरम् । दंष्ट्राबालशशांकोत्थलसत्कांतिचयैर्हठात् ।

anveṣṭuṁ dharaṇīmabdherviveśa salilāṁtaram daṁṣṭrābālaśaśāṁkotthalasatkāṁticayairhaṭhāt

To seek out the earth he entered forcefully into the midst of the ocean's waters, with masses of fine radiance rising from his tusk like a young crescent moon.

Verse 10 (skanda.2.36.10)

कल्पांतसमयस्फीतं तमिस्रमपसारयन् । अभिभूतांबुभृद्घोषैर्मुहुर्ब्रह्माण्डकन्दराम् ।

kalpāṁtasamayasphītaṁ tamisramapasārayan abhibhūtāṁbubhṛdghoṣairmuhurbrahmāṇḍakandarām

Dispelling the darkness that had swelled at the time of the cosmic dissolution, repeatedly overwhelming even the roar of the clouds, the cavern of the universe...

Verse 11 (skanda.2.36.11)

निनादमुखरां कुर्वन्गाढैर्घुरुघुरुस्वनैः । खुरप्रखुरविन्यासैर्जर्जरीकृतविग्रहम् ।

ninādamukharāṁ kurvangāḍhairghurughurusvanaiḥ khuraprakhuravinyāsairjarjarīkṛtavigraham

...he made resound with a deep tumultuous 'ghuru-ghuru' rumbling, shattering the ocean's form with the blows of his very sharp hooves.

Verse 12 (skanda.2.36.12)

इतस्ततो विलुठयन्नुरगाणामधीश्वरम् । तीव्रैर्निःश्वासपवनैरापातालं सरित्पतेः ।

itastato viluṭhayannuragāṇāmadhīśvaram tīvrairniḥśvāsapavanairāpātālaṁ saritpateḥ

Rolling about here and there the king of serpents, with the fierce winds of his breath driving the lord of rivers down to Patala...

Verse 13 (skanda.2.36.13)

प्रापयन्नतलस्पर्शमन्तरं दर्शनीयताम् । अतिदीर्घेण पात्रेण मग्नोन्मग्नेन वारिधेः ।

prāpayannatalasparśamantaraṁ darśanīyatām atidīrgheṇa pātreṇa magnonmagnena vāridheḥ

...making its very depths visible, plunging in and rising out of the ocean with his exceedingly long snout,

Verse 14 (skanda.2.36.14)

संक्षोभितानि पाथांसि कुर्वन्नन्तर्ययौ तदा । सप्तपातालमूलाधः स्थितां तोये भयाकुलाम् ।

saṁkṣobhitāni pāthāṁsi kurvannantaryayau tadā saptapātālamūlādhaḥ sthitāṁ toye bhayākulām

stirring up the waters he went within, to her who stood below the roots of the seven nether-worlds, afflicted with fear in the waters.

Verse 15 (skanda.2.36.15)

वेपमानां समालोक्य धरणीं हृष्टमानसः । तामारोप्य स्वदंष्ट्राग्रमुन्ममज्ज सरित्पतेः ।

vepamānāṁ samālokya dharaṇīṁ hṛṣṭamānasaḥ tāmāropya svadaṁṣṭrāgramunmamajja saritpateḥ

Seeing the trembling earth, with a joyful mind, having lifted her onto the tip of his tusk, he rose up from the ocean.

Verse 16 (skanda.2.36.16)

संस्तूयमानो मुनिभिर्जनलोकनिवासिभिः । तस्मिन्नुद्वहति प्रेम्णा देवे वसुमतीं क्षणम् ।

saṁstūyamāno munibhirjanalokanivāsibhiḥ tasminnudvahati premṇā deve vasumatīṁ kṣaṇam

While being praised by the sages dwelling in Janaloka, that God bore the Earth for a moment with love,

Verse 17 (skanda.2.36.17)

प्रतिसारा बभूवाधो वारिधेमर्ङ्गलोचिता । तदुत्तारणवेलायां वराहवपुषोऽर्जुन ।

pratisārā babhūvādho vāridhemarṅgalocitā taduttāraṇavelāyāṁ varāhavapuṣo'rjuna

and below, O Arjuna, at the time of that raising by the Boar-bodied one, the ocean became adorned as if with an auspicious bridal procession.

