The Lineage of Svayambhuva Manu

Verse 1 (devibhagavatam.8.3.1)

श्रीनारायण उवाच । महीं देवः प्रतिष्ठाप्य यथास्थाने च नारद । वैकुण्ठलोकमगमद् ब्रह्मोवाच स्वमात्मजम्

śrīnārāyaṇa uvāca | mahīṁ devaḥ pratiṣṭhāpya yathāsthāne ca nārada | vaikuṇṭhalokamagamad brahmovāca svamātmajam

Shri Narayana said: The Lord, having duly established the earth in her place, O Narada, went to Vaikuntha-loka; then Brahma spoke to his own son.

Verse 2 (devibhagavatam.8.3.2)

स्वायम्भूव महाबाहो पुत्र तेजस्विनांवर । स्थाने महीमये तिष्ठ प्रजाः सृज यथोचितम्

svāyambhūva mahābāho putra tejasvināṁvara | sthāne mahīmaye tiṣṭha prajāḥ sṛja yathocitam

"O mighty-armed one, son Svayambhuva, foremost of the radiant! Remain in this place made of earth, and create beings as is fitting.

Verse 3 (devibhagavatam.8.3.3)

देशकालविभागेन यज्ञेशं पुरुषं यज । उच्चावचपदार्थैश्च यज्ञसाधनकैर्विभो

deśakālavibhāgena yajñeśaṁ puruṣaṁ yaja | uccāvacapadārthaiśca yajñasādhanakairvibho

According to the division of place and time, with the various high and low materials that serve as the means of sacrifice, O mighty one, worship the Person who is Lord of sacrifice.

Verse 4 (devibhagavatam.8.3.4)

धर्ममाचर शास्त्रोक्तं वर्णाश्रमनिबन्धनम् । एतेन क्रमयोगेन प्रजावृद्धिर्भविष्यति

dharmamācara śāstroktaṁ varṇāśramanibandhanam | etena kramayogena prajāvṛddhirbhaviṣyati

Practise the dharma declared in the scriptures, bound to the order of varna and ashrama; by this graduated method the increase of your progeny shall come about.

Verse 5 (devibhagavatam.8.3.5)

पुत्रानुत्पाद्य गुणतः कीर्त्या कान्त्यात्मरूपिणः । विद्याविनयसम्पन्नान् सदाचारवतां वरान्

putrānutpādya guṇataḥ kīrtyā kāntyātmarūpiṇaḥ | vidyāvinayasampannān sadācāravatāṁ varān

Having begotten sons endowed with virtue, fame, radiance, and beauty of form, possessed of learning and humility, foremost among those of good conduct,

Verse 6 (devibhagavatam.8.3.6)

कन्याश्च दत्त्वा गुणवद्यशोवद्भ्यः समाहितः । मनः सम्यक् समाधाय प्रधानपुरुषे परे

kanyāśca dattvā guṇavadyaśovadbhyaḥ samāhitaḥ | manaḥ samyak samādhāya pradhānapuruṣe pare

and having given your daughters to virtuous and famed men, and, with composed mind, having fixed your attention rightly upon the Supreme Person,

Verse 7 (devibhagavatam.8.3.7)

भक्तिसाधनयोगेन भगवत्परिचर्यया । गतिमिष्टां सदा वन्द्यां योगिनां गमिता भवान्

bhaktisādhanayogena bhagavatparicaryayā | gatimiṣṭāṁ sadā vandyāṁ yogināṁ gamitā bhavān

by the discipline of devotion, through service of the Blessed Lord, you shall attain the desired goal, ever adored by the yogis."

Verse 8 (devibhagavatam.8.3.8)

इत्याश्वास्य मनुं पुत्र पद्मयोनिः प्रजापतिः । प्रजासर्गे नियम्यामुं स्वधाम प्रत्यपद्यत

ityāśvāsya manuṁ putra padmayoniḥ prajāpatiḥ | prajāsarge niyamyāmuṁ svadhāma pratyapadyata

Having thus reassured his son Manu, Prajapati, the lotus-born Brahma, having appointed him to the creation of progeny, returned to his own abode.

