Sarana Names the Vanara Commanders

Shloka 1 (yuddha.26.1)

तद्वचः सत्यमक्लीबं सारणेनाभिभाषितम् । निशम्य रावणो राजा प्रत्यभाषत सारणम् ॥ ६-२६-१ ॥

tad vacaḥ satyam aklībaṃ sāraṇenābhibhāṣitam | niśamya rāvaṇo rājā pratyabhāṣata sāraṇam || 6-26-1 ||

Hearing those truthful, fearless words spoken by Sarana, King Ravana replied to him.

Shloka 2 (yuddha.26.2)

यदि मामभियुञ्जीरन् देवगन्धर्वदानवाः । नैव सीतां प्रदास्यामि सर्वलोकभयादपि ॥ ६-२६-२ ॥

yadi mām abhiyuñjīran devagandharvadānavāḥ | naiva sītāṃ pradāsyāmi sarvalokabhayādapi || 6-26-2 ||

Even if gods, gandharvas, and danavas were all to attack me at once, I would never give up Sita, not even out of fear from the whole world.

Shloka 3 (yuddha.26.3)

त्वं तु सौम्य परित्रस्तो हरिभिः पीडितो भृशम् । प्रतिप्रदानमद्यैव सीतायाः साधु मन्यसे ॥ ६-२६-३ ॥

tvaṃ tu saumya paritrasto haribhiḥ pīḍito bhṛśam | pratipradānam adyaiva sītāyāḥ sādhu manyase || 6-26-3 ||

You, gentle Sarana, so harassed and terrified by the monkeys, now think it wise to give Sita back at once.

Shloka 4 (yuddha.26.4)

को हि नाम सपत्नो मां समरे जेतुमर्हति । इत्युक्त्वा परुषं वाक्यं रावणो राक्षसाधिपः ॥ ६-२६-४ ॥

ko hi nāma sapatno māṃ samare jetum arhati | ity uktvā paruṣaṃ vākyaṃ rāvaṇo rākṣasādhipaḥ || 6-26-4 ||

"What enemy indeed could ever defeat me in battle?" Having spoken these harsh words, Ravana, lord of demons,

Shloka 5 (yuddha.26.5)

आरुरोह ततः श्रीमान् प्रासादं हिमपाण्डुरम् । बहुतालसमुत्सेधं रावणोऽथ दिदृक्षया ॥ ६-२६-५ ॥

āruroha tataḥ śrīmān prāsādaṃ himapāṇḍuram | bahutālasamutsedhaṃ rāvaṇo'tha didṛkṣayā || 6-26-5 ||

the splendid Ravana climbed up onto his palace roof, white as snow and rising to the height of many palmyra trees, wishing to see the army.

Shloka 6 (yuddha.26.6)

ताभ्यां चराभ्यां सहितो रावणः क्रोधमूर्च्छितः । पश्यमानः समुद्रं तं पर्वतांश्च वनानि च ॥ ६-२६-६ ॥

tābhyāṃ carābhyāṃ sahito rāvaṇaḥ krodhamūrcchitaḥ | paśyamānaḥ samudraṃ taṃ parvatāṃśca vanāni ca || 6-26-6 ||

Ravana, beside himself with rage, went up with those two spies, gazing at the ocean, the mountains, and the forests,

Shloka 7 (yuddha.26.7)

ददर्श पृथिवीदेशं सुसम्पूर्णं प्लवङ्गमैः । तदपारमसह्यं च वानराणां महाबलम् ॥ ६-२६-७ ॥

dadarśa pṛthivīdeśaṃ susampūrṇaṃ plavaṅgamaiḥ | tadapāram asahyaṃ ca vānarāṇāṃ mahābalam || 6-26-7 ||

and he saw the whole land covered with monkeys -- that vast host of vanaras, boundless and impossible to bear.

Shloka 8 (yuddha.26.8)

आलोक्य रावणो राजा परिपप्रच्छ सारणम् । एषां के वानरा मुख्याः के शूराः के महाबलाः ॥ ६-२६-८ ॥

ālokya rāvaṇo rājā paripapraccha sāraṇam | eṣāṃ ke vānarā mukhyāḥ ke śūrāḥ ke mahābalāḥ || 6-26-8 ||

Seeing it, King Ravana questioned Sarana: "Who among these are the chief monkeys? Who are the heroes, who are the mighty ones?