Verse 18 (skanda.2.36.18)

गम्भीरघोषैरम्भोधिः प्राप मंगलतूर्यताम् । उद्वृत्तवीचिविक्षिप्तशीकरासारसंगतः ।

gambhīraghoṣairambhodhiḥ prāpa maṁgalatūryatām udvṛttavīcivikṣiptaśīkarāsārasaṁgataḥ

With its deep roars the ocean attained the character of auspicious festive music, joined with showers of spray flung up by its surging waves.

Verse 19 (skanda.2.36.19)

भेजे मुक्ताफलचयो मंगलाक्षतविभ्रमम् । उदूढा तेन देवेन सा बभौ सलिलाप्लुता ।

bheje muktāphalacayo maṁgalākṣatavibhramam udūḍhā tena devena sā babhau salilāplutā

The masses of pearls took on the appearance of auspicious rice-grains; borne up by that God, she, drenched with water, shone forth,

Verse 20 (skanda.2.36.20)

गाढरागसमुत्पन्नस्वेदक्लिन्नतनूरिव । इत्थमुद्धृत्य भगवान्महीं पातालमूलतः ।

gāḍharāgasamutpannasvedaklinnatanūriva itthamuddhṛtya bhagavānmahīṁ pātālamūlataḥ

as if her body were moist with sweat born of deep passion. Thus, having lifted the earth from the root of Patala, the Lord...

Verse 21 (skanda.2.36.21)

सुदृढं स्थापयामास मध्येऽम्बुनिधिपाथसाम् । तेनोद्धृतायां मेदिन्यां पूर्णं तद्भूनभोन्तरे ।

sudṛḍhaṁ sthāpayāmāsa madhye'mbunidhipāthasām tenoddhṛtāyāṁ medinyāṁ pūrṇaṁ tadbhūnabhontare

...firmly established her in the midst of the ocean's waters. With the earth thus raised, the space between earth and sky...

Verse 22 (skanda.2.36.22)

जलं तत्कृतमर्यादाऽव्यवच्छिन्नमभूत्तदा । संस्थाप्य पृथिवीमित्थं तदीयाधारसिद्धये ।

jalaṁ tatkṛtamaryādā'vyavacchinnamabhūttadā saṁsthāpya pṛthivīmitthaṁ tadīyādhārasiddhaye

...became filled with unbroken water, bounded by the limit he had set. Having thus established the earth, for the accomplishment of her support,

Verse 23 (skanda.2.36.23)

दिग्गजानहिराजं च कमठं च न्यवेशयत् । तेषामपि च सर्वेषामाधारत्वेन सादरम् ।

diggajānahirājaṁ ca kamaṭhaṁ ca nyaveśayat teṣāmapi ca sarveṣāmādhāratvena sādaram

he set in place the elephants of the directions, the king of serpents, and the tortoise. And respectfully, as the support of all of them too...

Verse 24 (skanda.2.36.24)

अव्यक्तरूपां स्वां शक्तिं युयोज च दयानिधिः । ततो धरां समुद्धृत्य स्थितं किटितनुं हरिम् ।

avyaktarūpāṁ svāṁ śaktiṁ yuyoja ca dayānidhiḥ tato dharāṁ samuddhṛtya sthitaṁ kiṭitanuṁ harim

...the Ocean of Compassion joined his own unmanifest Power. Then Hari, standing in the Boar's body having raised the earth...