Verse 9 (devibhagavatam.8.3.9)

प्रजाः सृजत पुत्रेति पितुराज्ञां समादधत् । स्वायम्भुवः प्रजासर्गमकरोत्पृथिवीपतिः

prajāḥ sṛjata putreti piturājñāṁ samādadhat | svāyambhuvaḥ prajāsargamakarotpṛthivīpatiḥ

"Create progeny, O son" — bearing this command of his father, Svayambhuva, lord of the earth, undertook the creation of beings.

Verse 10 (devibhagavatam.8.3.10)

प्रियव्रतोत्तानपादौ मनुपुत्रौ महौजसौ । कन्यास्तिस्रः प्रसूताश्च तासां नामानि मे शृणु

priyavratottānapādau manuputrau mahaujasau | kanyāstisraḥ prasūtāśca tāsāṁ nāmāni me śṛṇu

Priyavrata and Uttanapada, the two sons of Manu, of great vigour, were born; and three daughters were born as well — hear their names from me.

Verse 11 (devibhagavatam.8.3.11)

आकूतिः प्रथमा कन्या द्वितीया देवहूतिका । तृतीया च प्रसूतिर्हि विख्याता लोकपावनी

ākūtiḥ prathamā kanyā dvitīyā devahūtikā | tṛtīyā ca prasūtirhi vikhyātā lokapāvanī

Akuti was the first daughter, Devahuti the second, and Prasuti, renowned as the purifier of the world, the third.

Verse 12 (devibhagavatam.8.3.12)

आकूतिं रुचये प्रादात्कर्दमाय च मध्यमाम् । दक्षायादात्प्रसूतिं च यासां लोक इमाः प्रजाः

ākūtiṁ rucaye prādātkardamāya ca madhyamām | dakṣāyādātprasūtiṁ ca yāsāṁ loka imāḥ prajāḥ

Akuti he gave to Ruchi, the middle one to Kardama, and Prasuti to Daksha — from whom all this progeny of the world was born.

Verse 13 (devibhagavatam.8.3.13)

रुचेः प्रजज्ञे भगवान् यज्ञो नामादिपूरुषः । आकूत्यां देवहूत्यां च कपिलोऽसौ च कर्दमात्

ruceḥ prajajñe bhagavān yajño nāmādipūruṣaḥ | ākūtyāṁ devahūtyāṁ ca kapilo'sau ca kardamāt

From Ruchi, in Akuti, was born the Blessed Yajna, a primal person by that name; and from Kardama, in Devahuti, Kapila was born.

Verse 14 (devibhagavatam.8.3.14)

साङ्ख्याचार्यः सर्वलोके विख्यातः कपिलो विभुः । दक्षात्प्रसूत्यां कन्याश्च बहुशो जज्ञिरे प्रजाः

sāṅkhyācāryaḥ sarvaloke vikhyātaḥ kapilo vibhuḥ | dakṣātprasūtyāṁ kanyāśca bahuśo jajñire prajāḥ

That mighty Kapila is renowned throughout the whole world as the teacher of Sankhya; and from Daksha, in Prasuti, many daughters were likewise born.

Verse 15 (devibhagavatam.8.3.15)

यासां सन्तानसम्भूता देवतिर्यङ्नरादयः । प्रसूता लोकविख्याता सर्वे सर्गप्रवर्तकाः

yāsāṁ santānasambhūtā devatiryaṅnarādayaḥ | prasūtā lokavikhyātā sarve sargapravartakāḥ

From whose offspring gods, animals, men and the rest were born — celebrated throughout the worlds, all of them promoters of creation.