Shloka 9 (yuddha.26.9)

के पूर्वमभिवर्तन्ते महोत्साहाः समन्ततः । केषां शृणोति सुग्रीवः के वा यूथपयूथपाः ॥ ६-२६-९ ॥

ke pūrvam abhivartante mahotsāhāḥ samantataḥ | keṣāṃ śṛṇoti sugrīvaḥ ke vā yūthapayūthapāḥ || 6-26-9 ||

Who press forward everywhere, full of great zeal? Whose word does Sugriva heed? And who are the commanders even of the commanders?

Shloka 10 (yuddha.26.10)

सारण आचक्ष्व मे सर्वं के प्रधानाः प्लवङ्गमाः । सारणो राक्षसेन्द्रस्य वचनं परिपृच्छतः ॥ ६-२६-१० ॥

sāraṇa ācakṣva me sarvaṃ ke pradhānāḥ plavaṅgamāḥ | sāraṇo rākṣasendrasya vacanaṃ paripṛcchataḥ || 6-26-10 ||

O Sarana, tell me all of it -- which monkeys are the foremost." Hearing this question from the lord of the demons,

Shloka 11 (yuddha.26.11)

आबभाषेऽथ मुख्यज्ञो मुख्यांस्तांस्तु वनौकसः । एष योऽभिमुखो लङ्कां नर्दंस्तिष्ठति वानरः ॥ ६-२६-११ ॥

ābabhāṣe'tha mukhyajño mukhyāṃstāṃstu vanaukasaḥ | eṣa yo'bhimukho laṅkāṃ nardaṃstiṣṭhati vānaraḥ || 6-26-11 ||

Sarana, who knew the eminent ones well, began to speak of those forest-dwellers: "This monkey standing there roaring, his face turned toward Lanka,

Shloka 12 (yuddha.26.12)

यूथपानां सहस्राणां शतेन परिवारितः । यस्य घोषेण महता सप्राकारा सतोरणा ॥ ६-२६-१२ ॥

yūthapānāṃ sahasrāṇāṃ śatena parivāritaḥ | yasya ghoṣeṇa mahatā sprākārā satoraṇā || 6-26-12 ||

surrounded by a hundred thousand troop-leaders, at whose mighty roar all of Lanka, with its ramparts and archways,

Shloka 13 (yuddha.26.13)

लङ्का प्रतिहता सर्वा सशैलवनकानना । सर्वशाखामृगेन्द्रस्य सुग्रीवस्य महात्मनः ॥ ६-२६-१३ ॥

laṅkā pratihatā sarvā saśailavanakānanā | sarvaśākhāmṛgendrasya sugrīvasya mahātmanaḥ || 6-26-13 ||

and its hills and forests, resounds -- that resolute lord of the noble Sugriva, king of all the tree-dwellers,

Shloka 14 (yuddha.26.14)

बलाग्रे तिष्ठते वीरो नीलो नामैष यूथपः । बाहुं प्रगृह्य यः पद्भ्यां महीं गच्छति वीर्यवान् ॥ ६-२६-१४ ॥

balāgre tiṣṭhate vīro nīlo nāmaiṣa yūthapaḥ | bāhuṃ pragṛhya yaḥ padbhyāṃ mahīṃ gacchati vīryavān || 6-26-14 ||

this hero standing at the head of the army is the commander named Nila, mighty, who strides the earth with his arm raised.

Shloka 15 (yuddha.26.15)

लङ्कामभिमुखः कोपादभीक्ष्णं च विजृम्भते । गिरिशृङ्गप्रतीकाशः पद्मकिंजल्कसंनिभः ॥ ६-२६-१५ ॥

laṅkām abhimukhaḥ kopād abhīkṣṇaṃ ca vijṛmbhate | giriśṛṅgapratīkāśaḥ padmakiṃjalkasaṃnibhaḥ || 6-26-15 ||

Facing Lanka, he stretches his limbs again and again in anger; he resembles a mountain peak and gleams like the pollen of a lotus.

Shloka 16 (yuddha.26.16)

स्फोटयत्यभिसंरब्धो लाङ्गूलं च पुनः पुनः । यस्य लाङ्गूलशब्देन स्वनन्ति प्रदिशो दश ॥ ६-२६-१६ ॥

sphoṭayaty abhisaṃrabdho lāṅgūlaṃ ca punaḥ punaḥ | yasya lāṅgūlaśabdena svananti pradiśo daśa || 6-26-16 ||

In his fury he lashes his tail again and again, and the crack of it echoes through all ten directions.