Verse 25 (skanda.2.36.25)

तुष्टुवुः सनकाद्यास्तं जनलोकनिवासिनः । तदा वराहवपुषमाराध्य पुरुषोत्तमम् ।

tuṣṭuvuḥ sanakādyāstaṁ janalokanivāsinaḥ tadā varāhavapuṣamārādhya puruṣottamam

...was praised by Sanaka and the other sages dwelling in Janaloka. Then, having worshipped the Supreme Person in his Boar form,

Verse 26 (skanda.2.36.26)

तदाज्ञया जगद्ब्रह्मा यथापूर्वमकल्पयत् ।

tadājñayā jagadbrahmā yathāpūrvamakalpayat

by his command Brahma fashioned the world as before.

Verse 27 (skanda.2.36.27)

अर्जुन उवाच । कल्पान्तसलिले मग्ना कथं तिष्ठति भूरियम् । सप्तपाताललोकाधः किमाधारा महामुने ।

arjuna uvāca kalpāntasalile magnā kathaṁ tiṣṭhati bhūriyam saptapātālalokādhaḥ kimādhārā mahāmune

Arjuna said: How does this earth, submerged in the waters at the end of the kalpa, remain [stable]? Below the seven nether-worlds, O great sage, what supports it?

Verse 28 (skanda.2.36.28)

कल्पकालः कियानेष स्यात्तद्वृत्तिश्च कीदृशी ।

kalpakālaḥ kiyāneṣa syāttadvṛttiśca kīdṛśī

How great is this period of a kalpa, and what is its course?

Verse 29 (skanda.2.36.29)

एतद्विस्तार्य सकलं मम ब्रह्मन्मुने वद ।

etadvistārya sakalaṁ mama brahmanmune vada

Explain all this to me in full, O brahmin sage.

Verse 30 (skanda.2.36.30)

भरद्वाज उवाच । विनाडिकानां षष्ट्या स्यान्नाडिकैका दिनं भवेत् । तत्षष्ट्या दिवसास्त्रिंशन्मासः पक्षद्वयात्मकः ।

bharadvāja uvāca vināḍikānāṁ ṣaṣṭyā syānnāḍikaikā dinaṁ bhavet tatṣaṣṭyā divasāstriṁśanmāsaḥ pakṣadvayātmakaḥ

Bharadvaja said: Sixty vinadikas make one nadika; sixty of those make a day; thirty days, comprising two fortnights, make a month.

Verse 31 (skanda.2.36.31)

मासौ द्वावृतुरित्युक्तस्तैः षङ्भिर्वत्सरो भवेत् । अयनद्वितयाकारः शीतवर्षोष्णसंश्रयः ।

māsau dvāvṛturityuktastaiḥ ṣaṅbhirvatsaro bhavet ayanadvitayākāraḥ śītavarṣoṣṇasaṁśrayaḥ

Two months are called a season; by six such seasons a year is formed, taking the shape of two solstice-halves comprising cold, rain, and heat.

Verse 32 (skanda.2.36.32)

देवासुराणामन्योयमहोरात्रं विपर्ययात् । उत्तरं दक्षिणे भानोरयने ते यथाक्रमम् ।

devāsurāṇāmanyoyamahorātraṁ viparyayāt uttaraṁ dakṣiṇe bhānorayane te yathākramam

For the gods and demons this forms a day-and-night in mutual reversal; the northern and southern courses of the sun correspond respectively to their day and night.

Verse 33 (skanda.2.36.33)

मानुषाब्दैः खखव्योमखाक्षिपावकसागरैः । महायुगं भवेत्पार्थ कृताद्याकारसंयुतम् ।

mānuṣābdaiḥ khakhavyomakhākṣipāvakasāgaraiḥ mahāyugaṁ bhavetpārtha kṛtādyākārasaṁyutam

By a certain reckoning of human years, O Partha, a Mahayuga is formed, made up of the Krita and other ages in sequence.

Verse 34 (skanda.2.36.34)

सप्तत्या सैकया कालो युगानामन्तरं मनोः । अस्मिञ्छ्वेतवराहाख्ये कल्पे जातान्मनूञ्छृणु ।

saptatyā saikayā kālo yugānāmantaraṁ manoḥ asmiñchvetavarāhākhye kalpe jātānmanūñchṛṇu

Seventy-one Mahayugas make the span of a Manu-age (manvantara). Hear now of the Manus born in this Kalpa called the White Boar.