Verse 16 (devibhagavatam.8.3.16)

यज्ञश्च भगवान् स्वायम्भुवमन्वन्तरे विभुः । मनुं ररक्ष रक्षोभ्यो यामैर्देवगणैर्वृतः

yajñaśca bhagavān svāyambhuvamanvantare vibhuḥ | manuṁ rarakṣa rakṣobhyo yāmairdevagaṇairvṛtaḥ

And in the Svayambhuva Manvantara, the Blessed Yajna, surrounded by the bands of gods called the Yamas, protected Manu from the demons.

Verse 17 (devibhagavatam.8.3.17)

कपिलोऽपि महायोगी भगवान् स्वाश्रमे स्थितः । देवहूत्यै परं ज्ञानं सर्वाविद्यानिवर्तकम्

kapilo'pi mahāyogī bhagavān svāśrame sthitaḥ | devahūtyai paraṁ jñānaṁ sarvāvidyānivartakam

Kapila too, the great yogin, the Blessed Lord, established in his own hermitage, imparted to Devahuti the supreme knowledge that removes all ignorance,

Verse 18 (devibhagavatam.8.3.18)

सविशेषं ध्यानयोगमध्यात्मज्ञाननिश्चयम् । कापिलं शास्त्रमाख्यातं सर्वाज्ञानविनाशनम्

saviśeṣaṁ dhyānayogamadhyātmajñānaniścayam | kāpilaṁ śāstramākhyātaṁ sarvājñānavināśanam

the discipline of meditation together with its particulars, and the ascertainment of self-knowledge — the Kapila teaching, destroyer of all unwisdom.

Verse 19 (devibhagavatam.8.3.19)

उपदिश्य महायोगी स ययौ पुलहाश्रमम् । अद्यापि वर्तते देवः साङ्ख्याचार्यो महाशयः

upadiśya mahāyogī sa yayau pulahāśramam | adyāpi vartate devaḥ sāṅkhyācāryo mahāśayaḥ

Having given this teaching, the great yogin went to the hermitage of Pulaha; even to this day that great-minded god remains as teacher of Sankhya.

Verse 20 (devibhagavatam.8.3.20)

यन्नामस्मरणेनापि साङ्ख्ययोगश्च सिद्ध्यति । तं वन्दे कपिलं योगाचार्यं सर्ववरप्रदम्

yannāmasmaraṇenāpi sāṅkhyayogaśca siddhyati | taṁ vande kapilaṁ yogācāryaṁ sarvavarapradam

By the mere remembrance of whose name Sankhya-yoga too is accomplished — I bow to that Kapila, teacher of yoga, giver of every boon.

Verse 21 (devibhagavatam.8.3.21)

एवमुक्तं मनोः कन्यावंशवर्णनमुत्तमम् । पठतां शृण्वतां चापि सर्वपापविनाशनम्

evamuktaṁ manoḥ kanyāvaṁśavarṇanamuttamam | paṭhatāṁ śṛṇvatāṁ cāpi sarvapāpavināśanam

Thus has this excellent account of the lineage of Manu's daughters been told, which destroys all sin for those who read or hear it too.

Verse 22 (devibhagavatam.8.3.22)

अतः परं प्रवक्ष्यामि मनुपुत्रान्वयं शुभम् । यदाकर्णनमात्रेण परं पदमवाप्नुयात्

ataḥ paraṁ pravakṣyāmi manuputrānvayaṁ śubham | yadākarṇanamātreṇa paraṁ padamavāpnuyāt

Hereafter I shall declare the auspicious lineage of Manu's sons, by merely hearing which one attains the supreme state.

Verse 23 (devibhagavatam.8.3.23)

द्वीपवर्षसमुद्रादिव्यवस्था यत्सुतैः कृता । व्यवहारप्रसिद्ध्यर्थं सर्वभूतसुखाप्तये

dvīpavarṣasamudrādivyavasthā yatsutaiḥ kṛtā | vyavahāraprasiddhyarthaṁ sarvabhūtasukhāptaye

the arrangement of the continents, the regions, the oceans and the rest, which was made by his sons for the establishment of worldly order and for the attainment of the happiness of all beings.