Shloka 17 (yuddha.26.17)

एष वानरराजेन सुग्रीवेणाभिषेचितः । युवराजोऽङ्गदो नाम त्वामाह्वयति संयुगे ॥ ६-२६-१७ ॥

eṣa vānararājena sugrīveṇābhiṣicitaḥ | yuvarājo'ṅgado nāma tvām āhvayati saṃyuge || 6-26-17 ||

This is Angada, consecrated as crown prince by the monkey-king Sugriva; he is the one challenging you to combat.

Shloka 18 (yuddha.26.18)

वालिनः सदृशः पुत्रः सुग्रीवस्य सदा प्रियः । राघवार्थे पराक्रान्तः शक्रार्थे वरुणो यथा ॥ ६-२६-१८ ॥

vālinaḥ sadṛśaḥ putraḥ sugrīvasya sadā priyaḥ | rāghavārthe parākrāntaḥ śakrārthe varuṇo yathā || 6-26-18 ||

A worthy son of Vali, ever dear to Sugriva, he exerts himself for Rama's cause just as Varuna does for Indra's.

Shloka 19 (yuddha.26.19)

एतस्य सा मतिः सर्वा यद्दृष्टा जनकात्मजा । हनूमता वेगवता राघवस्य हितैषिणा ॥ ६-२६-१९ ॥

etasya sā matiḥ sarvā yad dṛṣṭā janakātmajā | hanūmatā vegavatā rāghavasya hitaiṣiṇā || 6-26-19 ||

It was entirely by his design that the swift Hanuman, ever devoted to Rama's welfare, found Janaka's daughter.

Shloka 20 (yuddha.26.20)

बहूनि वानरेन्द्राणामेष यूथानि वीर्यवान् । परिगृह्याभियाति त्वां स्वेनानीकेन मर्दितुम् ॥ ६-२६-२० ॥

bahūni vānarendrāṇām eṣa yūthāni vīryavān | parigṛhyābhiyāti tvāṃ svenānīkena marditum || 6-26-20 ||

This mighty one, gathering many troops of monkey-lords about him, is advancing with his own army to crush you.

Shloka 21 (yuddha.26.21)

अनुवालिसुतस्यापि बलेन महता वृतः । वीरस्तिष्ठति संग्रामे सेतुहेतुरयं नलः ॥ ६-२६-२१ ॥

anuvālisutasyāpi balena mahatā vṛtaḥ | vīras tiṣṭhati saṃgrāme setuhetur ayaṃ nalaḥ || 6-26-21 ||

Behind Vali's son, surrounded by a vast force, stands this hero ready for battle -- Nala, the builder of the bridge.

Shloka 22 (yuddha.26.22)

ये तु विष्टभ्य गात्राणि क्ष्वेडयन्ति नदन्ति च । उत्थाय च विजृम्भन्ते क्रोधेन हरिपुङ्गवाः ॥ ६-२६-२२ ॥

ye tu viṣṭabhya gātrāṇi kṣveḍayanti nadanti ca | utthāya ca vijṛmbhante krodhena haripuṅgavāḥ || 6-26-22 ||

Those excellent monkeys who brace their limbs, roar and bellow, who rise up and stretch themselves in fury --

Shloka 23 (yuddha.26.23)

एते दुष्प्रसहा घोराश्चण्डाश्चण्डपराक्रमाः । अष्टौ शतसहस्राणि दशकोटिशतानि च ॥ ६-२६-२३ ॥

ete duṣprasahā ghorāś caṇḍāś caṇḍaparākramāḥ | aṣṭau śatasahasrāṇi daśakoṭiśatāni ca || 6-26-23 ||

these irresistible, terrible, fierce ones of fierce valour number eight hundred thousand and a thousand crores.

Shloka 24 (yuddha.26.24)

य एनमनुगच्छन्ति वीराश्चन्दनवासिनः । एष आशंसते लङ्कां स्वेनानीकेन मर्दितुम् ॥ ६-२६-२४ ॥

ya enam anugacchanti vīrāś candanavāsinaḥ | eṣa āśaṃsate laṅkāṃ svenānīkena marditum || 6-26-24 ||

These heroic ones, dwellers of the sandalwood groves, follow him -- and he hopes to crush Lanka with his own force.