Verse 35 (skanda.2.36.35)

स्वायंभुवः स्यात्प्रथमस्ततः स्वारोचिषो मनुः । उत्तमस्तामसाख्यश्च रैवतश्चाक्षुषाह्वयः ।

svāyaṁbhuvaḥ syātprathamastataḥ svārociṣo manuḥ uttamastāmasākhyaśca raivataścākṣuṣāhvayaḥ

The first was Svayambhuva, then Manu Svarochisha; then Uttama, the one called Tamasa, Raivata, and the one named Chakshusha.

Verse 36 (skanda.2.36.36)

एते गताः प्राङ्मनवः षट्सेन्द्रसुरतापसाः । वैवस्वतो वर्ततेऽद्य सप्तमो मनुरर्जुन ।

ete gatāḥ prāṅmanavaḥ ṣaṭsendrasuratāpasāḥ vaivasvato vartate'dya saptamo manurarjuna

These six earlier Manus have passed, along with their Indras, gods, and sages; today, O Arjuna, the seventh Manu, Vaivasvata, presides.

Verse 37 (skanda.2.36.37)

आदित्यवसुरुद्राद्यास्तत्काले देवतागणाः । इष्ट्वाश्वमेधशतकं तेजस्वी प्राप शक्रताम् ।

ādityavasurudrādyāstatkāle devatāgaṇāḥ iṣṭvāśvamedhaśatakaṁ tejasvī prāpa śakratām

At that time the hosts of deities were the Adityas, Vasus, Rudras and others; the radiant Indra attained the status of Shakra by performing a hundred Ashvamedha sacrifices.

Verse 38 (skanda.2.36.38)

विश्वामित्रोऽहमत्रिश्च जमदग्निश्च कश्यपः । वसिष्ठो गौतमश्चैव ते वै सप्तर्षयोऽर्जुन ।

viśvāmitro'hamatriśca jamadagniśca kaśyapaḥ vasiṣṭho gautamaścaiva te vai saptarṣayo'rjuna

Vishvamitra, I myself, Atri, Jamadagni, Kashyapa, Vasishtha, and Gautama — these indeed, O Arjuna, are the seven sages.

Verse 39 (skanda.2.36.39)

इक्ष्वाकुप्रमुखाः शूरा मनुपुत्रा महाबलाः । अवनिं पालयामासुर्नित्यं धर्मपरायणाः ।

ikṣvākupramukhāḥ śūrā manuputrā mahābalāḥ avaniṁ pālayāmāsurnityaṁ dharmaparāyaṇāḥ

The heroic, mighty sons of Manu, headed by Ikshvaku, ever devoted to dharma, ruled over the earth.

Verse 40 (skanda.2.36.40)

सूर्यदक्षब्रह्मधर्मरुद्राणां पञ्च सूनवः । सावर्णिरौच्यभौमाद्या भविष्यन्मनुसप्तकम् ।

sūryadakṣabrahmadharmarudrāṇāṁ pañca sūnavaḥ sāvarṇiraucyabhaumādyā bhaviṣyanmanusaptakam

The five sons of Surya, Daksha, Brahma, Dharma, and Rudra — Savarni, Raucya, Bhaumya and others — will be the seven future Manus.

Verse 41 (skanda.2.36.41)

चतुर्दश विधातुस्ते भवन्ति मनवोऽहनि । तत्कल्पसंज्ञं तस्यान्ते निशा स्यात्तत्समा शृणु ।

caturdaśa vidhātuste bhavanti manavo'hani tatkalpasaṁjñaṁ tasyānte niśā syāttatsamā śṛṇu

These fourteen Manus occur within a single day of the Creator; that is called a Kalpa, and at its end there is a night of equal length — hear of it.

Verse 42 (skanda.2.36.42)

दिनावसानसमये ब्रह्मणः पाण्डुनन्दन । जायतेऽवग्रहो घोरः पृथिव्यां शतवार्षिकः ।

dināvasānasamaye brahmaṇaḥ pāṇḍunandana jāyate'vagraho ghoraḥ pṛthivyāṁ śatavārṣikaḥ

O son of Pandu, at the end of Brahma's day a terrible drought arises upon the earth, lasting a hundred years.

Verse 43 (skanda.2.36.43)

तस्मिन्नवग्रहे पृथ्व्यां नीरसायां धनञ्जय । चतुर्विधानि भूतानि समायान्ति परिक्षयम् ।

tasminnavagrahe pṛthvyāṁ nīrasāyāṁ dhanañjaya caturvidhāni bhūtāni samāyānti parikṣayam

O Dhananjaya, in that drought, when the earth becomes devoid of moisture, all four kinds of beings come to utter ruin.

Verse 44 (skanda.2.36.44)

तदा तप्तशिखाकारैरुपेतो घर्मदीधितिः । मयूखैरग्निसदृशैर्वमद्भिः पावकच्छटाः ।

tadā taptaśikhākārairupeto gharmadīdhitiḥ mayūkhairagnisadṛśairvamadbhiḥ pāvakacchaṭāḥ

Then the sun, with rays like scorching flame-tips, vomiting forth blazes of fire through fire-like beams,

Verse 45 (skanda.2.36.45)

विनष्टग्रामनगरशैलवृक्षादिकानना । कूर्मपृष्ठोपमोर्वी स्यात्तप्तायःपिण्डसन्निभा ।

vinaṣṭagrāmanagaraśailavṛkṣādikānanā kūrmapṛṣṭhopamorvī syāttaptāyaḥpiṇḍasannibhā

...destroys villages, cities, mountains, and forests of trees; the earth becomes like the back of a tortoise, resembling a heated mass of iron.

Verse 46 (skanda.2.36.46)

ततो विधातुर्गात्रेभ्यः समुत्पन्ना महाघनाः । आच्छादयन्तो गगनं गर्जितध्वानबन्धुराः ।

tato vidhāturgātrebhyaḥ samutpannā mahāghanāḥ ācchādayanto gaganaṁ garjitadhvānabandhurāḥ

Then from the limbs of the Creator arise great clouds, covering the sky, beautified by the sound of thunder.

Verse 47 (skanda.2.36.47)

सितपीतारुणश्यामाश्चित्रवर्णाश्च भीषणाः । शैलेभसौधवृक्षादिनानारूपसमन्विताः ।

sitapītāruṇaśyāmāścitravarṇāśca bhīṣaṇāḥ śailebhasaudhavṛkṣādinānārūpasamanvitāḥ

White, yellow, red, dark, and variegated in colour, terrifying, taking on the various forms of mountains, elephants, palaces, and trees,

Verse 48 (skanda.2.36.48)

ते शताब्दमितं कालं महावृष्टिं वितन्वते । तेनाम्भसा शमं याति सूर्योद्भूतो महानलः ।

te śatābdamitaṁ kālaṁ mahāvṛṣṭiṁ vitanvate tenāmbhasā śamaṁ yāti sūryodbhūto mahānalaḥ

they pour forth a great rain for a hundred years; by that water the great fire born of the sun is quenched.

Verse 49 (skanda.2.36.49)

भूयश्च शतवर्षाणि वर्षन्त्युग्रं महाघनाः । तदम्भसा समुद्वेला विकृतिं यान्ति वार्द्धयः ।

bhūyaśca śatavarṣāṇi varṣantyugraṁ mahāghanāḥ tadambhasā samudvelā vikṛtiṁ yānti vārddhayaḥ

Again for a hundred years the great clouds rain fiercely; by that water the oceans, overflowing their shores, become deranged.