Shloka 25 (yuddha.26.25)

श्वेतो रजतसंकाशश्चपलो भीमविक्रमः । बुद्धिमान् वानरः शूरस्त्रिषु लोकेषु विश्रुतः ॥ ६-२६-२५ ॥

śveto rajatasaṃkāśaś capalo bhīmavikramaḥ | buddhimān vānaraḥ śūras triṣu lokeṣu viśrutaḥ || 6-26-25 ||

Sweta, silver-hued, quick, of terrible prowess, wise and valiant, is renowned throughout the three worlds.

Shloka 26 (yuddha.26.26)

तूर्णं सुग्रीवमागम्य पुनर्गच्छति वानरः । विभजन् वानरीं सेनामनीकानि प्रहर्षयन् ॥ ६-२६-२६ ॥

tūrṇaṃ sugrīvam āgamya punar gacchati vānaraḥ | vibhajan vānarīṃ senām anīkāni praharṣayan || 6-26-26 ||

That monkey swiftly comes to Sugriva and goes back again, dividing the monkey army and cheering the ranks.

Shloka 27 (yuddha.26.27)

यः पुरा गोमतीतीरे रम्यं पर्येति पर्वतम् । नाम्ना संरोचनो नाम नानानगयुतो गिरिः ॥ ६-२६-२७ ॥

yaḥ purā gomatītīre ramyaṃ paryeti parvatam | nāmnā saṃrocano nāma nānānagayuto giriḥ || 6-26-27 ||

In earlier days he ranged over the lovely mountain named Sanrochana on the bank of the Gomati, a hill rich with many trees.

Shloka 28 (yuddha.26.28)

तत्र राज्यं प्रशास्त्येष कुमुदो नाम यूथपः । योऽसौ शतसहस्राणि सहर्षं परिकर्षति ॥ ६-२६-२८ ॥

tatra rājyaṃ praśāsty eṣa kumudo nāma yūthapaḥ | yo'sau śatasahasrāṇi saharṣaṃ parikarṣati || 6-26-28 ||

There this commander named Kumuda rules; he joyfully leads along hundreds of thousands of monkeys.

Shloka 29 (yuddha.26.29)

यस्य वाला बहुव्यामा दीर्घलाङ्गूलमाश्रिताः । ताम्राः पीताः सिताः श्वेताः प्रकीर्णा घोरदर्शनाः ॥ ६-२६-२९ ॥

yasya vālā bahuvyāmā dīrghalāṅgūlam āśritāḥ | tāmrāḥ pītāḥ sitāḥ śvetāḥ prakīrṇā ghoradarśanāḥ || 6-26-29 ||

On whose long tail hang loose masses of hair many fathoms long -- copper, yellow, grey, and white, fearsome to behold --

Shloka 30 (yuddha.26.30)

अदीनो वानरश्चण्डः संग्राममभिकाङ्क्षति । एषोऽप्याशंसते लङ्कां स्वेनानीकेन मर्दितुम् ॥ ६-२६-३० ॥

adīno vānaraś caṇḍaḥ saṃgrāmam abhikāṅkṣati | eṣo'py āśaṃsate laṅkāṃ svenānīkena marditum || 6-26-30 ||

that dauntless, fierce monkey longs for battle; he too hopes to trample Lanka with his own troops.

Shloka 31 (yuddha.26.31)

यस्त्वेष सिंहसंकाशः कपिलो दीर्घकेसरः । निभृतः प्रेक्षते लङ्कां दिधक्षन्निव चक्षुषा ॥ ६-२६-३१ ॥

yas tv eṣa siṃhasaṃkāśaḥ kapilo dīrghakesaraḥ | nibhṛtaḥ prekṣate laṅkāṃ didhakṣanniva cakṣuṣā || 6-26-31 ||

And this one, lion-like, tawny, with a long mane, gazes steadily at Lanka as though he would burn it with his eyes --

Shloka 32 (yuddha.26.32)

विन्ध्यं कृष्णगिरिं सह्यं पर्वतं च सुदर्शनम् । राजन् सततमध्यास्ते रम्भो नामैष यूथपः ॥ ६-२६-३२ ॥

vindhyaṃ kṛṣṇagiriṃ sahyaṃ parvataṃ ca sudarśanam | rājan satatam adhyāste rambho nāmaiṣa yūthapaḥ || 6-26-32 ||

he, O king, who always dwells on the Vindhya, Krishnagiri, Sahya, and the lovely Sudarshana mountains -- this commander is named Rambha.