Verse 50 (skanda.2.36.50)

कल्पान्ताम्बुदनिर्मुक्तं लोकान्व्याप्नोति तज्जलम् । भूर्भुवःस्वर्महर्लोकानावृणोति तमो महत् । तदा निमग्ना सलिले मही पातालमूलगा ।

kalpāntāmbudanirmuktaṁ lokānvyāpnoti tajjalam bhūrbhuvaḥsvarmaharlokānāvṛṇoti tamo mahat tadā nimagnā salile mahī pātālamūlagā

That water, released from the clouds of the end of the Kalpa, pervades all the worlds; great darkness envelops Bhu, Bhuvah, Svah and Mahar; then the earth, submerged in the waters, sinks to the root of Patala.

Verse 51 (skanda.2.36.51)

अनष्टा कथमप्यास्ते ब्रह्मशक्त्यवलम्बिता । अथ निःश्वाससंभूतो मारुतो ब्रह्मणोऽर्जुन ।

anaṣṭā kathamapyāste brahmaśaktyavalambitā atha niḥśvāsasaṁbhūto māruto brahmaṇo'rjuna

Somehow remaining unlost, it endures sustained by the power of Brahma. Then, O Arjuna, a wind born of Brahma's breath...

Verse 52 (skanda.2.36.52)

उत्सारयति तान्सर्वान्कल्पान्तोत्थान्महाघनान् । एवं प्रवृद्धः पवनः शतसंवत्सरात्मकम् ।

utsārayati tānsarvānkalpāntotthānmahāghanān evaṁ pravṛddhaḥ pavanaḥ śatasaṁvatsarātmakam

...drives away all those great clouds that had arisen at the end of the Kalpa. That wind, thus grown mighty, for a hundred years...

Verse 53 (skanda.2.36.53)

कालं निरन्तरं वाति दुर्निवाररयोत्थितः । तमुग्रमनिलं हित्वा हरेर्नाभिसरोरुहे ।

kālaṁ nirantaraṁ vāti durnivārarayotthitaḥ tamugramanilaṁ hitvā harernābhisaroruhe

...blows continuously, risen with an irresistible force. Having left that fierce wind, in the lotus sprung from Hari's navel...

Verse 54 (skanda.2.36.54)

योगनिद्रामवाप्नोति तस्मिन्पाथसि पद्मभूः । योगनिद्रानुषक्तस्य याति तस्य जगद्विभोः ।

yoganidrāmavāpnoti tasminpāthasi padmabhūḥ yoganidrānuṣaktasya yāti tasya jagadvibhoḥ

...the Lotus-born Brahma attains yogic sleep upon those waters. Of him, the Lord of the universe absorbed in yogic sleep,

Verse 55 (skanda.2.36.55)

तावती शर्वरी पार्थ दिनं यावत्प्रमाणकम् । निशायां समतीतायामुत्थितो वेगवान्पुनः ।

tāvatī śarvarī pārtha dinaṁ yāvatpramāṇakam niśāyāṁ samatītāyāmutthito vegavānpunaḥ

...the night, O Partha, lasts as long as the measure of the day. When the night has passed, he arises again, full of vigour,

Verse 56 (skanda.2.36.56)

सृजप्यखिलजन्तून्वै पूर्ववच्छासनाद्धरेः । कल्पेकल्पे समुचितै रूपैः पाति जगद्धरिः ।

sṛjapyakhilajantūnvai pūrvavacchāsanāddhareḥ kalpekalpe samucitai rūpaiḥ pāti jagaddhariḥ

and by Hari's command creates all creatures anew, as before; in every Kalpa Hari protects the world in forms suited to that age.