Shloka 33 (yuddha.26.33)

शतं शतसहस्राणां त्रिंशच्च हरियूथपाः । यं यान्तं वानरा घोराश्चण्डाश्चण्डपराक्रमाः ॥ ६-२६-३३ ॥

śataṃ śatasahasrāṇāṃ triṃśac ca hariyūthapāḥ | yaṃ yāntaṃ vānarā ghorāś caṇḍāś caṇḍaparākramāḥ || 6-26-33 ||

Thirty hundred lakhs of monkey troop-leaders march with him, and behind him, as he goes, come terrible monkeys, fierce and of fierce valour,

Shloka 34 (yuddha.26.34)

परिवार्यानुगच्छन्ति लङ्कां मर्दितुमोजसा । यस्तु कर्णौ विवृणुते जृम्भते च पुनः पुनः ॥ ६-२६-३४ ॥

parivāryānugacchanti laṅkāṃ marditum ojasā | yas tu karṇau vivṛṇute jṛmbhate ca punaḥ punaḥ || 6-26-34 ||

surrounding him, ready to trample Lanka with their strength. And this other one, who keeps flapping his ears and yawns again and again,

Shloka 35 (yuddha.26.35)

न च संविजते मृत्योर्न च यूथाद्विधावति । प्रकम्पते च रोषेण तिर्यक्च पुनरीक्षते ॥ ६-२६-३५ ॥

na ca saṃvijate mṛtyor na ca yūthād vidhāvati | prakampate ca roṣeṇa tiryak ca punarīkṣate || 6-26-35 ||

who fears not even death and never flees from his troop, who trembles with rage and glances sideways again and again,

Shloka 36 (yuddha.26.36)

पश्यँल्लाङ्गूलमपि च क्ष्वेडत्येष महाबलः । महाबलो वीतभयो रम्यं साल्वेयपर्वतम् ॥ ६-२६-३६ ॥

paśyaṁl lāṅgūlam api ca kṣveḍaty eṣa mahābalaḥ | mahābalo vītabhayo ramyaṃ sālveyaparvatam || 6-26-36 ||

and roars, watching his own tail -- this mighty, fearless one, who ever dwells, O king,

Shloka 37 (yuddha.26.37)

राजन् सततमध्यास्ते शरभो नाम यूथपः । एतस्य बलिनः सर्वे विहारा नाम यूथपाः ॥ ६-२६-३७ ॥

rājan satatam adhyāste śarabho nāma yūthapaḥ | etasya balinaḥ sarve vihārā nāma yūthapāḥ || 6-26-37 ||

on the lovely Salveya mountain -- this commander is named Sharabha. All his powerful troop-leaders are called the Viharas.

Shloka 38 (yuddha.26.38)

राजन् शतसहस्राणि चत्वारिंशत्तथैव च । यस्तु मेघ इवाकाशं महानावृत्य तिष्ठति ॥ ६-२६-३८ ॥

rājan śatasahasrāṇi catvāriṃśat tathaiva ca | yas tu megha ivākāśaṃ mahān āvṛtya tiṣṭhati || 6-26-38 ||

O king, they number a hundred and forty thousand. And this vast one who stands covering the sky like a great cloud,

Shloka 39 (yuddha.26.39)

मध्ये वानरवीराणां सुराणामिव वासवः । भेरीणामिव संनादो यस्यैष श्रूयते महान् ॥ ६-२६-३९ ॥

madhye vānaravīrāṇāṃ surāṇām iva vāsavaḥ | bherīṇām iva saṃnādo yasyaiṣa śrūyate mahān || 6-26-39 ||

standing amid the monkey warriors like Indra among the gods, whose great roar is heard like the boom of war-drums --

Shloka 40 (yuddha.26.40)

घोरः शाखामृगेन्द्राणां संग्राममभिकाङ्क्षताम् । एष पर्वतमध्यास्ते पारियात्रमनुत्तमम् ॥ ६-२६-४० ॥

ghoraḥ śākhāmṛgendrāṇāṃ saṃgrāmam abhikāṅkṣatām | eṣa parvatam adhyāste pāriyātram anuttamam || 6-26-40 ||

terrible among the tree-lords eager for combat -- he dwells on the unrivalled Pariyatra mountain,

Shloka 41 (yuddha.26.41)

युद्धे दुष्प्रसहो नित्यं पनसो नाम यूथपः । एनं शतसहस्राणां शतार्धं पर्युपासते ॥ ६-२६-४१ ॥

yuddhe duṣprasaho nityaṃ panaso nāma yūthapaḥ | enaṃ śatasahasrāṇāṃ śatārdhaṃ paryupāsate || 6-26-41 ||

and this ever-unconquerable commander in war is named Panasa. Fifty hundred thousand monkeys attend him,

Shloka 42 (yuddha.26.42)

यूथपा यूथपश्रेष्ठं येषां यूथानि भागशः । यस्तु भीमां प्रवल्गन्तीं चमूं तिष्ठति शोभयन् ॥ ६-२६-४२ ॥

yūthapā yūthapaśreṣṭhaṃ yeṣāṃ yūthāni bhāgaśaḥ | yas tu bhīmāṃ pravalgantīṃ camūṃ tiṣṭhati śobhayan || 6-26-42 ||

each troop-leader with his own division serving this foremost of commanders. And this one who stands adorning his formidable, leaping host,

Shloka 43 (yuddha.26.43)

स्थितां तीरे समुद्रस्य द्वितीय इव सागरः । एष दर्दुरसंकाशो विनतो नाम यूथपः ॥ ६-२६-४३ ॥

sthitāṃ tīre samudrasya dvitīya iva sāgaraḥ | eṣa dardurasaṃkāśo vinato nāma yūthapaḥ || 6-26-43 ||

encamped on the ocean shore like a second sea -- this commander, huge as Mount Dardura, is named Vinata,

Shloka 44 (yuddha.26.44)

पिबंश्चरति यो वेणां नदीनामुत्तमां नदीम् । षष्टिः शतसहस्राणि बलमस्य प्लवङ्गमाः ॥ ६-२६-४४ ॥

pibaṃś carati yo veṇāṃ nadīnām uttamāṃ nadīm | ṣaṣṭiḥ śatasahasrāṇi balam asya plavaṅgamāḥ || 6-26-44 ||

who ranges drinking from the Vena, foremost of rivers; his army numbers sixty hundred thousand monkeys.

Shloka 45 (yuddha.26.45)

त्वामाह्वयति युद्धाय क्रथनो नाम यूथपः । विक्रान्ता बलवन्तश्च यथा यूथानि भागशः ॥ ६-२६-४५ ॥

tvām āhvayati yuddhāya krathano nāma yūthapaḥ | vikrāntā balavantaś ca yathā yūthāni bhāgaśaḥ || 6-26-45 ||

The commander named Krathana challenges you to battle, keeping his valiant and powerful troops arrayed by division.

Shloka 46 (yuddha.26.46)

यस्तु गैरिकवर्णाभं वपुः पुष्यति वानरः । अवमत्य सदा सर्वान्वानरान् बलदर्पितः ॥ ६-२६-४६ ॥

yas tu gairikavarṇābhaṃ vapuḥ puṣyati vānaraḥ | avamatya sadā sarvān vānarān baladarpitaḥ || 6-26-46 ||

And this monkey whose body glows like red ochre, ever proud of his strength and heedless of every other monkey,

Shloka 47 (yuddha.26.47)

गवयो नाम तेजस्वी त्वां क्रोधादभिवर्तते । एनं शतसहस्राणि सप्ततिः पर्युपासते । एष आशंसते लङ्कां स्वेनानीकेन मर्दितुम् ॥ ६-२६-४७ ॥

gavayo nāma tejasvī tvāṃ krodhād abhivartate | enaṃ śatasahasrāṇi saptatiḥ paryupāsate | eṣa āśaṃsate laṅkāṃ svenānīkena marditum || 6-26-47 ||

is the radiant one named Gavaya, advancing against you in fury. Seventy hundred thousand monkeys attend him, and he too hopes to crush Lanka with his own host.

Shloka 48 (yuddha.26.48)

एते दुष्प्रसहा घोरा बलिनः कामरूपिणः । यूथपा यूथपश्रेष्ठा येषां संख्या न विद्यते ॥ ६-२६-४८ ॥

ete duṣprasahā ghorā balinaḥ kāmarūpiṇaḥ | yūthapā yūthapaśreṣṭhā yeṣāṃ saṃkhyā na vidyate || 6-26-48 ||

"These are the irresistible, terrible, mighty commanders and chiefs of commanders, able to change form at will, whose true number cannot be known."