Verse 57 (skanda.2.36.57)

अस्मिन्कल्पे श्वेतवर्णां प्राप्तवान्यज्ञपोत्रिताम् । वराहवपुषा देवो विहरन्नवनीतले ।

asminkalpe śvetavarṇāṁ prāptavānyajñapotritām varāhavapuṣā devo viharannavanītale

In this Kalpa the God assumed the white Yajna-potri form; roaming the surface of the earth in the body of the Boar,

Verse 58 (skanda.2.36.58)

स्वपूर्वनियतावासं प्रपेदे वेंकटाचलम् । स्वामिपुष्करिणीतीरे चरंश्चिरमधोक्षजः ।

svapūrvaniyatāvāsaṁ prapede veṁkaṭācalam svāmipuṣkariṇītīre caraṁściramadhokṣajaḥ

he came to Venkatachala, his own pre-ordained abode; the Imperishable One roamed for a long time on the bank of Svami Pushkarini.

Verse 59 (skanda.2.36.59)

भक्त्या परमया युक्तमपश्यज्जलजासनम् । संपूज्य प्रार्थयामास ब्रह्मा तं भूतभावनम् ।

bhaktyā paramayā yuktamapaśyajjalajāsanam saṁpūjya prārthayāmāsa brahmā taṁ bhūtabhāvanam

Brahma, seated on the lotus, endowed with supreme devotion, beheld him; having duly worshipped him, he entreated that Origin of all Beings —

Verse 60 (skanda.2.36.60)

पुरातनीं निजां स्वामिन्भज दिव्यां तनूमिति । गृहीत्वानुनयं तस्य त्यक्त्वा तां सूकराकृतिम् ।

purātanīṁ nijāṁ svāminbhaja divyāṁ tanūmiti gṛhītvānunayaṁ tasya tyaktvā tāṁ sūkarākṛtim

"O Lord, assume again your own ancient, divine form." Accepting his entreaty, having abandoned that Boar-form,

Verse 61 (skanda.2.36.61)

अनन्यभजनीयां स्वां प्राप विश्वात्मिकां तनुम् । तथास्थितं गिरौ तत्र कृत्वाप्युत्साहमूर्जितम् ।

ananyabhajanīyāṁ svāṁ prāpa viśvātmikāṁ tanum tathāsthitaṁ girau tatra kṛtvāpyutsāhamūrjitam

he assumed his own form, worthy of exclusive devotion, the universal Self. Thus established on that mountain, though making mighty effort,

Verse 62 (skanda.2.36.62)

द्रष्टुं न शेकुः सर्वेऽपि कालेन बहुनापि च ।

draṣṭuṁ na śekuḥ sarve'pi kālena bahunāpi ca

none of them, even after a long time, were able to behold him.

Verse 63 (skanda.2.36.63)

अर्जुन उवाच । दर्शनस्मरणादीनां हरिरित्थमगोचरः । कथं प्रत्यक्षतां प्राप मानुषाणां महामुने ।

arjuna uvāca darśanasmaraṇādīnāṁ hariritthamagocaraḥ kathaṁ pratyakṣatāṁ prāpa mānuṣāṇāṁ mahāmune

Arjuna said: O great sage, if Hari is thus beyond the reach of sight and remembrance, how did he become visible to human beings?

Verse 64 (skanda.2.36.64)

भाग्यभूतोऽथ जगतां यः को वाऽऽराध्य तं विभुम् । इह प्रकाशयामास कथामेतां निवेदय ।

bhāgyabhūto'tha jagatāṁ yaḥ ko vā''rādhya taṁ vibhum iha prakāśayāmāsa kathāmetāṁ nivedaya

Who was that fortunate one for the worlds who, having worshipped that all-pervading Lord, made him manifest here? Relate this story to me.

Verse 65 (skanda.2.36.65)

हरिकथाश्रवणं दुरितापहं कथयतां सकलागमविद्भवान् । सुकृतिनां ननु संप्रति धुर्यता मुनिवरेण्य ममाद्य समागता ।

harikathāśravaṇaṁ duritāpahaṁ kathayatāṁ sakalāgamavidbhavān sukṛtināṁ nanu saṁprati dhuryatā munivareṇya mamādya samāgatā

O best of sages, you are versed in all the scriptures, and the telling of Hari's story removes sin even from those who narrate it; indeed today the foremost place among the meritorious has come to me.